«قاراپايىمدارعا قاشان...»

وسى ءسوز جەتى سەناتور كەلگەندە دە كولدەنەڭ تارتىلدى قاراپايىم حالىق مۇددەسىنە ەتەنە جاقىن بولۋ, شاعىن جانە ورتا بيزنەسكە كەڭ جول اشۋ, كەدەرگى اتاۋلىنى جويۋ جونىندە ەلباسى قاشاننان-اق ناقتىلى مىندەتتەر قويىپ, تالاپشىلدىقتى كۇشەيتىپ كەلەدى. «2050» ستراتەگياسىنداعى ايرىقشا ارنالاردىڭ ءبىرى دە وسى باعىتتا ەكەنى ايان. ۇستىمىزدەگى جىلدىڭ اقپانىندا پرەزيدەنت «قازاقستان رەسپۋبليكاسىندا كاسىپكەرلىك قىزمەت ءۇشىن جاعدايدى جاقسارتۋ جونىندەگى تۇبەگەيلى شارالار تۋرالى» جارلىققا قول قويدى. بۇل دا شىنايى قامقورلىق, شىن قولداۋ, مول مۇمكىندىك. وتكەن اپتانىڭ سوڭىنا تامان وڭتۇستىك قازاقستان وبلىسىنا جەتى سەناتور كەلدى. ولار – پارلامەنت سەناتى «ءوڭىر» دەپۋ­تات­تىق توبىنىڭ مۇشەلەرى ە.جۇماباەۆ, ق.ايتا­حانوۆ, س.جالماعامبەتوۆا, ا.كۇزەكوۆ, و.راح­مان­بەرديەۆ, ج.تورەگەلدينوۆ, م.باقتيار ۇلى. سەناتورلار شاعىن جانە ورتا بيزنەستى مەملەكەتتىك قولداۋ ماسەلەسىنىڭ ءمانىسىن زەرتتەپ, زەردەلەمەك ماقساتتا ءبىراز جەرلەردە بولدى, ءبىرتالاي جاعدايلارمەن ءجىتى تانىستى, دەپۋتاتتىق توپتىڭ كوشپەلى وتىرىسىن وتكىزدى. باسقوسۋعا وڭىرلىك دامۋ ءمينيسترىنىڭ ءبىرىنشى ورىنباسارى ق.وسكەنباەۆ, اۋىل شارۋاشىلىعى ۆيتسە-ءمينيسترى س.وماروۆ, وقو باسشىلارى, وزگە دە لاۋازىم يەلەرى, وبلىستىق, قالالىق ءماسليحاتتاردىڭ دەپۋتاتتارى, كاسىپكەرلەر قاتىستى. وڭتۇستىك وڭىرىندەگى كاسىپكەرلىكتىڭ, شاعىن جانە ورتا بيزنەستىڭ ويداعىداي دامىپ كەلە جاتقانى, وزگەلەرگە ونەگە بولارلىقتاي جادىراڭقى جەتىستىكتەردىڭ از ەمەستىگى اتاپ كورسەتىلدى. بۇكىل بايتاعىڭىزدا 900 مىڭعا تامان بەلسەندى كاسىپكەرلىك سۋبەكتىسى بولسا, وسىنىڭ 11 پايىزعا جۋىعى وڭتۇستىكتە ەكەن. ەل كولەمىندەگى كاسىپكەرلىكتى ءناسىپ ەتەتىن 2,6 ميلليون ادامنىڭ دا 11 پايىزعا جۋىعى وسىندا ەكەنى ەرەكشەلەندى. قۋانارلىق تا, قۇپتارلىق تا كورسەتكىشتەر بارشىلىق. دەسەك تە, وسىناۋ ورتا جانە شاعىن بيزنەسكە بايلانىستى تالاي-تالاي تاعدىرشەشتى تىرلىكتەر, قول جەتىپ جاتقان قوماقتى ناتيجەلەر ءسوز بولعاندا كوپ كىسىلەردىڭ: «قاراپايىمدارعا قاشان جەتەر ەكەن؟», «قاراپايىم شارۋالارعا وسىنىڭ ءبارى ءبۇتىن كۇيدە بارىپ جاتقان جوق قوي», «تالاي نارسە دىتتەلگەن دىلگىر نۇكتەلەرىنە تيمەي قالىپ قويا بەرەدى» دەگەن پىكىرلەردى اشىق ايتىپ, كۇرسىنەتىنى راس. جوعارى دەڭگەيدەگى جيىندا قۋانىش ايتا­حانوۆ ءبۇي دەدى: «وڭتۇستىكتىڭ بيزنەسكە قولداۋ كورسەتۋدەگى باعالى باستامالارى باسقالارعا ۇلگى بولارلىقتاي. الايدا, اۋىلدارداعى كاسىپ­كەرلەردىڭ كوپشىلىگى مەملەكەتتىك قولداۋ تۇرلەرىنەن بەيحابار. قارجى ۇيىمدارى نەسيەلەردى تىم جوعارى پايىزبەن بەرەدى. سول نەسيەنى العىسى كەلەتىن قاراپايىم ازامات­تاردىڭ كەپىلدىككە قويار مۇلكى جوق...». وقو اكىمى اسقار مىرزاحمەتوۆ: «يندۋس­تريالى ايماق بويىنشا ءتيىستى ەرەجەلەر مەن زاڭدار بەكىتىلمەگەن. زاڭ مىندەتتى تۇردە كەرەك. سونداي-اق, كەڭەستىك كەزەڭنەن كەيىن توق­تاپ قالعان زاۋىتتاردى ساتىپ الىپ, جۇمى­سىن جالعاستىرۋعا ارنالعان زاڭناما دا قاجەت. اقيقاتىن ايتساق, «اگروبيزنەس-2020» باعدار­لاماسى ءىرى فەرمەرلىك قوجالىقتارعا باعىت­تالعان. ەندى سوعان اۋىلداعى قاراپايىم شارۋا­لارعا دا قولداۋ بولارلىقتاي ارنايى جەڭىلدىكتەر ەنگىزىلسە», دەگەن ۇسىنىسىن ءبىلدىردى. كوردىڭىزدەر مە, سەناتورىڭىز دا, اكىمىڭىز دە «قاراپايىم ازامات, قاراپايىم شارۋا» دەيدى. بۇرىندارى «قاراپايىمدارعا قاشان...» دەگەن كۇرسىنىس سول قاراپايىمداردىڭ وزدەرىنەن جانە سولاردىڭ ماڭايلارىنان عانا, ارى كەتسە, اۋىل مەن اۋدان اكىمدەرى تاراپىنان ەستىلۋشى ەدى. ەندى قاراپايىمدارعا باعىتتالعان بىرقانشا جاعدايلاردىڭ ازىرشە بۇيىرماي كەلە جاتقانى «ءوڭىر» دەپۋتاتتىق توبى, ءىرى لاۋازىمدى تۇلعالار توقايلاسقان بەدەلدى باسقوسۋدا مويىندالعانىنا مىڭ دا ءبىر راحمەت. دەيسىز. جاقسىلىقتىڭ بەلگىسى, ارينە. ۇزاعىنان سۇيىندىرگەي. ءسوز بەن ءىس ۇيلەسە تۇسكەي. مارحابات بايعۇت, «ەگەمەن قازاقستان». وڭتۇستىك قازاقستان وبلىسى.