پرەزيدەنت قازاقستان پوليتسياسىنىڭ 30 جىلدىعىنا ارنالعان جيىنعا قاتىستى

پرەزيدەنت ازاماتتاردىڭ بارىنە تەڭ مۇمكىندىك بەرەتىن قوعام قۇرۋ، سونىڭ ىشىندە ايەلدەر مەن بالالاردىڭ قۇقىعىن قورعاۋ باستى مىندەت ەكەنىن اتاپ ءوتتى.

– تاعى ءبىر ماڭىزدى مىندەت – ايەلدەر مەن بالالاردى زورلىق-زومبىلىقتان قورعاۋ.  مينيسترلىكتە وسىنداي ىستەردى تەرگەۋمەن اينالىساتىن ارناۋلى ءبولىم قايتا اشىلدى. مەنىڭ تاپسىرمام بويىنشا بيىل ايەلدەر مەن بالالارعا كەشەندى قولداۋ كورسەتەتىن ورتالىقتار قۇرىلدى. بۇل ورتالىقتار قازىر پيلوتتىق رەجيمدە جۇمىس جاساپ تۇر. وندا پسيحولوگيالىق، قۇقىقتىق جانە مەديتسينالىق كومەك كورسەتىلەدى. سونداي-اق ءتيىستى ساراپتامالار جاسالادى. ارنايى دايارلىقتان وتكەن تەرگەۋشى ايەلدەر زارداپ شەككەن جاندارعا جاردەم بەرەدى. جالپى بۇل ورتالىقتار ءتيىمدى جۇمىس ىستەپ جاتىر. مۇنداي ورتالىقتاردى بۇكىل ەل اۋماعىندا اشىپ، اۋقىمىن كەڭەيتۋ كەرەك. ۇكىمەتكە جانە اكىمدەرگە وسى جۇمىستى قولعا الۋدى تاپسىرامىن، – دەدى قاسىم-جومارت توقاەۆ.

قاسىم-جومارت توقاەۆ پوليتسيا قىزمەتىنىڭ كوبىنەسە ادام ءومىرى مەن دەنساۋلىعىنا قاتەر توندىرەتىن قاۋىپتى ماماندىق ەكەنىن اتاپ ءوتىپ، تاۋەلسىزدىك جىلدارىندا قىزمەت بابىندا 815 قىزمەتكەردىڭ قازا تاپقانى، 4،5 مىڭنان استامى جاراقات العانى تۋرالى دەرەك كەلتىردى. سوندىقتان قوعامنىڭ قاۋىپسىزدىگى مەن تۇراقتىلىعىن قامتاماسىز ەتۋ ىسىندەگى ىشكى ىستەر ورگاندارىنىڭ ۇلەسىن باعالاماۋعا بولمايدى.

– ءبىز ءتارتىپ ساقشىلارىن قولداۋعا ءاردايىم ەرەكشە كوڭىل بولەمىز. كەيىنگى جىلدارى پوليتسيا قىزمەتكەرلەرىنىڭ جالاقىسى بىرنەشە رەت ءوسىپ، تۇرعىن ءۇيدى جالعا الۋ قۇنىنا وتەماقى تولەۋ ەنگىزىلدى. سونىمەن قاتار اكىمدەرگە جەرگىلىكتى بيۋدجەت ەسەبىنەن قارجىلاندىرىلاتىن قىزمەتتەرگە 30 پايىزدىق ۇستەماقى بەلگىلەۋ قۇقىعى بەرىلدى. مەنىڭ تاپسىرماما سايكەس بيىلعى 1 قازاننان باستاپ جەدەل-ىزدەستىرۋ قىزمەتى قىزمەتكەرلەرىنىڭ ەڭبەكاقىسى كوتەرىلەدى. ءبىز پوليتسيا قىزمەتكەرلەرىن قۇقىقتىق جانە الەۋمەتتىك تۇرعىدان قورعاۋدى جاقسارتۋ ءۇشىن كەشەندى شارالاردى جالعاستىرامىز، – دەدى مەملەكەت باسشىسى.

پرەزيدەنت قۇقىق قورعاۋ ورگاندارىندا قىزمەت اتقارۋدىڭ جاستار ءۇشىن تارتىمدى ءارى مارتەبەلى بولۋى ماڭىزدى دەپ ەسەپتەيدى. ۇزدىك پوليتسەيلەردى كوتەرمەلەپ، ەرەكشەلەپ، ماراپاتتاۋ ءىسىن قولدايتىنىن ءبىلدىردى. 

مەملەكەت باسشىسى سوڭعى كەزدەرى قۇقىق قورعاۋ ورگاندارىنىڭ قىزمەت بابىن اسىرا پايدالانۋىنا قاتىستى شاعىمداردىڭ جيىلەپ كەتكەنىن اتاپ ءوتتى. پرەزيدەنت مامىر ايىندا وتاندىق بيزنەس وكىلدەرىمەن كەزدەسۋىندە كاسىپكەرلەردىڭ كوپشىلىگى تىكەلەي قىسىم كورىپ جاتقانى تۋرالى شاعىمدانعانىن ايتقان بولاتىن.

پرەزيدەنت ەكونوميكالىق تەرگەۋ قىزمەتىنىڭ وڭىرلەردەگى جۇمىسىنا جاعىمسىز پىكىرلەر كوپتەپ ءتۇسىپ جاتقانىن ەرەكشە اتاپ ءوتتى. مەملەكەت باسشىنىڭ ايتۋىنشا، زاڭسىز ارەكەتتەردەن ىشكى ىستەر مينيسترلىگى قىزمەتكەرلەرى دە تىسقارى ەمەس. كەيبىرى جەمقورلىققا قاتىستى ايتىلىپ وتىر. 

– بۇل بۇكىل قۇقىق قورعاۋ جۇيەسىنىڭ بەدەلىنە ايتارلىقتاي نۇقسان كەلتىرەدى. قارجى مونيتورينگى اگەنتتىگىنىڭ كۇشىن الاياقتىققا، قارجى پيراميدالارىنا، كاپيتال مەن رەسۋرستاردى شەتەلگە زاڭسىز شىعارۋ فاكتىلەرىنە باعىتتاۋ كەرەك. اگەنتتىك كولەڭكەلى ەكونوميكامەن كۇرەسەتىن نەگىزگى مەملەكەتتىك ورگانعا اينالۋعا ءتيىس. ءبىز قوعامدا جوعارى قۇقىقتىق مادەنيەت جانە سىبايلاس جەمقورلىق پەن زاڭسىزدىقتىڭ كەز كەلگەن كورىنىستەرىنە بەرىك يممۋنيتەت قالىپتاستىرۋىمىز كەرەك، – قاسىم-جومارت توقاەۆ.

بەلسەندىلەر ساياسي پارتيالار مەن قوزعالىستار قۇرۋعا ىنتالى ەكەنىن مالىمدەپ، ىشكى جانە سىرتقى ساياساتتىڭ وزەكتى ماسەلەلەرى بويىنشا ءارتۇرلى پىكىرلەرى مەن كوزقاراستارىن بىلدىرەدى. بۇل – ازاماتتىق قوعامنىڭ جەتىلگەنىن كورسەتەتىن تابيعي پروتسەسس. دەگەنمەن، پرەزيدەنتتىڭ پىكىرىنشە، ازاماتتىق بەلسەندىلەردىڭ بارلىق ارەكەتى، سونىڭ ىشىندە نارازىلىق اكتسيالارى قولدانىستاعى زاڭناماعا جانە پاراساتتىلىققا قاتاڭ سايكەس كەلۋى وتە ماڭىزدى.

– زاڭدى بۇزۋعا، زاڭسىز ارەكەتتەرگە بارۋعا، سونىڭ ىشىندە پوليتسيا قىزمەتكەرلەرىنىڭ ادامدىق قادىر-قاسيەتىنە، كاسىبي ار-نامىسىنا قارسى باعىتتالعان ارەكەتتەرگە باراتىندار زاڭنامامىزعا سايكەس جاۋاپكەرشىلىككە تارتىلادى. قازاقستاننىڭ ۇلتتىق مۇددەسىنە قارسى ارەكەت ەتەتىن كاسىبي ارانداتۋشىلار اشكەرەلەنۋى كەرەك، – دەدى مەملەكەت باسشىسى.

جيىن سوڭىندا مەملەكەت باسشىسى سالانىڭ بىرقاتار قىزمەتكەرىنە مەملەكەتتىك ناگرادالار تاپسىردى.