«جول اكتيۆتەرى ۇلتتىق ساپا ورتالىعى» رمك وبلىستىق فيليالىنىڭ ءباسپاسوز حاتشىسى تالعات ءادىلدىڭ ايتۋىنشا, 2021 جىلى ورتالىق تاراپىنان بارلىق وبلىستاعى اكىمدىكتەردە جولاۋشىلار كولىگى جانە اۆتوموبيل جولدارى ءبولىمى قىزمەتكەرلەرىنە تالداۋ جۇرگىزىلگەن.
– بارلىعى 1 600-گە جۋىق ادامنىڭ جەرگىلىكتى اتقارۋشى ورگانداردا جول سالاسىنا قاتىستى بولىمدە جۇمىس ىستەيتىنى بەلگىلى بولدى. بىراق ولاردىڭ ىشىندە 190 ادامنىڭ عانا جول ماماندىعى بويىنشا سايكەس ديپلومى بار. راس, ماڭعىستاۋدا دا جول قۇرىلىسىنىڭ قىر-سىرىن بىلەتىن مامان تاپشى. ولقىلىقتى تۇزەتۋ ءۇشىن بيىل ءساۋىر ايىندا اقتاۋدا كاسىبي بىلىكتىلىكتى ارتتىرۋ سەمينارىن وتكىزدىك, – دەيدى ت.ءادىل.
بيىل ءساۋىر ايىندا اقتاۋدا كاسىبي بىلىكتىلىكتى ارتتىرۋ ماقساتىندا وتكىزىلگەن سەمينارعا اۋدان-قالا اكىمدىكتەرىنىڭ قىزمەتكەرلەرى مەن اۆتوجولداردى سالۋشى مەردىگەر مەكەمەلەردىڭ ماماندارى قاتىستى. ولار اۆتوموبيل جولدارىن جوندەۋ نەمەسە قايتا توسەۋ بويىنشا جاڭا تەحنولوگيالاردى قولدانۋدى ۇيرەنىپ, جالپى وسى سالاداعى سوڭعى جاڭالىقتارمەن تانىستى. سەمينارعا قاتىسۋشىلاردىڭ سۇراۋى بويىنشا بيىل وسىنداي ءىس-شارا تاعى وتكىزىلمەك.
ماڭعىستاۋلىق جولداردىڭ ساپاسىن باقىلاۋشىلار رەسەيگە, سونداي-اق نۇر-سۇلتان, الماتى جانە شىمكەنت قالاسىندا وتكەن بىلىكتىلىك ارتتىرۋ سەمينارلارىنا بارىپ ءجۇر. ودان جيناقتاعان تاجىريبەسىن بۇگىندە بولىسۋدە.
«جول اكتيۆتەرى ۇلتتىق ساپا ورتالىعى» رمك ماماندار تاپشىلىعىن ازايتۋ جۇمىستارىن قولعا الدى. 2020 جىلى ۇلتتىق ورتالىقتىڭ باس ديرەكتورى ز.ساعىنوۆتىڭ باستاماسىمەن «1000 مەكتەپ» جوباسى جۇزەگە اسقان. اقتاۋ قالاسى, مۇنايلى, تۇپقاراعان, بەينەۋ اۋداندارى بويىنشا 101 مەكتەپكە بارىپ, 9-11 سىنىپ وقۋشىلارىمەن كەزدەسۋ وتكىزىپ, 2020-2021 جىلدارى بارلىعى 3 مىڭعا جۋىق وقۋشىنى قامتىعان. بيىل بۇل اكتسيا «2000 مەكتەپ» اتاۋىمەن جالعاسۋدا. ءار اۋدان مەن اۋىلدى جىل سوڭىنا دەيىن تولىق قامتۋ جوسپارلانعان. سونداي-اق فيليال عيماراتىندا جول سالاسىندا وقىپ جاتقان كوللەدج بەن ۋنيۆەرسيتەت ستۋدەنتتەرىن اقىلى وندىرىستىك تاجىريبەدەن وتكىزۋ قاراستىرىلعان. سوڭعى ەكى جىلدا ماڭعىستاۋ پوليتەحنيكالىق كوللەدجىنىڭ بىرنەشە ستۋدەنتى وسى مۇمكىندىكتى پايدالانىپ, ەكەۋى جول قۇرىلىسى سالاسىنا جۇمىسقا ورنالاستى.
– بۇل باعىتتا جۇمىستار وسى قارقىندا جالعاساتىن بولسا, ياعني جىلىنا مەكتەپ بىتىرۋشىلەر اراسىندا 2-3 جاس جول سالاسىنداعى ماماندىقتى تاڭداسا, قازاقستان بويىنشا ماسەلە تاياۋ جىلدارى شەشىلەدى دەپ سەنەمىز, – دەيدى ت.ءادىل.
ماڭعىستاۋ وبلىسى
