بانكنوتتار سەنىمسىزدىك تۋعىزادى

اق تەلەفون شىلدىر ەتە قالدى. تۇتقانى كوتەر­گەن­دە ارعى جاعىنان جاسى ەگدەلەۋ تارتقان ەر ادامنىڭ داۋى­سى ەستىلدى. – ماعان «ەگەمەن قازاقستاننىڭ» وبلىستاعى ءتىلشىسى كەرەك ەدى, – دەدى ول كىسى. – ىزدەگەن ادامىڭىز تىڭداپ تۇر, ايتا بەرىڭىز, – دەدىم مەن. مەن سىزگە سارالجىن اۋىلىنان تەلەفون سوعىپ تۇر­مىن. اتى-ءجونىم – بەيسەنعالي جاباسوۆ. زەينەت­­­­­­كەر­مىن. مۇنداعى ءار شاڭىراق «ەگەمەندى» جازدىرىپ الدىرادى دەسەم قاتەلەسپەسىم انىق. باسىلىمدا «ۇلت­تىق بانك حابارلايدى» دەگەن ۇلكەن تاقىرىپپەن ماتە­ريالدار بەرىلىپ تۇرادى عوي. وسى ايدار بويىنشا ءبارىمىزدىڭ كوڭىلىمىزدى الاڭداتىپ جۇرگەن ماسەلەگە قاتىستى تۇسىنىكتەمەلەر مەن مالىمەتتەر بەرۋلەرىڭىزدى سۇرايمىن. – ول قانداي مالىمەتتەر ەدى, بەيسەنعالي اعا؟ –دەدىم مەن تەلەفون قوڭىراۋىنىڭ يەسىنە. – ماسەلەنىڭ ءمانىسى مىنادا. ءبىز تىم شالعايدا جاتقان جۇرتپىز. ايتايىن دەگەنىم, سوڭعى كەزدە قولدانىستاعى تەڭگە بانكنوتتارىنىڭ كەيبىرىنىڭ اينالىمنان شىعىپ قالعاندىعى نەمەسە تاياۋ ارادا شىعاتىندىعى جونىندە الىپ-قاشپا اڭگىمەلەر اۋىل تۇرعىندارى اراسىندا ءجيى ەستىلىپ ءجۇر. ونىڭ قايسىسى دۇرىس, قايسىسى بۇرىس؟ اق-قاراسىن اجىراتۋدان قالىپ بارامىز. مىسالى, بۇگىندە اقشا اينالىمىندا 1000, 2000, 5000 جانە 10 000 تەڭگەلىك بانكنوتتاردىڭ بىرنەشە نۇسقا­داعى تۇرلەرى قاتار قولدانىلىپ ءجۇر. اسىرەسە, ءارتۇرلى ديزاينداعى, ءارتۇرلى ءپىشىن مەن كولەمدەگى 1000 تەڭگەلىك بانكنوتتار جونىندە الىپ-قاشپا اڭگىمەلەر كوپ. تاياۋدا كۇلتەگىن جازباسى بەينەلەنگەن ونىڭ جاڭا ديزاينداعى ءتۇرى اينالىسقا ەنگىزىلدى. سوعان بايلانىستى وسى بانكنوتتىڭ بۇرىنعى تۇرلەرى ەندى قولدانىلمايدى ەكەن دەگەن سىبىستاردى دا ەستىپ قالىپ ءجۇرمىز. بۇعان نە سەنەرىمىزدى, نە سەنبەسىمىزدى بىلمەي دال بولدىق. ءسويتىپ, مۇنداي بانكنوتتاردى جۇمساۋدان نەمەسە كەرى قولعا قايتارىپ الۋدان ءبىرتۇرلى سەزىكتەنىپ تۇراتىن كۇيگە جەتتىك. سوندىقتان دا, الگى ءوزىم ايتقانىمداي «ەگەمەن قازاقستان» بەتىندە ءتيىستى تۇسىنىكتەمە بەرۋلەرىڭىزدى وتىنەمىز. تاعى دا قايتالاعىم كەلەدى. ەل گازەتى «ەگەمەندە» «ۇلتتىق بانك حابارلايدى, تۇسىنىكتەمە بەرەدى» دەگەن ايدار بار. جاۋاپتى سوعان سالسا جەتەدى. ارتىق ەشتەڭەنىڭ قاجەتى جوق. ءبىزدى تولعاندىرىپ جۇرگەن ماسەلە وسى, دەپ اياقتادى ءسوزىن اۋىل اقساقالى. البەتتە اماناتقا قيانات جاساۋعا بولمايدى. وسى ويدىڭ جەتەگىمەن جوعارىداعى جولداردى «ەگەمەنگە» جولداۋدى ءجون كوردىك. مۇنداي كورىنىس تەك سارالجىن اۋىلىندا عانا ەمەس, وزگە وڭىرلەردە دە كەزدەسىپ قالۋى ابدەن مۇمكىن ەمەس پە؟ تەمىر قۇسايىن, «ەگەمەن قازاقستان». باتىس قازاقستان وبلىسى, قاراتوبە اۋدانى, سارالجىن اۋىلى.