شاۆكات ميرزيوەۆ ايماقتا سوزىلمالى اۋرۋلارى جانە مۇگەدەكتىگى بار 120 بالاعا ارنالعان بالالار مەديتسينالىق وڭالتۋ ورتالىعىن, 80 ورىندىق بالالار فتيزياتريالىق ساناتوري, نوكىس قالاسى مەديتسينا بىرلەستىگى قۇرامىنداعى 20 ورىندىق حيرۋرگيالىق بولىمشەسىن, 20 ورىندىق اۋىر ناۋقاستارعا پاللياتيۆتىك كومەك كورسەتۋ ءبولىمىن (حوسپيس), شالعايداعى اۋىلداردا 34 قوسىمشا مەديتسينالىق پۋنكتتەر قۇرۋدى تاپسىردى.
سونىمەن قاتار 2022 جىلدىڭ سوڭىنا دەيىن جەرگىلىكتى جەدەل جاردەم قىزمەتىن 63 ارنايى كولىكپەن قامتاماسىز ەتىلۋى كەرەك. 1 قىركۇيەكتەن باستاپ ورتالىق كوپسالالى جانە وتباسىلىق ەمحانالاردىڭ فيليالدارى نەگىزىندە 16 وتباسىلىق دارىگەرلىك پۋنكت جۇمىس ىستەي باستايدى. قاراقالپاقستاندا بالالار اراسىندا كەڭ تاراعان اۋرۋلاردى ەرتە انىقتاۋ ماقساتىندا 2-10 جاس ارالىعىنداعى بالالار اراسىندا گەلمينتوز, 12-15 جاس ارالىعىنداعى قىزدار اراسىندا انەميا بويىنشا سكرينينگتىك باعدارلاما جۇزەگە اسىرىلادى.
بيىلعى 1 شىلدەدەن باستاپ لەپروزوريالاردا جۇمىس ىستەيتىن بارلىق قىزمەتكەر لاۋازىمدىق جالاقىسىنا 50 پايىز ۇستەمەاقى الادى. اتالعان قاۋلىدا كادرلاردى دايارلاۋ شارالارى دا ناقتىلانعان. وعان سايكەس كەمىندە 3 جىل جۇمىس ءوتىلى بار وتباسىلىق دارىگەرلەر جەرگىلىكتى بيۋدجەت قاراجاتى ەسەبىنەن قايتا دايارلاۋ كۋرستارىنان وتەدى. مەديتسينالىق جوعارى وقۋ ورىندارىنىڭ تۇلەكتەرى جانە مەديتسينالىق مەكەمەلەردىڭ ماماندارى جەدەل مەديتسينالىق كومەكتى دامىتۋ قورى ەسەبىنەن جەدەل جاردەم جانە جەدەل مەديتسينالىق قىزمەتتە جۇمىس ىستەۋ ءۇشىن قايتا دايارلاۋ كۋرستارىندا وقىتىلادى. 2022-2024 جىلدارى كەمىندە 75 مەديتسينا قىزمەتكەرى بىلىكتىلىگىن ارتتىرۋ جانە تاعىلىمدامادان ءوتۋ ءۇشىن بەدەلدى شەتەلدىك مەديتسينالىق مەكەمەلەر مەن ورتالىقتارعا جىبەرىلەدى.
