اڭگىمە ەركىن فورماتتا ءوتتى. جاستار قىزىقتى جوبالارى تۋرالى ايتىپ, يدەيالارىمەن بولىسۋگە, سونداي-اق ماڭىزدى سۇراقتاردى كوتەرىپ, ولارعا جاۋاپ الۋعا مۇمكىندىك الدى.
ۆيتسە-پرەمەر ءوز سوزىندە ەل حالقىنىڭ 20%-ىن 14 پەن 29 جاس ارالىعىنداعى جاستار قۇرايتىنىن اتاپ ءوتتى. جاس قازاقستاندىقتاردىڭ جان-جاقتى دامۋى – ۇكىمەت ءۇشىن باسىم مىندەت. مەملەكەت باسشىسىنىڭ قولداۋىنىڭ ارقاسىندا ەلىمىزدە جاستاردى قولداۋعا ارنالعان بىرقاتار جوبا جۇزەگە اسىرىلۋدا.
«پرەزيدەنت قاسىم-جومارت توقاەۆ جاستاردىڭ قوزعاۋشى كۇش ەكەنىن ايتىپ, ونىڭ زور الەۋەتىن اتاپ ءوتتى. ءبىز بۇل دەڭگەيدى جوعارىلاتۋىمىز كەرەك. مەن سىزدەردى ءوز ۋاقىتتارىڭىز بەن الەۋەتتەرىڭىزدى ادىلەتتى جاڭا قازاقستاندى قۇرۋ جولىنا پايدالانۋعا شاقىرامىن. تۋعان ەلدىڭ يگىلىگى ءۇشىن قىزمەت ەتۋگە, ادال ەڭبەككە, پروگرەسسيۆتى بىلىمگە جانە وزىق تاجىريبەگە سۇيەنۋگە ۇندەيمىن. ءبىز بىرگە جاڭا قازاقستان قۇرامىز!», دەدى ە.توعجانوۆ.
جاستار كوشباسشىلارى ءوز جوبالارىمەن, يدەيالارىمەن پرەزيدەنتتىڭ باستاماسىن قولداپ, جاڭا قازاقستاندى قۇرۋعا دەگەن نيەتتەرىن جەتكىزدى.
كەزدەسۋدە ەسىرتكىگە تاۋەلدىلىكتىڭ الدىن الۋعا جانە ەسىرتكىنىڭ تارالۋىنا قارسى كۇرەسكە باعىتتالعان «NarkoSTOP», قازاق ءتىلدى حالىق ءۇشىن شەت تىلدەرىن دامىتۋعا باعىتتالعان «تىلدەر ساياباعى» جوبالارى تىڭدالدى. ۆيتسە-پرەمەر كەزدەسۋ بارىسىندا اعىلشىن ءتىلىن وقىتۋعا ارنالعان ارنايى ورىندار ۇسىنۋدى تاپسىردى. سونداي-اق ينكليۋزيۆتى قوعامعا دا كوڭىل ءبولىندى.
ە.توعجانوۆ ينكليۋزيۆتى قوعام ەرەكشە قاجەتتىلىكتەرى بار جانە مۇمكىندىكتەرى شەكتەۋلى ادامدار ءۇشىن تاۋەلسىز ءومىر سالتىن جۇرگىزۋگە جانە الەۋمەتتىك كاسىپكەرلىكتى دامىتۋ ەسەبىنەن ءومىردىڭ بارلىق سالاسىنا, ەكونوميكالىق تاۋەلسىزدىككە بەلسەندى قاتىسۋعا جاعداي جاسالاتىن قوعام رەتىندە قاراستىرىلۋعا ءتيىس ەكەنىن اتاپ ءوتتى.
«ينكليۋزيۆتى قوعامدى قالىپتاستىرۋ, اسىرەسە جاستار اراسىندا جاپپاي ينكليۋزيۆتى سانانى قالىپتاستىرۋعا بايلانىستى كوپتەگەن ماسەلەنى شەشۋدىڭ ىرگەتاسى بولىپ تابىلادى. بۇل ءۇشىن جۇرتشىلىقتى جانە جاستاردى ورىن العان پروبلەمالاردى شەشۋگە ەمەس, العىشارتتار مەن سەبەپتەر جاساۋعا بەلسەندىرەك تارتۋ قاجەت. سالاماتتى ءومىر سالتى, ءبىلىم الۋ, كاسىپ پەن داعدىلاردى يگەرۋدەن باستاپ», دەدى ە.توعجانوۆ.
جاس بەلسەندىلەردىڭ ۇسىنىستارىن تىڭداعان ەرالى توعجانوۆ قالا جاستارىنىڭ الەۋەتى تۋرالى جىلى لەبىزىن ءبىلدىرىپ, قازىرگى ۋاقىتتا مەملەكەتتىك جاستار ساياساتىندا جاڭا تاسىلدەردى قالىپتاستىرۋ ماڭىزدى ەكەنىن جانە الماتى وسى ۇدەرىستە ترەند-مەيكەر بولۋعا ءتيىس ەكەنىن اتاپ ءوتتى.
كەزدەسۋ سوڭىندا پرەمەر-ءمينيستردىڭ ورىنباسارى NARXOZ ۋنيۆەرسيتەتىنىڭ ۇزدىك ماگيسترانتتارىنا ديپلومدارىن سالتاناتتى تۇردە تاپسىردى.
سونىمەن قاتار ە.توعجانوۆ الماتى قالاسىنا جاساعان جۇمىس ساپارى اياسىندا «شىڭعا ورلەۋ» الەۋمەتتىك كلۋبىنىڭ ينفراقۇرىلىمىمەن تانىستى.
«شىڭعا ورلەۋ» – ەلىمىزدەگى ماڭىزدى الەۋمەتتىك جوبا. مۇندا كوپ بالالى, از قامتىلعان وتباسىلاردان شىققان مەكتەپ جاسىنداعى بالالار قوسىمشا تەگىن ءبىلىم الادى, سپورتتىق جانە شىعارماشىلىق ۇيىرمەلەرگە قاتىسادى. مۇنداعى تالىمگەرلەر – زەينەتكەرلەر مەن مۇمكىندىگى شەكتەۋلى جاندار. بۇگىنگى تاڭدا الماتى قالاسىندا وسىنداي 10 كلۋب جۇمىس ىستەيدى, وندا 180 ادام ەڭبەك ەتەدى.
ە.توعجانوۆ ۇكىمەتپەن بالالار مەن جاستاردىڭ بوس ۋاقىتىن ءتيىمدى پايدالانۋدى ۇيىمداستىرۋ بويىنشا بەلسەندى جۇمىس جۇرگىزىلىپ, جۇيەلى شارالار كەشەنىنىڭ ىسكە اسىرىلعانىن اتاپ ءوتتى.
«ۇكىمەت جىل سوڭىنا دەيىن بالالاردىڭ 80%-ىنا جۋىعىن قوسىمشا سپورت سەكتسيالارىمەن جانە ۇيىرمەلەرمەن قامتۋدى جوسپارلاپ وتىر. جالپى ءبىلىم بەرەتىن مەكتەپتەردىڭ, بالاباقشالار مەن كوللەدجدەردىڭ 28 مىڭنان اسا دەنە شىنىقتىرۋ مۇعالىمى اپتاسىنا كەمىندە 3 قوسىمشا سپورت ۇيىرمەسىن وتكىزەدى. بۇل شارالار بۇقارالىق سپورتتى دامىتۋعا باعىتتالعان. سپورتتىق ينفراقۇرىلىم اياسى كەڭەيۋدە, 2021 جىلى 41 دسك ىسكە قوسىلدى, ونىڭ ىشىندە 32-ءسى اۋدان ورتالىقتارى مەن اۋىلداردا. 2025 جىلدىڭ سوڭىنا دەيىن 131 سپورت نىسانىن سالۋ جانە قايتا جاڭارتۋ جوسپارلانىپ وتىر», دەدى ۆيتسە-پرەمەر.
بالالاردىڭ كلۋبتا بولۋ ۋاقىتىندا بارلىق نەگىزگى مەكتەپ پاندەرى (ماتەماتيكا, قازاق, ورىس, اعىلشىن تىلدەرى, IT-تەحنولوگيا) بويىنشا ءۇي تاپسىرماسىن دايىنداۋدا كاسىبي كومەك كورسەتۋ عانا ەمەس, سونىمەن قاتار سپورتتىق سەكتسيالار جانە شىعارماشىلىق ۇيىرمەلەر – ساۋىقتىرۋ-دەنە شىنىقتىرۋ, ساندىك-قولدانبالى ونەر, شاحمات, حورەوگرافيا, دەنە شىنىقتىرۋ, مۋزىكا, دومبىرا, ساحنالىق شەبەرلىك جانە ت.ب. ساباقتار قاراستىرىلعان.
كەزدەسۋ قورىتىندىسى بويىنشا ە.توعجانوۆ الماتى قالاسىنىڭ اكىمدىگىنە بالالاردى ودان ءارى سۇيەمەلدەۋ بويىنشا شارالار قابىلداۋدى, ءتۇرلى شىعارماشىلىق جوبالار مەن سپورتتىق كونكۋرستارعا, ونىڭ ىشىندە جۇمىس ىستەپ تۇرعان مەملەكەتتىك ءبىلىم بەرۋ, مادەنيەت جانە سپورت ۇيىمدارىنىڭ بازاسىندا قاتىسۋىنا مۇمكىندىكتەر جاساۋدى تاپسىردى.
الماتى
