پارلامەنت • 23 ماۋسىم، 2022

سەناتورلاردى ارال تەڭىزىندەگى جاعداي الاڭداتىپ وتىر

پالاتا ۆيتسە-سپيكەرى اسقار شاكىروۆ باستاعان ءبىر توپ سەناتورلار جولداعان دەپۋتاتتىق ساۋالدا ارال ءوڭىرىنىڭ ەكولوگيالىق ماسەلەلەرى كوتەرىلدى. پلەنارلىق وتىرىس بارىسىندا ورىن العان ساۋال ەلىمىزدىڭ پرەمەر-ءمينيسترى ءاليحان سمايىلوۆقا جولداندى، دەپ جازادى Egemen.kz.

ارمان ماناربەك ۇلى

ميلليونداعان گەكتار كەپتىرىلگەن تەڭىز قاباتى، ايماققا جەلمەن جەتكەن ميللياردتاعان توننا تۇز جانە ءشولدىڭ كەلە جاتقان قۇمدارى ەكولوگيامەن ادام دەنساۋلىعىنىڭ ايتارلىقتاي ناشارلاۋى قاۋىپىن ءتوندىرىپ تۇر.

«ارال تەڭىزى باسسەينىندە تۇراقتى تۇراتىن ادامداردىڭ اعزاسىندا ومىرلىك ماڭىزى بار دەنە مۇشەلەرىنىڭ فۋنكتسيونالدىق جاي-كۇيىندە وزگەرىستەر انىقتالىپ، ءتىپتى، پاتولوگيالىق اۋرۋلاردىڭ دامۋىنا دەيىنگى وزگەرىسكە ۇشىراۋدا. وسىلايشا، ارالدىڭ كەبۋى اپاتتى سالدارى بار سيپاتقا يە جانە پلانەتارلىق اۋقىمداعى ەكولوگيالىق قاسىرەت بولىپ تابىلادى. ونى بارلىق ەلدەردىڭ، حالىقارالىق ۇيىمداردىڭ كۇش-جىگەرىن بىرىكتىرۋ ارقىلى عانا توقتاتۋعا بولادى.ەڭ الدىمەن، وسى ەكولوگيالىق داعدارىستى شەشۋگە حالىقارالىق قورلار مەن عىلىمي ورتالىقتاردى تارتۋ قاجەت. وكىنىشكە وراي، سوڭعى ۋاقىتتا ولاردىڭ ايماقتاعى بەلسەندىلىگى ايتارلىقتاي تومەندەپ وتىر»، دەدى سەناتور اقىلبەك كۇرىشباەۆ دەپۋتاتتىق ساۋالدى وقي وتىرىپ.

سەناتورلار ماسەلەنى شەشۋ ءۇشىن كەلەسى شەشىمدەردى ۇسىنادى: حالىقارالىق ارالدى قۇتقارۋ قورىنىڭ جۇمىسىن جانداندىرۋ، ورتالىق ازيا ەلدەرىمەن سۋ-ەنەرگەتيكالىق كونسورتسيۋم قۇرۋ جانە كەۋىپ قالعان تەڭىزدىڭ تۇبىنە جاسىل جەلەكتەردى بەلسەندىرەك وتىرعىزۋ.

ارال تەڭىزىنىڭ قازاقستاندىق بولىگىندەگى تابيعي ەكپەلەردى قوسا العاندا، ورمانداردىڭ جالپى اۋدانى 337 مىڭ گەكتاردى قۇرايدى. سونىمەن قاتار، ءبىزدىڭ وزبەك ارىپتەستەرىمىز شامامەن 1،6 ملن گا القاپقا سەكسەۋىل ەكپەلەرىن وتىرعىزدى، بۇل رەتتە ونىڭ باسىم بولىگىندە اەروپوسەۆتى پايدالانىپ وتىر. سونىمەن قاتار، ولار جۇيەلى تۇردە اعاش داقىلدارىنىڭ ءشولدى جاعدايلارىنا بەيىمدەلگەن تۇرلەرىن كەڭەيتۋمەن اينالىسۋدا. وسىعان بايلانىستى بىزگە اعاش وتىرعىزۋ جۇمىستارىنىڭ قارقىنىن جەدەلدەتىپ قانا قويماي، فيتومەليوراتيۆتىك تەحنولوگيالاردى دا جەتىلدىرۋ كەرەك، ويتكەنى ءبىزدىڭ اۋماقتا وتىرعىزىلعان وسىمدىكتەردىڭ جەرسىنۋى جەكەلەگەن جىلدارى 10-13%-دان اسپايدى»، دەپ اتاپ ءوتتى سەناتورلار.

دەپۋتاتتاردىڭ ايتۋىنشا، ولار قازىردىڭ وزىندە ءوز وكىلەتتىكتەرى اياسىندا بۇل باعىتتا بەلسەندى جۇمىس ىستەپ جاتىر. سەناتورلار تاياۋدا عانا سولتۇستىك ارال سۋىن ۇستاپ تۇرعان كوكارال بوگەتىن جوندەۋ قاجەتتىلىگى تۋرالى ۇكىمەتكە ساۋال جولداعانىن ەسكە سالدى. پارلامەنتارالىق ديپلوماتيانى ودان ءارى دامىتۋ اياسىندا ولار دۇنيەجۇزىلىك قوعامداستىقتىڭ نازارىن ارال پروبلەماسىنا اۋدارۋ ماقساتىندا ءتۇرلى حالىقارالىق پلاتفورمالاردا وسى ماسەلەلەردى كوتەرۋدى كوزدەپ وتىر.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز