كوكپەكتىنى كوتەرگەن كومەك

ءومىر بولعان سوڭ توسىن وقيعالار, ايتىپ كەلمەس اپاتتار ورىن الماي تۇرمايتىندىعى بەلگىلى جايت دەسەك تە, الايدا, سولاردىڭ ءبىرازى ادامدار ءوزىنىڭ ساقتىققا سالعىرتتىق سالدارىنان ۇشىراۋى دا شىندىق. وتكەن ايدا كوكپەكتى اۋىلى ىرگەسىندەگى وزەندەگى بوگەتتىڭ سۋ جىبەرىپ تۇراتىن شليۋزدەرىنەن ساڭىلاۋ تابىلماي اسىپ توگىلگەن تاسقىن ۇيلەردى باسىپ, مال-جان شىعىنىنا دا تاپ ەتۋى سونىڭ ءبىرى ەدى. تاۋبە دەيسىڭ, دەر كەزىندە جەتكەن كومەك ارقاسىندا بولجاۋسىز قاتەر بەتى تەز قايتتى. «ەل قادىرىن كورگەن بىلەدى» دەگەندەي, سوندا زارداپ شەگۋشىلەر بۇل كۇندە بارشا جۇرتتىڭ جۇمىلعان قامقورلىق شاپاعاتىن جاقسى بىلەدى. ارقايسىسى تۇرمىسىنداعى قيىن كەزدە اۋىرتپالىقتى بىرگە كوتەرىپ, بىرگە جەڭىلدەتۋگە ءوز ايماقتارىنان باستاپ, باسقا دا وڭىرلەردىڭ قول­داۋعا كەلۋىنە العىستارى شەكسىز. ابدىراعان شاقتارىندا الدىمەن قاستارىنان تابىلعان قاراعاندىداعى مەكەمەلەر مەن جوعارى وقۋ ورىندارى جاساقتارى اۋلالاردى, كوشەلەردى تازالاۋعا قولقانات كورسەتسە, ىلە استانادان, تارازدان, شىعىس قازاق­ستاننىڭ كوكپەكتى اۋدانىنان كەلىپ جەتكەن كومەككە قوسىلۋشىلار ءالى دە جالعاسىپ اۋىلدىڭ دا, تۇر­عىندارىنىڭ دا كوڭىلىن ءوسىرىپ, شىرايىن كىرگىزىپ وتىر. «كوپ تۇكىرسە كول» دەگەن وسى. جان-جاقتان جۇمىلدىرىلعان كۇش پەن تەحنيكانىڭ ىلكىمدى جۇمىسىنىڭ ارقاسىندا قىسقا مەرزىمدە 944 اۋلا تازارتىلىپ, 6300 توننا كۇل-قوقىستان ارىلعان اۋىل قازىر تاپ-تازا. اپاتتى دەپ تانىلعان جانە بۇزىلۋعا ءتيىستى 51 ءۇيدىڭ ورنىن جاڭالارى باساتىن ۋاقىت تا الىس ەمەس. ال مۇنىمەن بىرگە 157 ءۇي مەن 5 دۇكەننىڭ كۇردەلى جوندەۋدەن وتكىزىلەتىندىگى كوكپەكتىنىڭ كوركىن وزگەرتكەلى تۇر. جەر اياعى كەڭەيگەن بەتتە باستالعان قۇرىلىس ىستەرى كۇننەن-كۇنگە قاناتىن جايىپ كەلەدى. جاعدايدى قالپىنا كەلتىرىپ, جاقسارتۋعا ارنالعان قات-قابات ءىس-شارالاردىڭ ىشىندە, ەڭ باس­تىسى, قيىندىق قاتتى باتۋشى تۇرعىنداردى الەۋمەتتىك قولداۋ نەگىزگى نازاردا. باسپانالارىن سۋ شايىپ, جاتاقحانالارعا ورنالاستىرىلعان 14 وتباسى ازىرگە ەشتەڭەگە الاڭ­داۋ­سىز بولسا, بالعىن جاستاعى با­لا­لى 7 شاڭىراق قاراعاندىعا قونىس­تاندىرىلدى. تاعى 11-ءى تۇر­مىسقا قولايلى مەكەنجايلاردان ورىن تەپپەك. كوكپەكتىلىكتەردىڭ قاي-قايسى­­­سىنا دا اسىرەسە, زەينەتكەرلەرگە, مۇگەدەكتەرگە, كوپبالالى جانە جال­عىزىلىكتى انالارعا قامقورلىق قۇشاعى كەڭ. 337 وتباسىعا كورسەتىلگەن گۋما­نيتارلىق كومەك سونىڭ ءبىر پاراسى. ەشكىمدى ەسكەرۋسىز ەتپەۋگە دەگەن شى­نايى ىقىلاستان جەرگىلىكتى ستۋدەنتتەر دە قالىس قالماعان. ولاردىڭ 11-ءنىڭ وقۋ ءۇشىن تولەماقىسى وتەلدى. اۋىلعا قوعامدىق قايىرىمدىلىق قورىنا اۋدارىلعان 245 ميلليون تەڭگە ارناۋلى كوميسسيانىڭ شەشىمى بويىنشا ب ۇلىنگەن تۇرمىستىق تەح­نيكالارى مەن م ۇلىكتەردىڭ جا­ڭالارى ساتىپ الىنۋىنا, باسقا دا مۇقتاجدىقتار وتەلۋىنە جۇمسالۋدا. تۇرعىنداردى, سونداي-اق, شىعىنعا ۇشىراعان مالدارىنىڭ ورنى تولتىرىلۋى دا ريزا ەتتى. بۇل رەتتە سو­ناۋ التايدان جاڭا تولدەگەن 300 تۇساقتى قوزىلارىمەن قوسا تيەپ الىپ كەلىپ, قولدارىنا تابىس ەتكەن اۋدان فەرمەرلەرىنىڭ مارتتىگى بۇگىندە ارقايسىسىنىڭ اۋزىندا. قو­راسىندا سۋعا تۇنشىققان 8 قوي باسى تۇگەندەلگەن قويكەن قاسەنوۆا سياق­­تىلى ءبارى الدارىنا قايتا مال ءبىتتى. ايتا بەرسە, كومەك تۇرلەرى كوپ. ءبارىن اتاما­عاندا وسىنىڭ ءوزى-اق, ەل ىنتىماعىن, جۇرت ءبىر-بىرىنە تىلەۋلەستىگىن, قىسىلشاڭ شاقتا قول­داۋعا دايىندىعىن ايقىن تانىتۋى انىق. كوكپەكتىنىڭ تەز ارادا ەڭسەسىن كوتەرىپ, بوي تىكتەۋىنە ەلدىگىمىزدىڭ وسىناۋ ءبىر تاماشا قاسيەتتى شۋاعى تيسە, سونىمەن بىرگە, ءوڭىر باسشىلارىنىڭ سوعان ۇيىستىرىپ, جاعدايدى ۋاقىت اسىرماي تۇزەۋگە ۇيلەستىرە ءبىلۋى دە اتاپ وتەرلىك جايت. وسى ءىس-شارالار باسىنان تىكەلەي قاداعالاۋىنداعى وبلىس اكىمى باۋىرجان ابدىشەۆ ونى كۇن ارالاتپاي كورىپ, مىندەتتەردى نىقتاپ تا, مىقتاپ تا جۇرۋىنە كوكپەكتىلىكتەر ءىلتيپاتى بولەكتىگى اۋىل تۇرعىن­دارىمەن كەزەكتى كەزدەسۋىنەن ءبى­لىندى. «ەلباسى اۋىلدارىڭىزداعى جاعدايدى باقىلاۋدا ۇستاپ وتىر. تاپسىرماعا سايكەس كۇز سوڭىنا قاراي احۋال تولىق وڭالادى. ۇيلەردى كۇردەلى جوندەۋگە جانە سالۋعا وبلىس اكىمى رەزەرۆىنەن بولىنگەن قارجى مول. بۇل ماقساتتاعى قازىرگى قارقىندى باسەڭدەتپەۋمەن قاتار بارلىق ينفراقۇرىلىمدى قالپىنا كەلتىرۋ جۇمىستارىنىڭ بەلگىلەنگەن شارالارعا سايكەس تىڭعىلىقتى اتقارىلۋىنا وزدەرىڭىزگە بايان ەتىل­گەندەي الەۋەت تە, مۇمكىندىك تە بار. تالاپ پەن ءتارتىپ بارىمىزگە ورتاق. ماسەلەلەردى وسىلايشا بىرلەسىپ شەشىپ, ورىندايمىز», دەدى ول. بۇل جولى دا اۋىلدىڭ تايلى-تاياعى قالماي قاتىسقان جيىندا ءوتىنىش-تىلەكتەر از ايتىلماي, كوڭىلدى مازالاعان سۇراقتار جاۋدى. بارىنە جان-جاقتى جاۋاپ قايتارىلىپ, كومەك تۇرلەرى قالاي كورسەتىلەتىنى, قالپىنا كەلتىرۋ جۇمىستارىنىڭ قالاي جۇرگىزىلەتىندىگى, كىمدەر, قاي ۇيىمدار جاۋاپ­تى ەكەنى ءتۇسىندىرىلدى. وبلىس اكىمىنىڭ ۇدايى ورتالا­رىندا بولىپ, باسشى عانا ەمەس, ادا­مي تۇرعىداعى شىنايى جان­­ا­ش­ىر­­­لىق, قامقورلىق كوڭىلىنە ريزا بول­عان جۇرت ەمەن-جارقىن ءاڭ­گىمەلەستى. جيىنعا قاتىسۋشىلار اتىنان ارداگەرلەر كەڭەسىنىڭ ءتور­ايىمى نادەجدا بۋلىبينا, اۋىل اقساقالدارى جەتپىسباي قۇنانوۆ, باراق كەندىبەكوۆ قيىن جاعدايدا بۇكىل ەل قاۋى­مىنىڭ قولۇشىن سوزىپ, تىعىرىق زاردابىن جە­ڭىلدەتۋگە مەيىر شۋاعىن بارىنشا توككەن وتان­داس­تارىنا اق العىستارىن ارناپ, جەتكىزۋدى تىلەك ەتتى. ايقىن نەسىپباي, «ەگەمەن قازاقستان». قاراعاندى وبلىسى, بۇقار جىراۋ اۋدانى.