كوروناۆيرۋس ينفەكتسياسىنىڭ تارالۋى بويىنشا الماتى – «سارى ايماقتا». كوكتەمنىڭ باسى مەن ورتاسىندا اۋرۋ كورسەتكىشتەرى تومەندەگەن بولاتىن, ەندى قايتا ءوسىپ جاتىر. وسىلايشا, جۇقتىرۋ جاعدايلارىنىڭ ءوسۋى 0,2% بولدى, تارالۋ كوەففيتسيەنتى – 1-دەن جوعارى. جۇقتىرۋ وشاقتارىنىڭ ەڭ كوپ سانى بوستاندىق, المالى, الاتاۋ, بوستاندىق جانە مەدەۋ اۋداندارىنىڭ اۋماعىندا ورنالاسقان. ينفەكتسيانىڭ تارالۋىنا قوعامدىق ورىندارعا بارۋ, ۇيدەگى, قالالىق كولىكتەگى, جۇمىس ورنىنداعى قارىم-قاتىناستار, سونداي-اق ۆاكتسينالاۋ مەن رەۆاكتسينالاۋ قارقىنىنىڭ تومەندەۋى سەبەپ بولىپ وتىر.
تۇرعىندار اراسىندا ىندەتكە شالدىعۋ دەرەكتەرىن ازايتۋ ماقساتىندا قالا اكىمشىلىگى ۆاكتسينالاۋ مەن رەۆاكتسينالاۋ جاساتىپ, ناۋقاستاردى وقشاۋلاۋ بارىسىن باقىلاۋ, الدىن الۋدىڭ نەگىزگى ەرەجەلەرىن ساقتاۋ قاجەت ەكەنى تۋرالى ءتۇسىندىرۋ جۇمىستارىن كۇشەيتۋ بويىنشا بىرقاتار شارا قابىلدادى. سونىمەن قاتار پاندەميانىڭ جاڭا تولقىنىنا الماتىدا 23 كوۆيد كلينيكاسى دايىندالدى. وندا بارلىعى 7 مىڭ توسەكتىك ورىن بار, ولاردىڭ 250-ءى جانساقتاۋ بولىمىنە تيەسىلى.
مەديتسينالىق قوعامداستىق وكىلدەرىمەن كەڭەس بارىسىندا كۆي-ءدىڭ الدىن الۋ ماسەلەلەرى قارالدى.
پرەمەر-ءمينيستردىڭ ورىنباسارى ە.توعجانوۆ قالادا جۇقتىرۋ جاعدايلارىنىڭ وسۋىنە, سونداي-اق مساك جۇمىسىن ۇيلەستىرۋدىڭ, ۆاكتسينالاۋ مەن رەۆاكتسينالاۋدى ۇيىمداستىرۋدىڭ ماڭىزدىلىعىنا, الماتى قالاسىنىڭ دەنساۋلىق ساقتاۋ جۇيەسىنىڭ كوروناۆيرۋس بويىنشا احۋالدىڭ ورشۋىنە دايىندىعىنا نازار اۋداردى.
«بۇگىن قويىلعان مىندەتتەردى قالانىڭ باس مەملەكەتتىك سانيتارلىق دارىگەرىمەن بىرگە تالداپ, كوروناۆيرۋس ينفەكتسياسىنىڭ الدىن الۋ جانە تارالۋىنا جول بەرمەۋ بويىنشا قاجەتتى شارالار قابىلداۋدى سۇرايمىن», دەپ اتاپ ءوتتى ە.توعجانوۆ.
كەڭەس سوڭىندا ۆيتسە-پرەمەر قالا باسشىلىعىنا COVID-19-عا قارسى يممۋنداۋ ناۋقانىن كۇشەيتۋدى تاپسىردى. سونداي-اق حالىق اراسىندا ساپالى ءتۇسىندىرۋ جۇمىستارىن جۇرگىزۋدى كۇشەيتۋ قاجەتتىلىگىن اتاپ ءوتتى.
سونىمەن قاتار پرەمەر-ءمينيستردىڭ ورىنباسارى الماتى قالاسىنداعى الەۋمەتتىك قىزمەتتەر ۇيىندە بولدى. وندا 11 ۇيىم ورنالاسقان. ىشىندە تۇرعىن ءۇي ساياساتى باسقارماسى, حالىقتى جۇمىسپەن قامتۋ ورتالىعى, حقو, «اتامەكەن» جانە ت.ب. بار. بۇل جەردە قالا تۇرعىندارىنا ء«بىر تەرەزە» قاعيداتى بويىنشا ءبىر ورىندا 700-دەن اسا قىزمەت كورسەتىلەدى. ورتالىقتا تەگىن زاڭگەرلىك كەڭەس پەن پسيحولوگتىڭ كومەگىن الۋعا بولادى.
ە.توعجانوۆ الەۋمەتتىك قولداۋ جانە حالىقتىڭ ءومىر ءسۇرۋ ساپاسىن ارتتىرۋ مەملەكەتتىك ساياساتتىڭ باستى باعىتتارىنىڭ ءبىرى جانە ۇكىمەتتىڭ ءبىرىنشى كەزەكتەگى مىندەتى ەكەنىن اتاپ ءوتتى.
