«قالا تۇرعىندارىنىڭ جىل سايىن ارتىپ كەلە جاتقانىن ەسكەرەر بولساق, الەۋمەتتىك نىساندارعا, ونىڭ ىشىندە وقۋ ورىندارىنا دەگەن سۇرانىس ارتىپ كەلەدى. جوسپارعا سايكەس وقۋشى ورىندارىمەن قامتاماسىز ەتىپ, جۇمىس ىستەپ تۇرعان ورىندارعا تۇسەتىن ارتىق جۇكتەمەنى الىپ تاستاۋ ءۇشىن جىل سايىن كەمىندە 10 مەكتەپ سالۋ قاجەت. ءۇش جىل ىشىندە 34 مەكتەپ سالىنىپ, پايدالانۋعا بەرىلدى. بۇل وقۋ ورىندارىندا 70 مىڭ وقۋشى ورنى اشىلدى.
قالانى ارالاۋ بارىسىندا بىرقاتار مەكتەپتىڭ قۇرىلىسىمەن تانىستىم. ماسەلەن, ۇلى دالا داڭعىلىنداعى جانە 187-كوشە, 18/4 مەكەنجايىنداعى (سارىارقا اۋدانى) ەكى مەكتەپتى ارالاپ شىقتىم.
مىسالعا, №65 مەكتەپتىڭ (سارىارقا اۋدانى) ەرەكشەلىگى – ينكليۋزيۆتى ءبىلىم بەرۋ جۇيەسى بار. بۇل جەردە ەستۋ, تىرەك-قيمىل اپپاراتى بۇزىلعان بالالار وقيدى. مۇندا بارلىعى 3 مىڭنان اسا وقۋشى قامتىلعان, بۇل وقۋ ورنىنىڭ وزىنە ءتان قۋاتتىلىعىنان اسىپ تۇسەدى. مەكتەپتىڭ قۋاتتىلىعىن ارتتىرۋ ءۇشىن جانىنان جاڭا كورپۋستىڭ قۇرىلىسىن باستادىق. جاڭا كورپۋس تاعى 1200 وقۋشى ورنىن (ەكى اۋىسىمدا) اشۋعا مۇمكىندىك بەرەدى.
ەسىل اۋدانىندا ورنالاسقان مەكتەپتىڭ ( ۇلى دالا داڭعىلى مەن №39 كوشەنىڭ قيىلىسى) قۇرىلىسى ۇزاققا سوزىلدى. سەبەبى ءوز ىسىنە جاۋاپسىز قۇرىلىس سالۋشى مىندەتتەمەلەرىن ورىندامادى. ءبىز ونىمەن كەلىسىمشارتتى ۇزدىك, مەكتەپ قۇرىلىسىن توقتاپ تۇرعان جەرىنەن قوزعادىق. بۇل مەكتەپتى بيىل اياقتاۋدى جوسپارلاپ وتىرمىز. اتالمىش نىسان 2400 وقۋشىعا (ەكى اۋىسىمدا) جوسپارلانعان.
وسىلايشا, جاڭا وقۋ جىلىندا (2022-23 جج) تاعى 20 مىڭنان اسا وقۋشى ورنىن اشۋدى (2 اۋىسىمدا) جوسپارلاپ وتىرمىز», دەپ جازدى ەلوردا اكىمى.
