ايماقتار • 05 شىلدە، 2022

زاڭسىز سالىنعان ءۇي ءسۇرىلدى

18 رەت كورسەتىلدى

الماتى سياقتى اۋاسى اينالمايتىن، تۇرعىندارى تىعىز ورنالاسقان قالادا زاڭسىز بوي كوتەرگەن عيماراتتار مەن تۇرعىن ءۇي ماسەلەسى قاشاندا وزەكتى. اگلومەراتسيا ەسەبىنەن مەگاپوليسكە وتكەن جەر تەلىمدەرىندە، اپاتتى ايماق، سۋعا جاقىن جەرلەردە ءوز بەتىنشە باسپانا سالىپ العاندار ماسەلەسى دە تۇپكىلىكتى شەشىلمەگەنىن جوققا شىعارۋعا بولمايدى. ماسەلەن، الماتىدا قۇرىلىس باسقارماسىنىڭ كەلىسىمىنسىز سوعىلعان 14 مىڭداي قۇرىلىس نىسانى بار.

وتكەن جىلى كۇز كەلىپ جەت­كەنشە، سوتتاردىڭ شەشىمى بو­­يىنشا زاڭسىز سالىنعان 18 نى­سان بۇزىلعان ەدى. سوت تال­قى­لاۋىن­سىز كوشەلەر مەن اۋلا اۋماق­تارى بويىنداعى مەم­لە­كەتتىك قور جەر­لەرىندە ءوز ەركىمەن ورنا­تىلعان 300-گە جۋىق زاڭسىز نىسان قوسا سۇرىلگەن ەدى.

ەندى، مىنە، الماتى قالاسى­نىڭ اكىمى ەربولات دوساەۆتىڭ پارمە­نىمەن تۇرعىنداردان تىنباي تۇسكەن ارىز-شاعىمداردىڭ ناتيجەسىندە «شۇعىلا» شاعىن اۋدا­نىنداعى، بايتەلى باتىر كو­شەسىندە زاڭسىز تۇرعىزىلعان 12 قاباتتى تۇرعىن ءۇيدى بۇزۋ ما­سەلەسى كوتەرىلىپ قانا قويماي، ءسۇرىلىپ تىندى.

اينالىپ كەلگەندە، الما­تى قالالىق سوتىنىڭ شەشىمى­مەن الماتى قالاسىنىڭ قالا قۇ­رىلىسىن باقىلاۋ باسقارماسىنىڭ تالاپ-ارىزى قاناعات­تان­دىرىلىپ، سوت اتالعان نىسان­دى بۇزۋ تۋرالى شەشىم شى­عاردى. عيمارات 1 شىلدەدە سوت ورىن­داۋ­شىلارىنىڭ قاتىسۋىمەن سۇرىلە باستادى.

بۇعان دەيىن قالا قۇرىلىسىن باقىلاۋ باسقارماسى نىساندا تەكسەرۋ جۇرگىزىپ، ساۋلەت، قالا قۇ­رىلىسى جانە قۇرىلىس قىز­­مەتى سالاسىندا بىرقاتار زاڭ بۇزۋ­­شىلىقتى انىقتاعان بولا­­تىن. قۇرىلىس جۇرگىزۋشىگە قاتىس­تى اكىمشىلىك حاتتامالار جاسالىپ، ەسكەرتۋلەردى جويۋ تۋرالى ۇيعارىم شىعارىلدى.

الماتى قالاسىنىڭ مامان­دان­دىرىلعان اۋدانارالىق ەكو­نوميكالىق سوت باسقارماسى دا «Aرت-تەحنوسس» جشس-نا زاڭسىز سالىنعان نىساندى بۇزۋ تۋرالى تالاپ-ارىزىن قوزعاعان بولاتىن. بىراق 2021 جىلعى 9 جەلتوقسانداعى سوت شەشىمىمەن تالاپ-ارىز قاناعاتتاندىرۋسىز قالدىرىلدى. وسىدان كەيىن قالا قۇرىلىسىن باقىلاۋ باسقارماسى الماتى قالالىق سوتىنا اپەل­لياتسيالىق شاعىم ءتۇسىردى: تالاپ-ارىز قاناعاتتاندىرىلدى.

بۇعان دەيىن دە كومپانيا يەسىنە اكىمشىلىك شارا قولدا­نى­­لىپ، وعان وزدىگىنەن دەمونتاج جۇ­مىستارىمەن اينالىسۋ تاپ­سىرىلعان ەدى. الايدا كاسىپ­كەر سوت شەشىمىن ەلەمەگەن. وسى سەبەپتى، بۇگىندە ءماج­بۇرلى تۇردە ءۇي بۇزۋ شارالارى سول كاسىپكەردىڭ ەسەبىنەن جۇرگىزىلىپ جاتىر.

 

الماتى

سوڭعى جاڭالىقتار

2186 ادام كوروناۆيرۋستان جازىلىپ شىقتى

كوروناۆيرۋس • بۇگىن، 09:30

ەلوردا «جاسىل» ايماققا ءوتتى

كوروناۆيرۋس • بۇگىن، 09:13

1/16 فينالعا شىعا المادى

تەننيس • بۇگىن، 08:45

ۇقساس جاڭالىقتار