جارىستىڭ كەزەكتى كۇنىندە ەرلەر جەكەلەي جارىستا باق سىنادى. ەرەسەكتەر اراسىنداعى باسەكەدە Astana Qazaqstan Team ۆەلوكلۋبىنىڭ وكىلى يۋري ناتاروۆ ۇزدىك ناتيجە كورسەتىپ, قازاقستان چەمپيونى اتاندى. ناتاروۆ 30 شاقىرىم جولدى 37 مينۋت 46 سەكۋندتا ءجۇرىپ ءوتتى. مارە سىزىعىن ەكىنشى بولىپ ۇلتتىق قۇرامانىڭ وكىلى يگور چجان كەستى. ول جەڭىمپازدان 51 سەكۋندقا قالىپ قويدى. ۇزدىك ۇشتىكتى انتون كۋزمين تۇيىندەدى.
ال 23 جاسقا دەيىنگى سپورتشىلار اراسىنداعى باسەكەدە Astana Qazaqstan Development Team ۆەلوشاباندوزى دانيل پرونسكي توپ جاردى. اتالعان قاشىقتىقتى ول 39 مينۋت 5 سەكۋندتا باعىندىردى. ەكىنشى جانە ءۇشىنشى ورىندى اندرەي رەمحە (39 مينۋت 47 سەكۋند) جانە الەكساندر ۆينوكۋروۆتىڭ ۇلى نيكولاي ۆينوكۋروۆ (40 مينۋت 43 سەكۋند) جەڭىپ الدى.
