بيىلعى جارىستىڭ قۇرمەتتى قوناقتارى رەتىندە نۇر-سۇلتان قالاسىنىڭ اكىمى التاي كولگىنوۆ, مادەنيەت جانە سپورت مينيسترلىگى دەنە شىنىقتىرۋ جانە سپورت كوميتەتىنىڭ توراعاسى سامات ەرعاليەۆ, «قازاقتەلەكوم» اق باسقارماسىنىڭ توراعاسى قۋانىشبەك ەسەكەەۆ قۇتتىقتاۋ ءسوز سويلەپ, بالۋاندارعا ساتتىلىك تىلەدى.
ون ءبىرىنشى رەت ۇيىمداستىرىلعان تۋرنيردە جانكۇيەرلەر 2021 جىلعى «قازاقستان بارىسى» داۋرەن نۇرالينوۆ پەن وسى ءتۋرنيردىڭ 2013 جانە 2019 جىلدارعى جەڭىمپازى ايبەك نۇعىماروۆتىڭ ونەرىن تاماشالاي المادى. داۋرەن جاراقاتىنا بايلانىستى بيىلعى دوداعا قاتىسپاسا, ايبەك سپورتتىق جولىن اياقتاعانىن رەسمي تۇردە جاريالادى. تاعى ءبىر ايتا كەتەرلىگى, كەشەگى جارىس بارىسىندا ايبەك نۇعىماروۆقا «الەم بارىسى» ءتۋرنيرىنىڭ باس جۇلدەسى رەسمي تۇردە تابىستالدى. سەبەبى 2019 جىلعى قازاق كۇرەسىنەن وتكەن «الەم بارىسى» ءتۋرنيرىنىڭ فينالىندا ايبەكتى جەڭگەن رەسەيلىك بالۋان رومان بوبيكوۆتىڭ قان سىناماسىنان تىيىم سالىنعان «مەتيلگەكسيمين» پرەپاراتى تابىلعانى بەلگىلى بولدى. ءسويتىپ, جەڭىس اۆتوماتتى تۇردە وتانداسىمىزعا بەرىلدى. Qazaq kuresi اسسوتسياتسياسىنىڭ وكىلى ايبەك نۇعىماروۆقا جانكۇيەرلەردىڭ كوزىنشە التىن بەلبەۋدى قايتارىپ بەردى.
سونداي-اق ۇيىمداستىرۋشىلار جىل سايىن بالۋاندار باسەكەسىن تارتىستى, جانكۇيەرلەرگە قىزىقتى ەتۋ ءۇشىن جارىس ەرەجەسىن جەتىلدىرىپ, وزگەرىستەر ەنگىزىپ وتىراتىنى بەلگىلى. ماسەلەن, الدىڭعى جىلدارى بالۋانداردىڭ كيىمىنە وزگەرىس ەنگىزدى. ياعني كۇرتەشەنىڭ جەڭى قىسقارىپ, شالباردىڭ بالاعىن ۇزارتتى. كەيىننەن ۋاقىت جاعىن ءتيىمدى پايدالانۋ ءۇشىن بەلدەسۋلەر ۋاقىتىن بەس مينۋتتان
4 مينۋتقا قىسقارتتى (بيىل بەلدەسۋ ۋاقىتى قايتادان ۇزارتىلدى). جاڭا بوزكىلەم توسەلگەن سوڭ بالۋاندار بىلتىردان باستاپ جالاڭاياق كۇرەسەتىن بولدى. ال بيىلدان باستاپ «بۇك» ۇپايى جارىس ەرەجەسىنەن الىنىپ تاستالدى. ياعني بۇعان دەيىن بالۋان ءادىس جاساعاندا قارسىلاسىنىڭ تىزەسى جەرگە ءتيىپ كەتكەندە – «بۇك» ۇپايى بەرىلەتىن. سونداي-اق بۇرىنعى ەرەجە بويىنشا 3 «بۇك» ۇپايى ءبىر جامباس ۇپايىنا تەڭ بولاتىن. ەندى بيىلدان باستاپ بالۋاندار «بۇك» ۇپايىنسىز بەلدەستى. بۇل وزگەرىستەر ءتۋرنيردىڭ كورىگىن قىزدىرماسا, ەش كەمىتكەن جوق.
بۇلا كۇشى بويىنا سىيماي تۇرعان 36 بالۋان ء«ا» دەگەننەن تارتىستى بەلدەسۋىمەن «بارىس ارەنا» سپورت كەشەنىنە جينالعان جانە تەلەديدار ارقىلى تاماشالاعان مىڭداعان جانكۇيەردىڭ دەلەبەسىن قوزدىردى. سايدىڭ تاسىنداي ىرىكتەلگەن كىل مىقتى بالۋاندار جينالعان بيىلعى جارىستا مىنا بالۋان جەڭىمپاز اتانادى دەگەن ناقتى ءبىر فاۆوريت جوق ەدى. ال شيرەك فينال باسەكەلەرىنەن كەيىن بيىل جاڭا «بارىستىڭ» ەسىمى انىقتالاتىنى بەلگىلى بولدى. سەبەبى وسىعان دەيىنگى جارىستاردا جەڭىس تۇعىرىنان كورىنگەن مۇحيت تۇرسىنوۆ, ەلامان ەرعاليەۆ, «اسكەر بارىسى» اتانعان ەراسىل قاجىباەۆ سەكىلدى ءاپايتوس بالۋاندار شيرەك فينالدان ارىگە اسا العان جوق.
ءسويتىپ, ءبىرىنشى جارتىلاي فينالدا بىلتىرعى كۇمىس جۇلدەگەر عالىمجان قىرىقباي مەن ماقسات يساعابىلوۆ بەلدەستى. بۇل باسەكەدە كوپشىلىك جامبىل وبلىسىنان كەلگەن بالۋاننىڭ جەڭىسىنە سەنىمدى بولعان. الايدا كەزدەسۋ قىزىلوردالىق بالۋاننىڭ جەڭىسىمەن اياقتالدى. ەكىنشى جارتىلاي فينالدا 2017 جىلعى «بارىس» ەلامان ەرعاليەۆتى جارىس جولىنان ىعىستىرعان شىمكەنتتىك ءنۇرسات تەمىرحان ماڭعىستاۋلىق نۇرداۋلەت جارىلعاپوۆتان ايلاسىن اسىرا المادى.
سونىمەن قازاق كۇرەسىنەن ەڭ مىقتى بالۋاندى انىقتايتىن سəت تە كەلىپ جەتتى. التى ساعاتقا سوزىلعان ايتۋلى باسەكەنىڭ فينالىنا تۋرنيردە ءبىر دەممەن كۇرەسىپ, ءوزىنىڭ ناعىز سپورتتىق بابىندا ەكەنىن تانىتقان ماقسات يساعابىلوۆ پەن نۇرداۋلەت جارىلعاپوۆ شىقتى. بۇعان دەيىنگى جارىستاردا بىردە-ءبىر رەت فينالعا شىقپاعان ەكى بالۋاننىڭ اراسىنداعى فينالدىق بەلدەسۋ نەبارى ەكى-اق مينۋتقا سوزىلدى. العاشقى مينۋتتاردا ەكى بالۋان دا ءبىر-ءبىرىن اڭدىسىپ, ءادىس جاساۋعا باتا الماي ءجۇردى. الايدا بەلدەسۋدىڭ ەكىنشى مينۋتى اياقتالار تۇستا قىزىلوردالىق بالۋان ءبىرىنشى بولىپ ءادىس جاساپ, قارسىلاسىن تازا جەڭىسپەن قاپى قالدىرىپ كەتتى. ءسويتىپ, ماقسات يساعابىلوۆ «قازاقستان بارىسى» ءتۋرنيرىنىڭ سەگىزىنشى جەڭىمپازى اتاندى. سونداي-اق «بارىستا» باعى جانعان ءۇشىنشى قىزىلوردالىق بالۋان رەتىندە تاريحتا قالدى. بۇعان دەيىن سىر ەلىنىڭ بالۋاندارىنان 2011 جىلى ۇلان رىسقۇل جانە 2017 جىلى ەلامان ەرعاليەۆ توپ جارعان بولاتىن.
ءۇشىنشى ورىن ءۇشىن ءنۇرسات تەمىرحان مەن عالىمجان قىرىقباي بەلدەسۋگە ءتيىس ەدى. الايدا ن.تەمىرحان جاراقاتىنا بايلانىستى بوزكىلەمگە شىعۋدان باس تارتىپ, قولا جۇلدە ع.قىرىقبايعا بۇيىردى.
تۋرنير قورىتىن دىسى بويىنشا, 2022 جىلعى «قازاقستان بارىسى» اتانعان ماقسات يساعابىلوۆتىڭ بەلىنە «التىن بەلبەۋدى» پرەمەر-ءمينيستردىڭ ورىنباسارى ەرالى توعجانوۆ بايلادى. سونىمەن قاتار قىزىلوردالىق بالۋانعا اۋىسپالى «التىن تايتۇياق» پەن 25 ملن تەڭگەنىڭ سەرتيفيكاتى تابىس ەتىلدى. بۇدان بولەك, تۋرنيردە كۇمىس جۇلدەگەر اتانعان نۇرداۋلەت جارىلعاپوۆقا «كۇمىس بەلبەۋ» مەن 5,5 ملن تەڭگە سىيلىق تاپسىرىلدى. ال ءۇشىنشى ورىن يەلەنگەن عالىمجان قىرىقبايعا 1,8 ملن تەڭگە جانە «قولا بەلبەۋ» تاپسىرىلدى.
