استانا. 28 ءساۋىر. استانا رەسپۋبليكا بيۋدجەتىنە 2015 جىلدان باستاپ 7,5 ملرد. تەڭگە قارجى اۋدارادى. ال 2016 جىلى بۇل قارجىنىڭ كولەمى 17,3 ملرد. تەڭگەگە دەيىن ۇلعايادى. مەملەكەت باسشىسى نۇرسۇلتان نازارباەۆتىڭ توراعالىعىمەن وتكەن ەلوردانى ودان ءارى دامىتۋ ماسەلەلەرىنە بايلانىستى القالى جيىندا استانا قالاسىنىڭ اكىمى يمانعالي تاسماعامبەتوۆ وسىلاي دەدى. بۇل تۋرالى egemen.kz ءتىلشىسى حابارلادى.
كەڭەستە مەملەكەت باسشىسى الدىمىزدا استانانى حالىقتىڭ ءومىر سۇرۋىنە مەيىلىنشە قولايلى ءارى تارتىمدى قالالاردىڭ قاتارىنا ەنگىزۋ مىندەتى تۇرعانىن, سونداي-اق, ونەركاسىپ ءونىمىنىڭ كولەمى 7 پايىزعا, ياعني, 260 ميلليارد تەڭگەگە كوبەيگەنىن, ەكونوميكا سالسىنا 545 ميلليارد تەڭگە ينۆەستيتسيا سالىنعانىن ايتا كەلە: «شاعىن جانە ورتا بيزنەس دامىپ كەلەدى, ونىڭ ۇلەسى وڭىرلىك جالپى ءونىمنىڭ 40 پايىزىنا جەتتى. ءوزىنىڭ بىرەگەي نىساندارى ارقاسىندا قالا ءىرى مادەني, سپورتتىق, ساۋدا جانە تۋريستىك ورتالىققا اينالدى. مۇندا كەلگەن تۋريستەردىڭ سانى العاش رەت 1 ميلليوننان اسقانى وسىعان دالەل, ولاردىڭ 100 مىڭى شەتەلدىك ازاماتتار», – دەدى.
سونىمەن قاتار, استانادان ەل بيۋدجەتىنە قۇيىلاتىن قارجى كولەمىنىڭ سوڭعى 5 جىلدا ەكى ەسە كوبەيىپ, 60 ميلليارد تەڭگەدەن اسقانىن مالىمدەگەن پرەزيدەنت: «وندىرىلگەن ونىمدەر كولەمىن, اكتيۆتەردىڭ قۇنىن ەسكەرە كەلگەندە, استانا مەملەكەت تاراپىنان جۇمسالعان شىعىندى قازىردىڭ وزىندە اقتادى. ءبىز قازاقستاننىڭ ۇلتتىق بايلىعىنا دامۋىن جالعاستىرىپ جاتقان تۇتاستاي ءبىر قالانى قوستىق», – دەدى.
مەملەكەت باسشىسى ايتقانداي, الەمدە قالالار تۇرلىشە باعالانادى: تۇرمىس ساپاسى, ءومىر سۇرۋگە قاجەتتى جاعداي جانە باسەكەگە قابىلەتتىلىك يندەكسى سەكىلدى ءتۇرل يندەكستەر بار. ءبىز سونداي رەيتينگتىك ولشەمدەردى جاقسارتۋعا ۇمتىلۋعا ءتيىسپىز.
ءوز كەزەگىندە استانا قالاسىنىڭ اكىمى يمانعالي تاسماعامبەتوۆ 2008 جىلدان بەرى مەملەكەت باسشىسى تاراپىنان بەرىلگەن 323 حاتتامالىق تاپسىرمانىڭ 243-ءى ورىندالعانىن, ونىڭ 80-ءى جۇزەگە اسىرىلۋ ۇستىندە ەكەنىن, 38-ءى ۇكىمەتپەن بىرلەسە ىسكە اسىرىلىپ جاتقانىن باياندادى.
قالا اكىمىنىڭ سوزىنە قاراعاندا, 2013 جىلى جالپى, وڭىرلىك ءونىمنىڭ كولەمى 2,7 تريلليون تەڭگەگە جەتكەن. ال ونەركاسىپ ءونىمى 6,7 پايىزعا ارتىپ, 263,2 ملن. تەڭگەنى قۇراعان.
يمانعالي تاسماعامبەتوۆ استانادا شاعىن جانە ورتا بيزنەستىڭ دامۋى جاقسى دەڭگەيگە كوتەرىلگەنىن, بۇل سالا بويىنشا 1 تريلليون 200 مىڭ تەڭگەنىڭ ءونىمى وندىرىلگەنىن ءوز سوزىنە ارقاۋ ەتە وتىرىپ: «كەلەسى جىلدان باستاپ ەلوردا رەسپۋبليكالىق بيۋدجەتكە 7,5 ميلليارد تەڭگە, ال 2016 جىلدان باستاپ 17,3 ميلليارد تەڭگە قارجى اۋداراتىن بولادى. ياعني, استانا قالاسى رەسپۋبليكالىق بيۋدجەتتىڭ دونورى بولىپ سانالاتىن الدىڭعى قاتارلى 4 ءوڭىردىڭ قۇرامىنا كىرەدى», – دەدى.
سونداي-اق, استانا قالاسىنىڭ اكىمى كەڭەستە يندۋستريالىق پاركتىڭ قوسىپ وتىرعان ۇلەسىنە كەڭىنەن توقتالدى. بۇعان قوسا, ول ازىق-ت ۇلىك, الەۋمەتتىك نىساندار, پايدالانىلۋعا بەرىلگەن تۇرعىن ۇيلەر, قالاىشىلىك جولاۋشىلار تاسىمالى, جول جوندەۋ جۇمىستارى, دەمالىس ورىندارى, جاڭادان سالىنعالى وتىرعان قۇرىلىستار جانە ەلورداعا ينۆەستيتسيا تارتۋ ماسەلەلەرىنە قاتىستى جاعداياتتاردى باياندادى.
مەملەكەت باسشىسى جيىن سوڭىندا: «استانا قالاسىنىڭ الدىنا اسا جوعارى مىندەت – 2050 جىلى الەمدەگى ەڭ دامىعان 10 قالانىڭ قۇرامىنا كىرۋ مىندەتى قويىلىپ وتىر», – دەدى.
جولدىباي بازار.
دەرەككوز: egemen.kz.
فوتو: Uvp.kz.
