قازاق دەتەكتيۆىنىڭ ءىزاشارى

اپتا باسىندا الماتى قالاسىندا قازاقستان جازۋشىلار وداعىنىڭ ادەبيەتشىلەر ۇيىندە جازۋشى, قازاق دەتەكتيۆ جانرىنىڭ نەگىزىن قالاۋشى, ۇلى وتان سوعىسىنىڭ ارداگەرى كەمەل توقاەۆتىڭ 90 جىلدىعىنا ارنالعان سالتاناتتى جيىن ءوتتى. جيىندى قازاقستان جازۋشىلار وداعى باسقارماسىنىڭ توراعاسى, سەناتور نۇرلان ورازالين ءسوز سويلەپ اشتى. «قازاقتىڭ دارىندى قالامگەرى كەمەل توقاەۆ سول كەزەڭدەردە ادەبيەت الەمىنە توسىنداۋ بولىپ كورىنگەن دەتەكتيۆ جانرىنىڭ ىرگەسى بەكي تۇسۋىنە بار كۇش-جىگەرىن جۇمساپ, وسىناۋ تىڭ باعىتتىڭ ساپاسىن اسا جوعارى دەڭگەيگە شىعاردى. جانە سول بيىكتەن ەشبىر الاسارماي, جازۋشىلىق كاسىبىنە كولەڭكە تۇسىرمەي, جاۋاپكەرشىلىك جۇگىن ابىرويمەن كوتەرىپ, وسكەلەڭ ۇرپاققا شىنايى شەبەرلىك ۇلگىسىن كورسەتتى», دەدى توراعا. سونداي-اق, وداق باسشىسى جازۋشىنىڭ ۇلى, پارلامەنت سەناتىنىڭ توراعاسى قاسىم-جومارت توقاەۆتىڭ كوپشىلىك قاۋىمعا ارناعان جۇرەكجاردى لەبىزىن جەتكىزدى. كەشكە ارنايى قاتىسقان الماتى قالالىق ءماسليحاتىنىڭ حاتشىسى تولەۋبەك مۇقاشەۆ كەمەل توقاەۆ شىعارماشىلىعى مەن ازاماتتىعى جايلى سىندارلى پىكىرىن ايتا كەلە, ومىردەن وتكەن قالامگەرلەردى ءاردايىم ەسكە الىپ, ولاردىڭ جارقىن ءومىرى مەن شىعارماشىلىعىن قوعام جادىنان شىعارماي, جاس بۋىنعا ناسيحاتتاپ وتىرۋدى داستۇرگە ەنگىزگەن قازاقستان جازۋشىلار وداعىنا العىس سەزىمىن ءبىلدىردى. سالتاناتتى جيىندا حالىقارالىق «الاش» سىيلىعىنىڭ لاۋرەاتى, «قازاق» گازەتىنىڭ باس رەداكتورى قوعاباي سارسەكەەۆ قالامگەر شىعارماشىلىعى جايلى كەڭ اۋقىمدا بايانداما جاسادى. بەلگىلى قالامگەرلەر بەكسۇلتان نۇرجەكە ۇلى مەن احمەتجان اشيري شىتىرمان وقيعالى جانر شەبەرى تۋرالى ءوز ەستەلىكتەرىن ورتاعا سالدى. سونداي-اق, سەيفوللا وسپانوۆ, رافاەل نيازبەكوۆ, ءشومىشباي ساريەۆ سىندى كورنەكتى اقىندار كەمەل توقاەۆقا ارنالعان ولەڭدەرىن وقىدى. قازاق ادەبيەتىنىڭ جارقىن وكىلى, قالامگەر كەمەل توقاەۆ ءوز كەزىندە قازاقستان جازۋشىلار وداعى مەن قازاق كسر ىشكى ىستەر مينيسترلىگى جاريالاعان ادەبي بايگەلەردە بىرنەشە مارتە لاۋرەات اتاندى. جازۋشى قالامىنان ءار كەزەڭدەردە «سارعابانداعى وقيعا», «تاڭبالى التىن», «ارناۋلى تاپسىرما», «سولدات سوعىسقا كەتتى», «سوڭعى سوققى», «ۇياسىنان بەزگەن قۇس» سىندى ونداعان شىعارمالار جارىققا كەلدى. جازۋشىنىڭ 90 جىلدىق مەرەيلى ەسكە الۋ كەشىندە قۇرمانعازى اتىنداعى قازاقتىڭ مەملەكەتتىك اكادەميالىق ۇلت اسپاپتار وركەسترى ونەر كورسەتتى. سونىمەن بىرگە, قازاق ەستراداسىنىڭ ونەر جۇلدىزدارى نۇرعالي ءنۇسىپجانوۆ, تالعات كۇزەمباەۆ, رامازان ستامعازيەۆ, باعدات سامەدينوۆا جانە باسقالارى اۋەلەگەن انىمەن سالتاناتقا جينالعان قاۋىمدى اسەرلى سەزىمگە بولەدى. قانات ەسكەندىر, «ەگەمەن قازاقستان». الماتى.