مۇناي-گاز سالاسىنا ارنالعان ءونىم شىعاراتىن كاسىپورىننىڭ اشىلۋ سالتاناتىنا ماڭعىستاۋ وبلىسى اكىمىنىڭ ءبىرىنشى ورىنباسارى ب.ورىنباساروۆ, «KAZAKH INVEST» ۇلتتىق كومپانياسى» اق ەۋروپا ەلدەرى بويىنشا وڭىرلىك ديرەكتورى مەن فرانتسيالىق «PCM Europe S. A. S» كومپانياسىنىڭ باسشىلارى قاتىستى.
قۇزىرلى ورىندار بەرگەن مالىمەتكە سۇيەنسەك, اتالعان كاسىپورىن جىلىنا 2 400 بۇراندالى سورعى مەن 600 جەتەك (پريۆود) شىعارادى. اتالعان ءوندىرىستى ىسكە قوسۋ ارقىلى وڭىردە جاڭا جۇمىس ورىندارى اشىلىپ, ءوندىرىس ورىندارى زاماناۋي قۇرىلعىلارمەن قامتاماسىز ەتىلمەك.
– وڭىردەگى ەكونوميكانى دامىتۋدىڭ باسىم باعىتتارى وڭدەۋ ونەركاسىبى, كولىك جانە لوگيستيكا, اگروونەركاسىپتىك كەشەن, تۋريزم جانە جاڭارتىلاتىن ەنەرگەتيكا ەكەنى بەلگىلى. سوڭعى بەس جىلدا وڭىرگە 7 ملرد اقش دوللارىنان استام تىكەلەي شەتەلدىك ينۆەستيتسيالار تارتىلعانىن اتاپ وتكەن ءجون. بيىلعى 5 ايدىڭ وزىندە 229 ملرد تەڭگەنىڭ ينۆەستيتسياسى تارتىلدى, ناقتى كولەم يندەكسى – 101,0%. بۇل كورسەتكىش وتكەن جىلدىڭ وسى مەرزىمىندە, ياعني 2021 جىلدىڭ 5 ايىندا 216 ملرد تەڭگە بولعان ەدى. ال بيىل وبلىستا شامامەن 120 ملرد تەڭگە سوماسىنا 22 جوبانى ىسكە اسىرۋ جوسپارلانىپ وتىر, – دەدى وبلىس اكىمىنىڭ ءبىرىنشى ورىنباسارى ب.ورىنباساروۆ.
الداعى ۋاقىتتا بۇراندالى سورعى شىعاراتىن زاۋىتتىڭ العاشقى جىلداعى قاۋقارى 1 600 بۇراندالى سورعى جانە 400 جەتەك (پريۆود) بولماق. ال ءۇشىنشى كەزەڭدە ونىڭ كولەمىن جىلىنا 2 400 سورعى مەن 600 جەتەككە (پريۆود) دەيىن ۇلعايتۋ كوزدەلگەن. بۇل قوسىمشا 100 جاڭا جۇمىس ورنىن قۇرۋعا مۇمكىندىك بەرمەك.
ماڭعىستاۋ وبلىسى
