قۇجات مەملەكەتتىك باسقارۋدى تسيفرلىق ترانسفورماتسيالاۋ, ەلەكتروندى قۇجاتتاردى قولدانۋ اياسىن كەڭەيتۋ جانە دەرەكتەردى باسقارۋ جۇيەسىن ينستيتۋتسيوناليزاتسيالاۋ ماقساتىندا ازىرلەندى.
زاڭ ودان ءارى تسيفرلاندىرۋ جانە رەينجينيرينگ ارقىلى مەملەكەتتىك باسقارۋدى جەتىلدىرۋگە, سونداي-اق تسيفرلىق قۇجاتتار سەرۆيسىن قولدانۋ اياسىن كەڭەيتۋگە, ەلەكتروندى قۇجاتتاردىڭ ولاردىڭ قاعازداعى ۇقساستىقتارىمەن تەڭ دارەجەلەلىگىن قامتاماسىز ەتۋگە باعىتتالعان.
سەناتتىڭ ەكونوميكالىق ساياسات, يننوۆاتسيالىق دامۋ جانە كاسىپكەرلىك كوميتەتىنىڭ اقپاراتىنا سايكەس, ازاماتتىق حال اكتىلەرىن مەملەكەتتىك تىركەۋ سالاسىندا كۋالىكتەردى ەلەكتروندى فورماتقا كوشىرۋ بولىگىندە بىرقاتار وزگەرىستەر مەن تولىقتىرۋلار ەنگىزىلەدى. ماسەلەن, ازاماتتىق حال اكتىلەرىن مەملەكەتتىك تىركەۋ تۋرالى كۋالىك, انىقتاما قاعاز نۇسقادا, سونداي-اق ەلەكتروندى تسيفرلىق قولتاڭبا ارقىلى كۋالاندىرىلاتىن ەلەكتروندىق نىساندا بەرىلەتىن بولادى.
«بايلانىس تۋرالى» زاڭ اياسىندا بايلانىس وپەراتورى قازاقستان رەسپۋبليكاسىنىڭ راديوجيىلىك سپەكترىن پايدالانۋعا ارنالعان رۇقساتتا كورسەتىلگەن ەلدى مەكەندەر مەن اۋماقتاردى كورسەتىلەتىن بايلانىس قىزمەتتەرىمەن قامتاماسىز ەتۋ جونىندەگى مىندەتتەمەلەردى ورىنداماعانى, سونداي-اق راديوجيىلىك سپەكترىن ءبىر جىل ىشىندە پايدالانباعانى ءۇشىن اكىمشىلىك جاۋاپتىلىق ەنگىزىلەدى.
ماجىلىستە زاڭ جوباسىمەن جۇمىس جۇرگىزۋ بارىسىندا بىرقاتار تۇزەتۋلەر قابىلداندى. ماسەلەن, «القابيلەر تۋرالى» زاڭعا القابيلەرگە كانديداتتاردىڭ بىرىڭعاي ءتىزىمىن قالىپتاستىرۋ ءتارتىبىن رەگلامەنتتەيتىن نورمالار ەنگىزىلدى.
«قابىلدانعان زاڭ باسقارۋشىلىق شەشىمدەر قابىلداۋ كەزىندە يننوۆاتسيالىق تسيفرلىق تەحنولوگيالاردى قولدانۋ اياسىن كەڭەيتۋ ءۇشىن زاڭنامالىق جاعداي جاساۋعا باعىتتالعان. سونىمەن قاتار زاڭ اياسىندا اۋىلداردا بايلانىس ساپاسىن جاقسارتۋ جانە مەملەكەتتىك قىزمەتتەردى الۋ كەزىندەگى ازاماتتار مەن بيزنەستىڭ شىعىندارىن تومەندەتۋ كوزدەلىپ وتىر», دەدى سەنات توراعاسى ماۋلەن اشىمباەۆ.
