سەناتور ەرىك سۇلتانوۆ زاڭ جوباسىندا قارىز شارتىندا بەلگىلەنگەن مەرزىمدە مەملەكەتتىك سىرتقى قارىز قاراجاتىن يگەرمەگەنى ءۇشىن اكىمشىلىك جاۋاپكەرشىلىك ەنگىزۋ كوزدەلگەنىن حابارلادى.
«بۇل جاۋاپكەرشىلىك بيۋدجەتتىك باعدارلامانىڭ ءبىرىنشى باسشىسىنا جۇكتەلەدى. بۇل تۇزەتۋلەر بيۋدجەت زاڭناماسىنىڭ جاۋاپكەرشىلىگىن كۇشەيتۋگە, سونداي-اق رەسپۋبليكالىق بيۋدجەتتى ءتيىمدى پايدالانۋعا باعىتتالعان». دەد قر پارلامەنتى سەناتىنىڭ دەپۋتاتى ەرىك سۇلتانوۆ.
سەناتور سۇلتانبەك ماكەجانوۆ تۇزەتۋ قاجەتتىلىگىن دالەلدەي وتىرىپ, اۋديتورلىق ءىس-شارالاردى جۇرگىزۋ بارىسىندا جىل سايىن ءتيىمسىز جوسپارلاۋ مەن بيۋدجەت قاراجاتىن پايدالانباۋدىڭ كوپتەگەن فاكتىلەرى انىقتالاتىنىن حابارلادى.
«2019 جىلى الەۋمەتتىك-ەكونوميكالىق مىندەتتەردى شەشۋگە بولىنگەن بيۋدجەت قاراجاتىن ءتيىمسىز جوسپارلاۋ مەن پايدالانۋ سوماسى 1 ترلن 400 ملرد تەڭگەنى, 2020 جىلى - 1 ترلن 773 ملرد تەڭگەنى, ال 2021 جىلى - 340 ملرد تەڭگەنى قۇرادى. بۇل تومەندەۋ 2021 جىلى مەملەكەتتىك اۋديتپەن قامتىلعان قاراجات كولەمىنىڭ جەتى ەسە ازايۋىمەن تۇسىندىرىلەدى. تارتىلاتىن سىرتقى قارىزداردى پايدالانۋدىڭ تيىمدىلىگىنە قاتىستى ماسەلەلەر دە بار. بۇگىنگى تاڭدا ۇكىمەتتىڭ سىرتقى قارىزدارىنىڭ جالپى سوماسى 21,4 ملرد دوللاردى قۇرايدى. ونىڭ ىشىندە 775 ملن دوللار سوماسىنداعى قارىزدار جويىلدى, 4,6 ملرد دوللار سوماسىنداعى 11 جوبانى ىسكە اسىرۋ مەرزىمى ۇزارتىلدى», دەدى سۇلتانبەك ماكەجانوۆ.
زاڭ جوباسىندا سونداي-اق بايلانىس وپەراتورلارىنىڭ ساپا ستاندارتتارىنا, تەحنيكالىق نورمالارعا جانە بايلانىس قىزمەتتەرى ساپاسىنىڭ كورسەتكىشتەرىنە سايكەس كەلمەيتىن پايدالانۋشىلارعا بايلانىس قىزمەتتەرىن كورسەتكەنى ءۇشىن جاۋاپكەرشىلىگىن كۇشەيتۋ كوزدەلەدى.
بۇل شارا ساندىق تەڭسىزدىكتى جويۋعا, عالامتورعا بارىنشا قول جەتكىزۋدى جانە ساپالى بايلانىستى قامتاماسىز ەتۋگە كومەكتەسەدى.
سونداي-اق, قۇجاتتا كولىك قۇرالىن مەملەكەتتىك ءنومىرسىز نەمەسە جالعان مەملەكەتتىك ءنومىر بەلگىسىمەن باسقارعانى ءۇشىن جاۋاپكەرشىلىك كۇشەيتىلەدى.
بۇدان باسقا, جوعارى نەمەسە جوعارى وقۋ ورنىنان كەيىنگى وقۋ ورىندارى قۇرىلتايشىلارىنىڭ وقۋدى جالعاستىرۋ ءۇشىن ءبىلىم الۋشىلاردى اۋىستىرۋدى قامتاماسىز ەتپەگەنى جانە ليتسەنزيادان ايىرىلعان نەمەسە ونىڭ قولدانىلۋى توقتاتىلعان, سونداي-اق جوعارى وقۋ ورنى تاراتىلعان جاعدايدا ولاردىڭ جەكە ىستەرىن باسقا جوعارى نەمەسە جوعارى وقۋ ورنىنان كەيىنگى وقۋ ورىندارىنا بەرگەنى ءۇشىن اكىمشىلىك جاۋاپتىلىعى بەلگىلەنەدى.
بۇل شارا, ەڭ الدىمەن, ءبىلىم الۋشىلاردىڭ قۇقىقتارى مەن مۇددەلەرىن قورعاۋعا ىقپال ەتەدى.
