سپورت • 05 شىلدە، 2022

باياعى جارتاس – سول جارتاس...

44 رەت كورسەتىلدى

سۋ سپورتىنان ماجارستاننىڭ باس شاھارى – بۋداپەشتتە وتكەن الەم چەمپيوناتى ءوز مارەسىنە جەتتى. جەر-جاھاننىڭ ءار قيىرىنان جينالعان سپورتشىلار 17 كۇن بويى ءجۇزۋ، اشىق سۋدا ءجۇزۋ، سۋعا سەكىرۋ، ۆاتەرپول جانە سينحروندى ءجۇزۋ سەكىلدى سپورت تۇرلەرى بويىنشا 74 جۇلدە جيىنتىعىن ساراپقا سالدى. باق سىناۋشىلار قاتارىندا 2016 جىلى ريو جانە 2021 جىلى توكيودا الاۋى تۇتانعان جازعى وليمپيا ويىندارىندا جەڭىس تۇعىرىنا كوتەرىلگەن ساڭلاقتاردىڭ قالىڭ شوعىرى بولدى.

سۋ سپورتىنان الەم چەمپيوناتى 1973 جىلدان بەرى ۇيىمداستىرىلىپ كەلەدى. وسىعان دەيىن اتالعان جارىستىڭ جالاۋى 18 مارتە جەلبىرەپ، سونىڭ 13-ىندە امەريكالىقتار الدارىنا جان سالمادى. اقش قۇراماسى 1973، 1975، 1978، 1982، 1991، 1998، 2003، 2005، 2007، 2009، 2011، 2017، 2022 جىلدارى جالپىكوماندالىق ەسەپتە ءبىرىنشى ورىندى يەلەندى. 1986 جىلى گەرمانيا وزسا، 2001 جىلى اۋستراليانىڭ اسىعى الشىسىنان ءتۇستى. ال 1994، 2015 جانە 2019 جىلدارى قىتايدىڭ قارقىنىنا ەشبىر ەلدىڭ ورەندەرى شىدامادى. مىنە، جالپى ەسەپتە كوش باستاۋ باقىتى تەك وسى ءتورت مەملەكەتتىڭ ساڭلاقتارىنا عانا بۇيىردى.

جەكەلەگەن سپورتشىلار جايىندا ايتار بولساق، الەم چەمپيوناتىندا ەڭ مول ولجاعا كەنەلگەن مايكل فەلپس ەكەنى ءمالىم. 2001-2011 جىلدار ارالىعىندا وتكەن جارىستاردا ول 26 التىن، 6 كۇمىس جانە 1 قولا مەدالدى ولجالادى. بارلىعى – 33 جۇلدە. ارينە، «بالتيموردىڭ وعى» دەگەن لاقاپ اتقا يە بولعان اقش-تىڭ داڭقتى ءجۇزۋشىسىنىڭ بۇل تابىسىنا تاڭدانباۋ مۇمكىن ەمەس. مايكلدىڭ وزگە رەكوردتارىن ايتپاعاندا، ونىڭ وليمپيا ويىندارىندا 23 التىن، 3 كۇمىس جانە 2 قولانى ەنشىلەگەنى بار. ءبىر سوزبەن ايتساق، جەر-جاھانداعى ەشبىر سپورتشى ءوزىنىڭ اتاق-داڭقى جاعىنان فەلپسپەن تەڭەسە المايدى.

ەكىنشى جانە ءۇشىنشى ورىنداردى سۆەتلانا روماشينا مەن ناتاليا يششەنكو يەمدەنۋدە. رەسەيدىڭ قوس سينحروندى جۇزۋشىلەرىنىڭ دە قول جەتكىزگەن تابىستارى تولاعاي. روماشينا 21 رەت جەڭىس تۇعىرىنىڭ ەڭ بيىك ساتىسىنا كوتەرىلسە، يششەنكونىڭ قورجىنىندا 19 التىن مەن 2 كۇمىس مەدال بار. ءتورتىنشى ورىندا – رايان لوحتە. اقش-تىڭ ءجۇزۋشىسى 18 التىن، 5 كۇمىس جانە 4 قولانى يەلەندى. ۇزدىك بەستىكتى 16 رەت التىننان القا تاققان رەسەيلىك سۆەتلانا كولەسنيچەنكو تۇيىندەپ تۇر.

وسىنىڭ الدىنداعى الەمدىك دودا 2019 جىلى وڭتۇستىك كورەيانىڭ كۆاندجۋ قالاسىندا ۇيىمداستىرىلعان ەدى. اتالعان جارىستا قىتاي مەن اقش سپورتشىلارى ابدەن تىرەسىپ، ءبىر التىننىڭ ازدىعىنان امەريكالىقتار باستى قارسىلاستارىنان قالىپ قويدى. قىتايلاردىڭ ءانۇرانى 16 مارتە (11 كۇمىس+ 3 قولا) شىرقالسا، امەريكالىقتار 15 رەت (11 كۇمىس+10 قولا) ءدال سونداي قۇرمەتكە بولەندى. سول سەكىلدى رەسەي (12+11+7)، اۋستراليا (7+9+7) جانە ماجارستاننىڭ (5+0+0) دا قارقىنى قۋانتتى.

كەشە ماجارستاندا اياقتالعان دۇنيەجۇزىلىك دودادا دا باستى باسەكە اقش پەن قىتاي قۇرامالارى اراسىندا ءوربىدى. ەكى كوماندا دا 18 التىنعا يەلىك ەتتى. دەسەك تە كۇمىس پەن قولانى ارتىق العان امەريكالىقتار (18+14+17) جالپى ەسەپتە كوش باستادى. اسپاناستى ەلىنىڭ وكىلدەرى (18+2+8) ەكىنشى ورىندى ەنشىلەدى. ءۇشىنشى ورىندا – يتاليا (9+6+6). ءتورتىنشى جانە بەسىنشى ساتىلارعا اۋستراليا (6+9+4) مەن كانادا (3+5+6) جايعاستى. سونداي-اق جاپونيا (2+8+3)، فرانتسيا (2+7+2)، ۋكراينا (2+6+2)، گەرمانيا (2+5+3) جانە ماجارستان (2+2+1) ۇزدىك وندىقتىڭ قاتارىنا ەندى. بۋداپەشتتە بارلىعى 16 مەملەكەتتىڭ ءانۇرانى شىرقالىپ، 22 ەلدىڭ تۋى كوكتە جەلبىرەدى.

قازاقستاندىق سپورتشىلارعا كەلسەك، ولار بۇعان دەيىنگى دودالاردىڭ ەشبىرىندە جەڭىس تۇعىرىنا كوتەرىلگەن ەمەس. ياعني 1994 جىلدان بەرى ۇيىمداستىرىلعان الەم چەمپيوناتتارىنىڭ بارلىعىنان جۇلدەسىز ورالدى. وكىنىشكە قاراي، ءدال سول جاعداي ماجارستاندا دا قايتالاندى. جالپى، وسى سپورت ءتۇرىنىڭ دامۋىنا ەلىمىزدە قولايلى جاعداي جاسالعان. ءبىزدىڭ ورەندەر وقۋ-جاتتىعۋ جيىندارىن شەتەلدە وتكىزىپ، قالاعان جارىستارىنىڭ بارلىعىنا قاتىسىپ كەلەدى. ولاردىڭ الاتىن ەڭبەكاقىلارى مەن سىيلىقتارى دا جامان ەمەس. بىراق سونىڭ قايتارىمى جوق. «باياعى جارتاس – سول جارتاس...» كۇيىندە. 2014 جىلى ينچحونداعى ازيا ويىندارىندا دميتري بالاندين ءۇش التىن الىپ، 2016 جىلى ريو وليمپياداسىندا جەڭىس تۇعىرىنىڭ ەڭ بيىك ساتىسىنا كوتەرىلگەندە، بارشا قازاقستاندىقتىڭ ەرەك­شە شاتتانعانى ەسىمىزدە. 2018 جىلى دجا­كارتادا الماتىلىق ءجۇزۋشى ءۇش رەت ءۇشىن­شى ورىنعا تابان تىرەدى. مىنە، سۋ سپور­تى­نان ەڭ ۇزدىك ناتيجەلەرىمىز وسى عانا.

سودان بەرگى ۋاقىتتا جەرلەستەرىمىز ءوز جانكۇيەرلەرىن ەلەۋلى تابىستارىمەن قۋانتا الماي ءجۇر. بۇل جاعداي وسى سالانىڭ تىزگىنىن ۇستاپ وتىرعان ازاماتتارعا وي سالۋعا ءتيىس.

سوڭعى جاڭالىقتار

اباي مۇراسى اسقاقتادى

اباي • بۇگىن، 00:04

ۇلتتىق مەرەكە

اباي • بۇگىن، 00:02

ەت ماسەلەسىنە ەپ كەرەك

ەكونوميكا • بۇگىن، 00:01

ۇلت ۇستازى جانە باتپاقتى مەكتەبى

احمەت بايتۇرسىن ۇلى • كەشە

جاۋىنگەر جىر

تانىم • كەشە

تالانت پەن تاعدىر

ونەر • كەشە

شيپالى سۋلار شەجىرەسى

ايماقتار • كەشە

تاڭبالى تانىمى

تانىم • كەشە

تسيرك

ونەر • كەشە

ۇقساس جاڭالىقتار