تاۋەكەلشىل ناني
پورتۋگاليالىق فۋتبولشى لۋيش ءنانيدىڭ فۋتبولعا كەلۋى اۋىر وقيعامەن استاسادى. ول ءوزىنىڭ ءبىر سۇحباتىندا بالالىق شاعىن ەسكە الىپ, بىلاي دەيدى:
ء«بىز جوقشىلىقتىڭ زاردابىن كوبىرەك تارتتىق. انام بار, سەگىز اعا-اپكەم بار – ءبارىمىز بىرگە ەدەنى تەسىك, ەگەۋقۇيرىقتار مەن كەسىرتكەلەر بىزبەن بىتە قايناسىپ جاتقان ءبىر بولمەلى ۇيدە تۇراتىنبىز. بىزدە جەيتىن تاماق بولعان جوق. ارقايسىمىز ءوز ءومىرىمىز ءۇشىن كۇرەستىك. مەن 7 جاسقا تولعانىمدا اكەم تاريحي وتانىمىز – كابو-ۆەردەگە كەتىپ, قايتا ورالمادى. اكەمنىڭ ءبىزدى تاستاپ كەتۋى ءومىرىمىزدى ودان ءارى قيىنداتىپ جىبەردى. انام ءبىزدى قايتسەم جەتكىزەمىن دەپ كۇنى-ءتۇنى ەڭبەك ەتۋمەن بولدى. ول تۇندە مەيرامحانادا ءانشى بولىپ, كۇندىز ءورت ءسوندىرۋ بولىمىندە جۇمىس ىستەدى. بالا كۇنىڭدە كەز كەلگەن نارسەگە تەز كوندىگەسىڭ عوي. بىراق اشتىققا شىداۋ مۇمكىن ەمەس ەكەن... اشتىقتىڭ نە ەكەنىن ءتۇسىندىرىپ بەرۋ ماعان قيىن, ويتكەنى ونى ءسىز سەزىنىپ, باسىڭىزدان وتكىزىپ كورمەگەن بولۋىڭىز مۇمكىن. كەيدە تاماق جەگىم كەلىپ, جانىم اۋىرعان كەزدە «دەنەمنىڭ ءبىر بولشەگىن جەپ كورسەم قالاي بولادى ەكەن» دەپ ويلايتىنمىن. بىراق اشتىقتىڭ پايدالى جاقتارى دا بار. ول ءسىزدى ىزدەنۋگە, تاۋەكەل ەتۋگە ماجبۇرلەيدى», دەيدى ول.
ناني ءومىر جولىندا قۇداي وزىنە ۇنەمى جاقسى ادامداردى جولىقتىرعانىن ايتادى. ولاردىڭ ءبىرى بالا كۇنگى ەڭ جاقىن دوسى – سابينۋ. ول كەيىپكەرىمىزدى جەتى جاسىندا العاش رەت فۋتبول الەمىمەن تانىستىرادى. ء«الى ەسىمدە, فۋتبول ويناۋعا ەسكى شورتى, كويلەك جانە مەكتەپكە كيەتىن جىلتىر اياقكيىمىمدى كيىپ كەلدىم. ستاديونعا كەلسەم, بالالار مەنىڭ كيىمىمە قاراپ ابدەن كۇلگەن-ءدى. مەن وعان رەنجىگەن جوقپىن. ويىن باستالعان ساتتە بىرنەشە ويىنشىنى الداپ ءوتىپ, گول سوقتىم. كەيىن دوپتى الىستان تەۋىپ كورگىم كەلدى. گول! جاتتىعۋ اياقتالعان سوڭ جاتتىقتىرۋشى مەنىڭ قولىمدى الىپ, كەلەسى جاتتىعۋعا شاقىردى. فۋتبولداعى العاشقى قادامىم وسىلاي باستالدى...
...2003 جىلى كوكتەمنىڭ سوڭىنا دەيىن «سپورتينگ» كلۋبىمەن جاتتىقتىم. سول ارالىقتا «بەنفيكانىڭ» دا جاتتىعۋىنا بارىپ تۇراتىنمىن. «سپورتينگتەگى» سوڭعى كۇنىمدە كلۋبتان حات الدىم. وندا ەرتەڭ ساعات 10-دا اكادەميا باسشىلىعىمەن كەزدەسۋ بولادى دەپ جازىلعان ەكەن. قىرسىققاندا, ءدال سونداي حاتتى «بەنفيكادان» دا الدىم. ولار دا ساعات 10-عا شاقىرىپ وتىر. ەكەۋىنە دە «جاقسى» دەپ جاۋاپ بەردىم دە, «سپورتينگتى» تاڭدادىم. سەبەبى ول كلۋبتىڭ باپكەرىن جاقسى تانيتىنمىن, ءارى وندا دوسىم دا كوپ ەدى. ءسويتىپ, 17 جاسىمدا العاش رەت كاسىبي كەلىسىمشارت جاساستىم. كلۋبقا قابىلدانعان سوڭ قارجىلىق جاعدايىمنىڭ دا ماسەلەسى شەشىلدى. العاشقى جالاقىمدى الىپ, اكەمدى ىزدەپ كابو-ۆەردەگە باردىم. سويتسەم, اكەم ءبىزدى تاستاپ كەتپەپتى. تەك قۇجاتىنىڭ شيكىلىگىنە بايلانىستى ۇيگە قايتا الماعان ەكەن. كەيىن اكەمە قۇجات جاساتىپ بەردىم. بۇل مەنىڭ ومىرىمدە تىندىرعان ەڭ ۇلكەن شارۋانىڭ ءبىرى ەدى.
2005 جىلى «سپورتينگتىڭ» نەگىزگى كومانداسىنا اۋىستىم. ارادا تاعى ەكى جىل وتكەندە گازەتتەر مەن تۋرالى ءجيى-ءجيى جازا باستادى. ولاردىڭ جازۋىنشا, مەنى «مانچەستەر يۋنايتەد» ءوز قاتارىنا قوسقىسى كەلەدى ەكەن. ال اگەنتىم سول كەزدە ۇسىنىس بىلدىرگەن بىرنەشە كوماندانىڭ ءتىزىمىن كورسەتتى دە, قولىمەن «مىنا كوماندا سەنىڭ جۇلدىزىڭدى جاعادى» دەدى. ول ميۋ ەدى. «مەن سەر الەكسپەن سويلەسىپ قويدىم, ول سەنەن كريشتيانۋدىڭ جولىمەن جۇلدىز جاساماقشى ەكەن» دەدى. سەر سوزىندە تۇردى», دەيدى لۋيش ناني.
«مانچەستەر يۋنايتەدكە» اۋىسىپ, باق-جۇلدىزى جانعان ناني اعىلشىن كلۋبىمەن بىرگە انگليا بىرىنشىلىگىندە ءتورت مارتە توپ جارىپ, چەمپيوندار ليگاسىنىڭ «قوس قۇلاقتى» كۋبوگىن جەڭىپ الدى. سونداي-اق انگليا سۋپەركۋبوگى مەن كلۋبتار اراسىنداعى الەم چەميوناتىنىڭ التىنىن موينىنا جارقىراتىپ تاقتى. پورتۋگاليا قۇراماسىمەن بىرگە 2012 جىلى ەۋروپا چەمپيوناتىنىڭ قولا جۇلدەگەرى اتانسا, اراعا ءتورت جىل سالىپ (2016) باس جۇلدەگە قول جەتكىزدى. لۋيش ناني 2015 جىلعا دەيىن ميۋ-دە ونەر كورسەتىپ, كەيىننەن تۇركيانىڭ «فەنەرباحچە», يسپانيانىڭ «ۆالەنسيا», يتاليانىڭ «لاتسيو» كلۋبتارىندا دوپ تەۋىپ, 2018 جىلى «سپورتينگكە» قايتا ورالدى.
قاناعاتشىل كانتە
ءبىزدىڭ كەلەسى كەيىپكەرىمىز فۋتبول الەمىندە ەڭ ءىرى جەتىستىككە قول جەتكىزسە دە, اينالاسىنداعىلار ءۇشىن قاراپايىمدىلىقتىڭ سيمۆولى سانالادى. ول جىگىت تىنىمسىز ەڭبەكتىڭ, توككەن تەردىڭ جانە سابىرلىلىقتىڭ ءوز جەمىسىن بەرەتىنىن دالەلدەگەن اتى اڭىزعا اينالعان فۋتبولشى. ول – الەم چەمپيونى نگولو كانتە. كانتەنىڭ ءومىر جولى قيىن ساتتە دە جول تابۋعا بولاتىنىن دالەلدەيدى.
ء«بىز ءپاريجدىڭ شەتكى اۋدانىندا, افريكادان كەلگەن بوسقىندار مەكەندەيتىن اۋماقتا تۇردىق. اتا-انام 1980 جىلى ماليدەن جاقسى ءومىر ىزدەپ فرانتسياعا كەلگەن. اكەم قوقىس جيناپ, انام ەدەن جۋشى بولىپ توعىز بالاسىن اسىرادى. ءۇيدىڭ ۇلكەنى بولعاندىقتان, ولاردىڭ ءوسىپ-جەتىلۋىنە, اش قالماۋىنا اتا-اناممەن قاتار مەن دە جاۋاپتى بولدىم. كەدەيلىكتىڭ شىرماۋىنان تىنىمسىز ەڭبەكتىڭ ارقاسىندا شىعاتىنىمىزدى ءبىلدىم دە, جۇمىس ىزدەۋگە كىرىستىم. ءبىز سياقتى بوسقىندارعا جالاقىسى جوعارى جۇمىس تابۋ قيىن ەدى. ءسويتىپ, اكەمە ەرىپ, قوقىس جيناۋعا كىرىستىم. قوقىس جيناۋ ءۇشىن كۇنى بويى بىرنەشە شاقىرىم ءجۇرىپ, ونى وڭدەيتىن جەرگە جەتكىزەمىز. اقشانى العان بويدا ەشقايدا بۇرىلماي تىكە ۇيگە تارتاتىنمىن. ويتكەنى ۇيدە كۇنى بويى ءنار تاتپاعان ءىنى-قارىنداستارىم كۇتىپ وتىراتىن.
ءومىر بويى قوقىس جيناپ وتسەم, وتباسىم دا ماڭگى كەدەي بولىپ قالا بەرەتىنىن ءتۇسىندىم. ءسويتىپ, ءومىرىمدى وزگەرتۋدىڭ, كەدەيلىكتىڭ اۋىرتپالىعىنان قۇتىلۋدىڭ بارلىق جولىن ىزدەدىم. 1998 جىلى جەتى جاسىمدا فرانتسيادا فۋتبولدان الەم چەمپيوناتى ءوتتى. سول كەزدە قاتتى قۋاندىم. فۋتبول الامانىن تاماشالايتىنىما ەمەس, كوپ قوقىس جينايتىنىما. ءار ماتچ سايىن ستاديوننان قاپ-قاپ قوقىس ارقالاپ شىعامىن. ول كەزدە ماعان فۋتبول مۇلدە قىزىقسىز ويىن ەدى. ءبىر ايدىڭ ىشىندە اجەپتاۋىر قارجى جينادىم. الەمدىك دودا دا مارەسىنە جەتىپ, فرانتسيا الەم چەمپيونى بولدى. كەيىن قاراسام, سول قۇراماداعى 7-8 فۋتبولشىنىڭ شىققان تەگى افريكالىق ەكەن. مەن دە سولار سياقتى فۋتبولشى بولىپ, وتباسىمدى كەدەيلىكتەن, جوقشىلىقتان قۇتقارعىم كەلدى. سودان ءبىر اي بويى قوقىس جيناۋدان تاپقان اقشامنىڭ ءبىر بولىگىن فۋتبول جاتتىعۋىنا جۇمساي باستادىم. وزىمە قالايدا فۋتبولشى بولامىن دەگەن ماقسات قويدىم. ەگەر بۇل ماقساتقا جەتە الماسام, وندا ءومىر باقي قوقىس جيناۋشى بولىپ جۇرەتىنىمدى ءوز-وزىمە قايتا-قايتا ەسكەرتە بەردىم.
فۋتبولداعى العاشقى قادامىمدى ريۋەي-مالمەزون اۋدانىنىڭ Suresnes كومانداسىنان باستادىم. ول كەزدە 8 جاستا ەدىم. باسىندا مەنى باپكەرلەر كومانداعا العىسى كەلمەگەن. جاسىم دا, بويىم دا كوماندالاستارىمنان الدەقايدا كىشى ەدى. بىراق تىنىمسىز ەڭبەگىمنىڭ ارقاسىندا ولاردى مويىنداتتىم. 2010 جىلى Suresnes كومانداسىنان كەتىپ, 110 جىلدىق تاريحى بار جانە بىرنەشە جۇلدىز ويىنشى شىققان «بۋلون» كلۋبىنا اۋىستىم. ول كەزدە ءبىزدىڭ كوماندا فرانتسيانىڭ ءۇشىنشى ليگاسىندا ونەر كورسەتەتىن. ءوزىمدى جاقسى قىرىمنان كورسەتكەن بولۋىم كەرەك, 2013 جىلى ەكىنشى ليگاداعى «كان» كلۋبى مەنى نەگىزگى كومانداسىنا شاقىردى. بۇل جەردە دە كوپ تۇراقتاعانىم جوق. 2015 جىلى انگليا پرەمەر-ليگاسىندا ونەر كورسەتەتىن «لەستەر» كلۋبىندا ونەر كورسەتۋگە شاقىرعاندا, الەمدە مەنەن اسقان باقىتتى جان بولماعان شىعار. بۇل جولى دا ۇلكەن كلۋبقا اۋىساتىنىما ەمەس, وتباسىمنىڭ جاقسى ءومىر سۇرەتىنىنە قاتتى قۋاندىم. ەشقاشان اقشانىڭ سوڭىنان قۋعان ەمەسپىن. مەنىڭ بۇل وقيعام كىشكەنتاي فۋتبولشىلاردى قانداي جاعداي بولسا دا, ءوز ارمانىنا ۇمتىلۋعا ۇيرەتەدى دەپ ويلايمىن. ءوز وزىڭىزگە سەنىمدى بولساڭىز جانە تىنىمسىز ەڭبەك ەتسەڭىز, بارلىق ماقساتقا قول جەتكىزۋگە بولادى», دەيدى ن.كانتە.
2016 جىلدىڭ 16 شىلدەسىندە كانتە
32 ميلليون فۋنت ستەرلينگكە «چەلسي» كلۋبىنا اۋىستى. كەلىسىمشارت 5 جىل مەرزىمگە جاسالدى. كەلىسىمشارتقا قول قويعاننان كەيىن ول: «ەۋروپانىڭ ۇزدىك كلۋبتارىنىڭ بىرىنە اۋىسقانىما قۋانىشتىمىن, تاعى ءبىر ارمانىم ورىندالدى» دەيدى. لوندون كومانداسىنىڭ قۇرامىنداعى ءبىرىنشى ماۋسىمدا كانتە ەكىنشى رەت قاتارىنان اپل چەمپيونى اتانىپ, فۋتبولشىلار مەن سپورت جۋرناليستەرىنىڭ پىكىرى بويىنشا چەمپيوناتتىڭ ۇزدىك ويىنشىسى دەپ تانىلدى. جەتى جىلدىڭ ىشىندە ول «چەلسيمەن» بىرگە انگليا كۋبوگىندا (2018), ەۋروپا ليگاسى (2019) مەن چەمپيوندار ليگاسىندا (2021), ۋەفا سۋپەركۋبوگىندا (2021) جانە كلۋبتار اراسىنداعى الەم چەمپيوناتىندا توپ جاردى.
تەگەۋرىندى تەۆەس
فۋتبول مەن قاجىرلى ەڭبەكتىڭ ارقاسىندا جوقشىلىقپەن قوشتاسىپ, بايلىققا كەنەلگەن تاعى ءبىر كەيىپكەردىڭ ەسىمى – كارلوس البەرتو مارتينەس تەۆەس. ارگەنتينالىق فۋتبولشىنىڭ بالالىق شاعى كەدەيلىك پەن بۋەنوس-ايرەستىڭ ەڭ قاۋىپتى اۋدانىندا ءوتتى. ول جەردە قىلمىس پەن زاڭسىزدىق ادەتتەگى ءومىر سالتىنا اينالعان ەدى. كارلوستىڭ الدىندا ەكى تاڭداۋ تۇردى: ءبىرى – قاتارلاستارى سەكىلدى قىلمىسكەر بولۋ, ەكىنشىسى – فۋتبولشى بولۋ. ول ەكىنشى جولدى تاڭدادى. ءسويتىپ, كىشكەنتاي كارلوس ءوزىنىڭ ارمانى ءۇشىن بارلىق بوس ۋاقىتىن جاتتىعۋعا ارنادى.
«مەن كوپتەگەن ارگەنتينالىق سياقتى وتە كەدەي وتباسىندا دۇنيەگە كەلدىم. اكەمنىڭ ايتۋىنشا, التى ايلىق كەزىمدە انام ءبارىمىزدى تاستاپ كەتكەن ەكەن. ال اكەمە كىشكەنتاي نارەستەنى باعىپ-قاعۋ وتە قيىن بولعان. وتباسىمىزدا مەنەن بولەك تاعى بىرنەشە بالا بار. ۇيدەگىلەردىڭ ءبارى جۇمىسقا كەتىپ, مەنى جالعىز قالدىرىپ كەتەتىن. ءبىر كۇنى ۇلكەندەردىڭ قاراۋىنسىز قالعان مەن بايقاۋسىزدا ۇستىمە قايناپ تۇرعان سۋدى توگىپ الىپپىن. سودان وڭ قۇلاعىمنان باستاپ, كەۋدە تۇسىما دەيىن ابدەن كۇيىك شالدى. ايتەۋىر ەكى اي دەگەندە قارقىندى تەراپيانىڭ ارقاسىندا امان قالدىم.
ءبىز قىلمىسى جايلاعان ەڭ شۋلى اۋداندا تۇراتىن ەدىك. ءتىپتى مەن كىشكەنتاي كەزىمدە كوشەگە شىعۋعا قورقاتىنمىن. كۇندە ۇرىس-كەرىس, اتىس-شابىس. اماندىعىمىز ءۇشىن قۇدايعا كۇن سايىن قۇلشىلىق جاسايتىنبىز. كۇن سايىن مەكتەپكە بارا جاتقاندا جول بويىندا ادامداردىڭ ءمايىتىن كورەمىز. باسىندا قاتتى قورقىنىشتى ەدى. كەيىن ادامنىڭ ءولى دەنەسىن كورۋ قالىپتى جاعدايعا اينالىپ كەتتى. دەمالىس كۇندەرى اۋلاداعى بالالارمەن فۋتبول وينايتىن ەدىك. مەندە ءاردايىم اياقكيىمنەن پروبلەما بولاتىن. ويتكەنى باسقا بالالار سياقتى اياعىم وسسە دە جىل سايىن جاڭا اياقكيىم ساتىپ الۋعا اقشا جوق ەدى. سوسىن امال جوق, اياعىمدى قىسىپ تۇرسا دا, كىشى كروسسوۆكالارمەن ويناي بەرەتىن بولدىم. سونىڭ سالدارىنان بارماقتارىم ءوسۋىن توقتاتسا دا, فۋتبول ويناۋدان ءبىر ساتكە دە قول ۇزگەن جوقپىن. ءتىپتى اياعىم اۋىرسا دا, اياقكيىم كىشى بولسا دا, قوقىستىڭ اراسىندا ويناساق تا فۋتبول ويناعىم كەلەتىن. ەگەر فۋتبول ويناپ, باسقا نارسەگە الدانباعاندا, قازىر قاراقشىلاردىڭ ءبىرى بولار ما ەدىم.
تۇرعىنداردىڭ كوپشىلىگى قاراقشى بولىپ, كۇندە ادامدارعا شابۋىل جاساپ, توناۋمەن اينالىساتىن. ءتىپتى الكوگول مەن ەسىرتكى ءۇشىن ادامدار ءبىر-ءبىرىن ءجيى ولتىرەتىن. وسىنداي جاعدايلاردىڭ بىرىندە قاراقشىلار اكەمدى 23 مارتە اتىپ, مەرت قىلدى. ءسويتىپ, ءبىز باۋىرلارىممەن تۇلداي جەتىم قالدىق. ءبىزدى جەتىمدەر ۇيىنە وتكىزگەلى جاتقاندا تۋىستارىمىز قامقورلىق تانىتىپ, ۇيىنە الىپ كەتتى. بىراق ءبىزدىڭ ەكىنشى وتباسىمىزدىڭ دا جاعدايى ءماز ەمەس ەدى. ءبىزدى بىلاي تۇرسىن, ءوز بالالارىن ارەڭ تاماقتاندىراتىن.
8 جاسقا تولعانىمدا ءوز ەركىممەن فۋتبول مەكتەبىنە بارىپ, سيقىرلى ونەردىڭ قىر-سىرىنا ودان ءارى قانىعا باستادىم. 12 جاسىمدا «بوكا حۋنيورس» اكادەمياسىنا اۋىستىم. بۇل جەردە ءتورت جىل جاتتىعىپ, تاجىريبە جيناقتاپ, تەحنيكامدى جەتىلدىرىم. 16 جاسىما دەيىن جولىم بولماي, فۋتبولدان ەش ناتيجە شىعارا المادىم. مەن سوندا دا فۋتبولدان قول ۇزبەدىم, كۇنى-ءتۇنى جاتتىقتىم, باپكەرلەر نە ايتادى, سونى ەكى ەسە ورىنداۋعا تىرىستىم. ءتۇبى ءبىر جاقسىلىقتىڭ بولاتىنىنا سەنىمدى ەدىم. ءسويتىپ, 16 جاسىمنان كەيىن عانا فۋتبولداعى ويىنىم وڭالا باستادى....», دەيدى ك.تەۆەس قايعىعا تولى بالالىق شاعىن ەسكە الىپ.
2001 جىلى «بوكا حۋنيورستىڭ» ەرەسەكتەر كلۋبىنا اۋىسىپ, 2005 جىلى برازيليانىڭ «كورينتيانس» ساپىندا ونەر كورسەتتى. اراعا ءبىر جىل سالىپ تەۆەس ەۋروپاعا قونىس اۋداردى. «ۆەست حەم» كومانداسىندا جارقىن ونەرىمەن كوزگە تۇسكەن ول 2007 جىلى الەكس فەرگيۋسون باپتايتىن «مانچەستەر يۋنايتەدكە» اۋىسىپ, قاتارىنان ەكى جىل انگليا چەمپيوناتىندا (2008, 2009), چەمپيوندار ليگاسىندا (2008) ءبىر مارتە, كلۋبتار اراسىنداعى الەم چەمپيوناتىندا (2008) ۇزدىك شىقتى. كەيىننەن ول «مانچەستەر سيتي» مەن يتاليانىڭ «يۋۆەنتۋس» ساپىندا دا دوپ تەۋىپ, ەكى ەلدىڭ ۇلتتىق چەمپيوناتتارىندا توپ جاردى. ارگەنتينا قۇراماسىمەن بىرگە امەريكا كۋبوگىندا ءۇش رەت (2004, 2007, 2015) كۇمىس جۇلدەگەر اتاندى.
ەڭبەكقور سالاح
25 جاسىندا مىسىر قۇراماسىن الەم چەمپيوناتىنا شىعارىپ, ءوزى ەۋروپا فۋتبولىنداعى ەڭ تانىمال شابۋىلشىعا اينالعان موحامەد سالاح ءوز ەلىنىڭ قاھارمانى. بوزبالا سالاحتىڭ العاشقى ۇستازدارى – رونالدو, زينەدين زيدان جانە فرانچەسكو توتتي بولدى. دوپپەن قالاي ويناۋ كەرەگى تۋرالى ساباقتاردى كورۋ ءۇشىن بولاشاق جۇلدىز ۇيدەگى ەسكى تەلەديداردى تالاي مارتە سوققىلاپ, ءۇي ءىشىن وياتىپ الماۋعا تىرىساتىن. تۇندە چەمپيوندار ليگاسىنىڭ ماتچتارىندا كورگەنىن ول كۇندىز ناگريگتىڭ شاڭ باسقان كوشەلەرىندە ءىس جۇزىندە قايتالاۋعا تىرىساتىن. ونىڭ بالالىق شاعىندا ءجونى ءتۇزۋ دوبى دا بولماعانىمەن, ارمانى اسقاق ەدى.
«مەن الەكساندريا ماڭىنداعى ناگريگ دەگەن اۋىلدا دۇنيەگە كەلدىم. وتباسىمىز وتە كەدەي تۇراتىن. ۇيدە ەسكى تەلەديدار بولاتىن, مەن سول جەردەن العاش فۋتبول دەگەن ويىندى كورىپ, بۇل سپورت ءتۇرىن قاتتى ۇناتىپ قالدىم. دوپ تەۋىپ وينايىن دەسەم, مەن تۇگىل اۋىلداعى بىردە-ءبىر بالادا دوپ جوق ەدى. مەن وتە تالاپشىل بالا بولدىم. الدىما ماقسات قويسام, سوعان جەتپەي تىنبايتىنمىن. ءبىر كۇنى مەكتەپارالىق جارىس ءوتتى. ادەتتەگىدەي ءبىزدىڭ كوماندا جەڭىسكە جەتتى. مەن گول سوقتىم. سويتسەك, ءبىزدىڭ جارىسقا مىسىر پرەمەر-ليگاسىندا وينايتىن «اراب كونتراكتورس» كلۋبىنىڭ سكاۋتتارى كەلىپ, مەنىڭ ويىنىما ءتانتى بولعان ەكەن. ءسويتىپ, ولار ويىنىمدى ۇناتىپ, 14 جاسىمدا العاشقى ەڭبەك شارتىنا قول قويدىم.
بۇل كەزدە از دا بولسا ارمانىما جاقىنداي تۇسكەنىمدى سەزەتىنمىن. كايرلىق كلۋبتىڭ بازاسىنا جەتۋ ءۇشىن 5 ساعات جول ءجۇرىپ, ءتورت اۆتوبۋس اۋىستىراتىنمىن. كەيدە سول بازادا قونىپ تا قالامىن. ماعان مەكتەپ اكىمشىلىگى ۇنەمى قولداۋ كورسەتىپ, باسقا قاتارلاستارىما قاراعاندا ساباقتان ەرتەرەك قايتاراتىن. ال مەكتەپ مۇعالىمدەرى «اراب كونتراكتورس» قىزمەتكەرلەرىنە ارنايى قاعاز بەرىپ, مەنىڭ ساباققا دەگەن ىنتامنىڭ جاقسى ەكەنىن ايتىپ, ماقتاۋ حات جازىپ جىبەرەتىن.
اۋەلدە جاتتىقتىرۋشىلار مەنىڭ تەز جۇگىرەتىنىمدى نەگىزگە الىپ, قورعانىسقا قويۋدى ءجون كوردى. بىراق ۋاقىت وتە كەلە ولار مەنىڭ الدىڭعى شەپتە ويناعانىمدى دۇرىس دەپ شەشتى. بىراق مەن گول سوعا المايتىنمىن. ءبىر تۋرنيردەن كەيىن گول سوعا الماي, بۇرىشتا جىلاپ وتىرعانىمدى باپكەرلەرىم كورىپ, سەبەبىن سۇراعاندا: كوماندالاستارىمنىڭ سوققان گولىنا ۇلەسىم بولماعانىنا جىلاپ وتىرعانىمدى ايتتىم. سول كەزدەن باستاپ جاتتىقتىرۋشىلار مەنى تۇبەگەيلى شابۋىلشىعا اينالدىردى. ءسويتىپ, 18 جاسىمدا «كونتراكتورستىڭ» ەرەسەكتەر قۇرامىندا العاشقى ويىندى وتكىزىپ, مىسىردىڭ U-20 ۇلتتىق قۇراماسىنا شاقىرتۋ الدىم», دەيدى م.سالاح.
سالاح 2012 جىلى «اراب كونتراكتورس» كومانداسىنان ەلدىڭ باس كلۋبى «ال-احليگە» اۋىسادى. سول جىلعى كەزەكتى ءبىر ماتچتا جانكۇيەرلەر اراسىندا ۇلكەن قاقتىعىس بولىپ, 74 ادام قازا تاپتى. بۇل وقيعادان سوڭ ەلدە ەشكىمنىڭ فۋتبول كورۋگە دە, ويناۋعا دا زاۋقى بولمادى. ال بۇل ۋاقىتتا مىسىردىڭ وليمپيادالىق قۇراماسى لوندون وليمپياداسىنا دايىندىعىن باستاۋ قاجەت ەدى. سول كەزدە «بازەل» باسشىلىعى ويىنى توقتاپ قالعان مىسىرلىقتاردى وزدەرىنە جولداستىق كەزدەسۋ وتكىزۋگە شاقىردى. قۇرامىندا سالاح بار مىسىردىڭ جاستار قۇراماسى شۆەيتساريالىق كلۋبتى جەڭىپ كەتەدى. سول ويىندا ەۋروپالىقتاردىڭ كوزىنە تۇسكەن سالاحقا «بازەلمەن» بىرگە جاتتىعۋعا ۇسىنىس تۇسەدى. موحامەدتىڭ ەۋروپاعا ويدا-جوقتا جاساعان بۇل ساپارى ونىڭ ارى قارايعى جولىن ايقىنداپ بەرگەندەي ەدى. شۆەيتساريالىقتارمەن كەلىسىمشارتقا قول قويعاننان كەيىن ول «بازەلمەن» ەكى رەت ەل چەمپيونى اتانىپ, 2014 جىلى «چەلسيگە», كەيىن يتاليانىڭ ا سەرياسىنداعى «فيورەنتينا» مەن «روما» كلۋبىنا اۋىسادى. ريم كومانداسىندا ءتاۋىر ويىنىمەن كوزگە تۇسكەن موحامەد 2017 جىلى تۇماندى البيوندى باعىندىرۋعا قايتا اتتانادى. بۇل جولى – «ليۆەرپۋل» كلۋبىنا كەلدى. سالاح انگلياعا ورالا سالىپ اپل-داعى 33 ماتچتا 31 گول سوعىپ, ارىپتەستەرىنە 12 گولدى پاس بەرەدى. «ليۆەرپۋل» جانكۇيەرلەرىنىڭ سۇيىكتى فۋتبولشىسىنا اينالعان سالاح 2019 جىلى كومانداسىمەن چەمپيوندار ليگاسىنىڭ كۋبوگىن جەڭىپ السا, كەلەسى جىلى اپل چەمپيونى اتاندى.
P.S. مىنە, ءبىز ءسوز ەتكەن كەيىپكەرلەر ءومىردىڭ قيىندىعىنا قاراماي, تىنىمسىز ەڭبەكتىڭ, الدىنا قويعان بيىك ماقساتتىڭ ارقاسىندا جوقشىلىقتان قۇتىلىپ, الەمگە ايگىلى تۇلعالار قاتارىنا قوسىلعان. فۋتبولشىلاردىڭ ومىرلىك تاجىريبەسى ۇلكەن سپورتقا قادام باسقان كەز كەلگەن جاس جەتكىنشەككە ۇلگى بولاتىنى بەلگىلى. مونشاقتاپ توگىلگەن تەر ارقىلى تالاي بيىكتەردى باعىندىرۋعا بولادى.
