جول. كولىك. جۇك

كولىك جانە كوممۋنيكاتسيا مينيسترلىگى 2016 جىلعا دەيىن كولىك سالاسىن دامىتۋ جوسپارىن بەكىتتى. اتالعان جوسپار 2014 جىلعى  ەلىمىزدىڭ الەۋمەتتىك-ەكونوميكالىق ساياساتىنىڭ ءبىرىنشى كەزەكتى ءىس-شارالارى جول كارتاسىن ىسكە اسىرۋ اياسىندا جاسالعان. وعان ءترانزيتتى ۇلعايتۋ, ينۆەستيتسيالار مەن جاڭا تەحنولوگيالاردى تارتۋعا باعىتتالعان 70 ءىس-شارا كىرگەن. بۇل جايىندا كەشە پرەزيدەنت جانىنداعى ورتالىق كوممۋنيكاتسيالار قىزمەتىندە وتكەن ءداستۇرلى بريفينگتە كولىك جانە كوممۋنيكاتسيا مينيسترلىگى  كولىكتىك باقىلاۋ كوميتەتىنىڭ توراعاسى اسەت اساۆباەۆ ايتتى. «كولىك جانە لوگيستيكالىق ينفرا­قۇرىلىمدى ءارتاراپتاندىرۋ ماقساتىندا مينيسترلىك ناقتى ءىس-شارالار كەشەنىن جوس­پارلادى. ونىڭ نەگىزگى باعىتتارىنا مەملەكەت جەكەمەنشىك سەرىكتەستىگى تەتىگىن پايدالانىپ, شەتەلدىك ينۆەستيتسيالاردى تارتۋ جانە بىرىككەن ۇيىمدار  قۇرۋ ارقىلى اقتاۋ تەڭىز پورتىندا 3 قۇرعاق جۇك تەرمينالدارىن سالۋ, «قورعاس – شىعىس جولدارى» ارنايى ەكونوميكالىق ايماعى  «جەزقازعان – بەينەۋ» تەمىرجول جەلىسىندە قوزعالىستى اشۋ كىرەدى», دەدى كولىكتىك باقىلاۋ كوميتەتىنىڭ توراعاسى. قازىرگى تاڭدا مينيسترلىك پورتتى سولتۇستىك باعىتقا قاراي كەڭەيتۋ جۇ­مىستارىن جۇرگىزۋدە. اسەت اساۆباەۆتىڭ اي­تۋىنشا, پورتتىڭ كەڭەيتىلۋى ونىڭ وتكى­زىلىم مۇمكىندىگىن, قۇرعاق جۇكتى اۋىستىرىپ تيەۋدى جىلىنا 2,5 ملن. تونناعا كوبەيتپەك.   سونداي-اق, جوسپار بويىنشا «قورعاس – شىعىس جولدارى» اەا ايماعىندا قۇرعاق پورت قۇرىلىسىن قامتاماسىز ەتۋ شارالارى دا قاراستىرىلعان. «جەتىگەن – قورعاس» تەمىرجولى مەن «باتىس ەۋروپا – باتىس قىتاي» ءدالىزى الەۋەتتەرىن پايدالانىپ, قۇرعاق پورت سالۋ ءىرى لوگيستيكالىق حاب قالىپتاستىرۋعا جاعداي جاساماق. اۆتوموبيل, تەمىرجول جانە اۋە ينفراقۇرىلىمىمەن بايلانىستى كونتەينەرلىك, جۇك جانە قويما قىزمەتتەرىنىڭ ينتەگراتسياسى ازيادان باتىس ەۋروپاعا, تمد جانە شىعىس باعىتىنا جۇكتەردى تاسىمالدايتىن كليەنتتەرگە ءبىر جەردە لوگيستيكالىق قىزمەت كورسەتۋگە مۇمكىندىك بەرمەك.  پورتتىڭ قۇرىلىسى 2014 جىلدىڭ شىلدەسىندە باستالادى. سونىمەن قاتار, «جەزقازعان – بەينەۋ» تەمىر جول جەلىسىندە قوزعالىستى اشۋ جوسپارلانعان. 2013 جىلى «جەزقازعان – بەينەۋ» جانە «ارقالىق – شۇباركول» تەمىرجولدارىنىڭ باس باعىتتارىن ءتۇيىستىرۋ ىسكە اسىرىلعان. اتالعان ۋچاسكەلەردە قۇرىلىستىڭ جال­عاستىرىلىپ جاتقانىنا بايلانىستى, ستانسالار مەن رازەزدەردەگى ينفراقۇرىلىم نىساندارىن جانە الەۋمەتتىك-تۇرمىستىق عيماراتتار سالۋعا 10 مىڭنان استام ادام جۇمىلدىرۋ كوزدەلگەن. ءابدىراحمان قىدىربەك, «ەگەمەن قازاقستان».