بۇگىن, 6 شىلدەدە جەرگىلىكتى ۋاقىتپەن ساعات 9:55-تە تەڭىز كەن ورنىندا جارىلىس بولىپ, ەكى ادام قازا تاپتى.
جارىلىس جىلىوي اۋدانىنىڭ ورتالىعى – قۇلسارى قالاسىنان 150 شاقىرىم قاشىقتاعى تەڭىز كەن ورنىندا بولعان. جارىلىستىڭ سالدارىنان ءۇش ادام جاراقات العان.
«تەڭىز كەن ورنىنداعى 3-بۋىن زاۋىتىنىڭ 42-ۋچاسكەسىندە گيدروتەست جۇرگىزۋ كەزىندە قۇبىردىڭ فلانەتستى قوسىندىسى ۇزىلگەن. اتالعان جوبانى ىسكە اسىراتىن مەردىگەر كومپانيا – «سەنىمدى قۇرىلىس» جشس-دە جۇمىس ىستەيتىن 1985 جىلعى ەر ادام وقيعا ورنىندا قازا تاپتى. كەيىن «تەڭىزشەۆرويل» جشس-نە قاراستى مەديتسينالىق كلينيكادا «اگروپروم تەحنيكا» جشس-ءنىڭ ءبىر جۇمىسشىسى قايتىس بولدى. ونىڭ جاسى – 37-دە», دەپ حابارلادى توتەنشە جاعدايلار دەپارتامەنتىنىڭ ءباسپاسوز قىزمەتى.
كەن ورنىنداعى جارىلىستان ءۇش ادام زارداپ شەككەن. ولار – Onstream Kazakhstan, «سەنىمدى قۇرىلىس» جانە «مۇقان سەرۆيس» جشس-ءنىڭ جۇمىسشىلارى. زارداپ شەككەندەر – 29 جانە 26-جاستاعى ەر ادامدار.
«جاراقات العان جۇمىسشىنىڭ ءبىرى – Onstream Kazakhstan جشس-ءنىڭ 26 جاستاعى ەر ادام «تەڭىزشەۆرويل» جشس-ءنىڭ اۋە كەمەسىمەن اتىراۋ وبلىستىق اۋرۋحاناسىنا جەتكىزىلدى. قازىر ناۋقاستىڭ جاعدايى اۋىر دەپ باعالانىپ وتىر. ناۋقاس وبلىستىق اۋرۋحانانىڭ حيرۋرگيا بولىمشەسىنە جاتقىزىلدى», دەپ ءمالىم ەتتى دەپارتامەنتتىڭ ءباسپاسوز قىزمەتى.
