ءونىم وڭدەلۋىمەن ءوتىمدى
جەكە كاسىپكەرلىكپەن العاش شۇعىلدانعان كەزىم ءالى كۇنگىدەي ەسىمدە. قۇرىلىس سالاسىنداعى ازدى-كوپتى جۇمىس تاجىريبەمە سەنىپ, ءۇي جيھازدارىن جاساۋعا بەل بۋدىم. ۇيرەنە كەلە ءوندىرىستى كەڭەيتىپ, كەڭسەلىك جيھازدارعا تاپسىرىس الا باستادىم. ماماندانىپ, توسەلىپ العاننان كەيىن جانىما قولىنان ءىس كەلەتىن ءجىگىتتەردى جيناپ, جيھاز جاسايتىن تسەح اشتىق. قۇرال-جابدىقتاردى يتاليادان الدىرتتىق. كاسىپورىن قۇرىلعاندا نەبارى 6 ادام ەڭبەك ەتسە, «پرومسترويمەبەل» جشس-نە اينالعالى 120 جاڭا جۇمىس ورنىن قامتاماسىز ەتۋگە ءمۇمكىندىك تۋدى. اينالاسى ون جىلدىڭ ىشىندە ساپالى دا ءساندى جيھازدار شىعارۋمەن قاتار باسقا دا سالالىق قۇرىلىمدار پايدا بولدى. مۇنىڭ ءبارى ايتۋعا عانا وڭاي, ءىس جۇزىندە كوپتەگەن كەدەرگىلەر كەزدەستى. قينالعان كەزدەر, اسىرەسە, قاراجاتتان تاپشىلىق كورگەن ءساتتەر از بولمادى. شىنىن ايتسام, ەلباسىنىڭ وتاندىق بيزنەستى دامىتۋعا دەگەن جان-جاقتى قولداۋى بولماعاندا مۇنداي دارەجەگە جەتپەس ەدىك. يمانداي شىنىم بۇل. كانەكي, دەرەكتەرگە جۇگىنىپ كورەيىك.
جوعارىدا ايتقانىمداي, ءساتىن سالىپ, ءىسىمىز العا باستى. الايدا, زامان اعىمىنا ساي جيھاز جاساۋ كاسىپكەرلىگىن مەڭگەرگەنمەن, ءبىز سياقتى شاعىن وندىرۋشىلەرگە نارىق زاڭىنىڭ قوياتىن تالاپتارى قاتاڭ بولاتىن. ءوزىمىزدىڭ تاۋارلىق بەلگىمىزدى قالىپتاستىرۋ ءۇشىن باسەكەلەستىككە توتەپ بەرۋ قاجەتتىگى تۋدى. مىنە, وسى كەزدە مەملەكەتتىڭ ۇدەمەلى يندۋستريالىق-يننوۆاتسيالىق دامۋىنا نەگىزدەلگەن ۇشقىر جوبالارعا سۇيەنۋگە تۋرا كەلدى. وسى ورايدا, «بيزنەستىڭ جول كارتاسى-2020» باعدارلاماسىنىڭ شاراپاتى دا, شاپاعاتى دا كوپ ءتيدى. وسى باعدارلاما اياسىندا 50 ميلليون تەڭگە جەڭىلدەتىلگەن دەمەۋقارجى الۋ ارقىلى ءوندىرىس اۋقىمىن ارتتىرىپ, جۇمىس ورنىن كوبەيتتىك. جيھاز جاساۋ وندىرىسىندەگى باستى شارت – ساپا مەن سانگە ەرەكشە باسىمدىق بەرە وتىرىپ, تەحنيكالىق جاڭعىرتۋلارعا بارىنشا دەن قويدىق. سوڭعى تەحنولوگيالىق جاڭالىقتارىمىزدىڭ ءبىرى 90 مىڭ ەۋرو تۇراتىن فرەزەرلىك ورتالىق ورناتىلدى. يتاليادان جەتكىزىلگەن اعاش وڭدەۋ ستانوگى مەن مەمبراندى نىعىزداۋىشتىڭ باعاسى 80 مىڭ ەۋرونى قۇرادى. ماسەلە ارزان-قىمباتتىلىعىندا ەمەس, ءبىز ءۇشىن قازاقستاندىق مازمۇنداعى ساپالى تاۋارلار ءتۇرىن مولىنان شىعارۋ باستى باعدار ەتىلدى. وسى ۇدەدەن كورىنۋ ماقساتىمەن «ەلىمىزدىڭ ۇزدىك تاۋارلارى» سەكىلدى بەدەلدى بايقاۋلارعا ۇزبەي قاتىسىپ, تاجىريبەمىزدى ودان ءارى جەتىلدىرە تۇستىك. ۋاقىت اعىمىنا ىلەسۋ وڭاي ەمەس. جۇرتشىلىقتىڭ ۇسىنىستارى ءبىرىنشى كەزەكتە ەسكەرىلىپ, قوسىمشا اعاش وڭدەۋ, پلاستيك ەسىكتەر مەن تەرەزەلەر جاساۋ سالالارىن جاڭعىرتتىق.
ءبىز بۇگىندە جىلىنا 300 ميلليون تەڭگەنىڭ ءۇي-ىشىلىك, كەڭسەلىك جيھازداردىڭ ءتۇر-تۇرلەرىن قۇراستىرۋعا قاۋقارلىمىز. بۇل جۇمىستارمەن 45 ادام اينالىسادى. جىل وتكەن سايىن الەۋمەتتىك, ونەركاسىپتىك جانە جەكە ارنايى تاپسىرىستار كولەمى ارتىپ كەلەدى. ءوز ونىمدەرىمىزدى شىمكەنت, قاراعاندى, استانا, اتباسار, قوستاناي, شورتاندى, ستەپنياك قالالارىنا ۇزدىكسىز جونەلتەمىز. باسقالارعا قاراعاندا باعا نەگە قولجەتىمدى دەگەن ساۋالدار ماعان ءجيى قويىلادى. تۇسىندىرە كەتەيىن. قىتايدىكى ارزانداۋ كورىنگەنىمەن, ساپاسىنا قويىلاتىن كىنارات كوپ. رەسەيدىكى قىمبات. وسىعان وراي, باعا ساياساتىن وڭتايلى ورنىقتىرۋدىڭ ماڭىزى وتە زور. بۇل – ءبىر. ەكىنشىدەن, ءبىز كوتەرمە ساۋدا ادىسىمەن جۇمىس ىستەۋگە كوشتىك. نەگە دەيسىز عوي؟ ەلىمىزدە جيھاز جاساۋمەن شۇعىلداناتىن ۇيىمداردىڭ دەنىنىڭ وندىرىستىك جاراقتانۋى دا, ونىمدىلىك قۋاتى دا تومەن. كوبىنە كىشىگىرىم تاپسىرىستار قابىلداۋمەن عانا شەكتەلەدى. ءبىز سياقتى ەكىنىڭ ءبىرىنىڭ قولى جەتە بەرمەيتىن وتە قىمبات قوندىرعىلار الۋعا تاۋەكەل ەتە بەرمەيدى. ءارى قارجىلىق ءمۇمكىندىكتەرى دە شەكتەۋلى. ماسەلەن, الماتىنىڭ ۇساق ساۋدا كومپانيالارى بىزدەن قوتارا ساتىپ الىپ, وزگەلەرگە ۇسىنىپ جاتادى. جۋىردا شىمكەنتتىك ءبىر كاسىپكەر ساندىقتىڭ 400 دانا بەت جاقتاۋىنا تاپسىرىس بەردى. ونىڭ ءوتىنىشىن ءارى كەتسە 7-10 كۇننىڭ ءىشىندە تاپ-تۇيناقتاي ورىندايمىز. تاپسىرىستىڭ كوبەيگەنىنەن-اق تۇتىنۋشىلار كوڭىلىنەن شىعىپ ءجۇرگەنىمىزدى اڭعارۋعا بولاتىن سياقتى.
«Trans Motors Group» جشس-ءىن ۇيىمداستىرىپ, ىشكى جانە حالىقارالىق كولىك-لوگيستيكا قىزمەتىن جانداندىرۋىمىزعا دا «بيزنەستىڭ جول كارتاسى-2020» باعدارلاماسىنىڭ جاردەمى وراسان زور بولدى. بۇل سالا ءبىز ءۇشىن تىڭ سانالعانىمەن, جەڭىلدىكپەن ەكى جىلعا بەرىلگەن 150 ميلليون تەڭگە دەمەۋقارجىنى ورىندى جۇمساي ءبىلۋدىڭ ارقاسىندا جۇك تاسۋ, ساقتاۋ باعىتتارى بويىنشا قىزمەت كورسەتۋ كولەمى بىلتىر 110 ميلليون تەڭگەگە جەتتى. تمد, ەۋروپا ەلدەرىنە جۇك تاسۋمەن جوعارى كلاستى شەتەلدىك 15 كولىك اينالىسادى. نەمىستىڭ «فورتە» بانكىنىڭ جەرگىلىكتى فيليالى ارقىلى تاعى 10 كولىك ساتىپ الۋدى مەجەلەپ وتىرمىز.
بيىلدان باستاپ وندىرىستىك-ونەركاسىپتىك كورپوراتسيا قۇرا وتىرىپ جارما داقىلدارىن قالدىقسىز وڭدەۋدىڭ كلاستەرلىك جۇيەسىن دامىتۋعا كوڭىل بولگەن جايىمىز بار. ول ءۇشىن شيكىزات جەرگىلىكتى تاۋار وندىرۋشىلەردەن ساتىپ الىنىپ, ودان ارعى ۇدەرىس تۇگەلدەي وزىمىزدە اتقارىلادى. شەتەلدەن اكەلىنگەن شاعىن زاۋىت ايىنا 15-20 توننا ءونىم وندىرە الادى. دايىن كۇيىندەگى قاراقۇمىق, بۇرشاق, جارما ونىمدەرى ازىرگە سولتۇستىك قازاقستان, قاراعاندى وبلىستارىنا تاراتىلادى. باعالارى الدەقايدا ارزان. ءوندىرىستى كەڭەيتكەننەن كەيىن وزگە وڭىرلەرگە دە جەتكىزەتىن بولامىز. جاقىن شەتەلدەرگە شىعۋ دا ويىمىزدا بار.
كوزىن تابا بىلگەنگە تابىس كول-كوسىر. ونىڭ ۇلكەن-كىشىسى بولمايدى. مىسالى, «پرومسترويمەبەل» سەرىكتەستىگىنە قاراستى «قۇرىلىس-سەرۆيس-سك» كومپانياسى تۇرعىن ۇيلەر, الەۋمەتتىك عيماراتتار سالۋمەن اينالىسادى. وتكەن جىلى 80 ورىندى مەكتەپ, 10 ءۇي قولدانىسقا بەرىلدى. بيىل 27 پاتەرلى ءۇيدىڭ, 300 ورىندى ءبىلىم ءۇيىنىڭ قۇرىلىسى جۇرگىزىلۋدە. مامليۋت قالاسىندا 18 پاتەرلى ءۇي «بيزنەستىڭ جول كارتاسى-2020» باعدارلاماسى شەڭبەرىندە تۇرعىزىلۋدا. پايدالانۋعا بەرىلگەن جاعدايدا 7 پاتەر ءبىزدىڭ بولاشاق جۇمىسشىلارعا تاپسىرىلادى. ءبىز ولاردى ەكىجاقتى كەلىسىمشارت تالابىمەن تۇراقتى جۇمىسپەن قامتاماسىز ەتەتىن بولامىز.
ناۋبايحانا, ديىرمەن مۇلتىكسىز جۇمىس ىستەپ تۇر. ايىنا 60-70 توننا ۇن ۇگىلىپ, 20-30 تونناسى ساتىلادى. قالعانى ىشكى قاجەتتىلىككە جۇمسالادى. ايىنا 30-35 مىڭ بولكە نان پىسىرىلەدى. باعاسى 37-40 تەڭگە ارالىعىندا.
نارىق ءبارىمىزدى ءونىمنىڭ ءوتۋىمەن ءوتىمدى ەكەنىن انىق ۇقتىردى. ءبىز دە ناعىز باسەكەلەستىك حالىقارالىق ستاندارتتارعا نەگىزدەلگەن ساپاعا بارىپ تىرەلەتىنىن انىق تۇسىنەمىز.
مۇرات حارسيەۆ,
«پرومسترويمەبەل» جشس
ديرەكتورى.
سولتۇستىك قازاقستان وبلىسى,
مامليۋت اۋدانى.
