بانكتىڭ نەگىزگى باعىتتارى تالقىلانعان قابىلداۋ

مەملەكەت باسشىسى نۇرسۇلتان نازارباەۆ ەۋرازيالىق دامۋ بانكى باسقارماسىنىڭ توراعاسى يگور فينوگەنوۆتى قابىلدادى, دەپ حابارلادى پرەزيدەنتتىڭ ءباسپاسوز قىزمەتى. كەزدەسۋدە بانكتىڭ ەلىمىزدەگى جۇمى­سىنىڭ نەگىزگى باعىتتارى تالقىلاندى, سونداي-اق, ونىڭ 2006 جىلى قازاقستان مەن رەسەيدە ۋاكىلەتتى وكىلدىگى بەكىتىلگەن كەزدەن بەرگى قىزمەتىنىڭ ارالىق قورىتىندىلارى شىعارىلدى. وسى جىلدار ىشىندە قازاقستان ەكونوميكاسىنا 2 ميللياردتان استام دوللار سالىنعانى, ەلەكتر ەنەرگەتيكاسى, كولىكتىك ماشينا جاساۋ, حيميا ونەركاسىبى سالالارىمەن قاتار, ءتۇرلى سالالاردا 28 جوبا ىسكە اسىرىلعانى اتاپ ءوتىلدى. قازىرگى ۋاقىتتا تاعى 28 جوبا قارالۋ ۇستىندە. مەملەكەت باسشىسى بانك جۇمىسىنىڭ كورسەتكىشتەرى ونىڭ دامۋىنىڭ وڭ ديناميكاسىن كورسەتەتىنىن اتاپ ءوتتى. نۇرسۇلتان نازارباەۆ ءبىزدىڭ ەل بانكتىڭ ءوز قىزمەتىن كەڭەيتۋ, كاپيتالىن ۇلعايتۋ جانە جاڭا مۇشەلەر قوسۋ جونىندەگى نيەتىنە دۇرىس قارايتىنىن ايتتى. ءوز كەزەگىندە, ي.فينوگەنوۆ بانكتىڭ قازاقستاندا جۇمىس ىستەۋى ءۇشىن جاسالعان قولايلى جاعدايعا ريزاشىلىعىن ءبىلدىردى. ول, سونىمەن قاتار ەۋرازيالىق دامۋ بانكى قىزمەتىنىڭ قازاقستاندا مەملەكەتتىك جانە سالالىق باعدارلامالاردىڭ اياسىندا جۇزەگە اسىرىلىپ جاتقان باسىمدىعى بار جوبالارعا شوعىرلاندىرىلعان نەگىزگى باعىتتارى تۋرالى باياندادى.  سونىمەن قاتار, بانكتىڭ الماتىداعى شتاب-پاتەرى ارقىلى ەكىنشى دەڭگەيلى سەرىكتەس بانكتەرمەن شاعىن جانە ورتا بيزنەستى قارجىلاندىرۋدى دامىتۋ جونىندە جۇمىستار جۇرگىزىلۋدە. ەدب باسشىسى بانك ءوزىنىڭ باعالى قاعازدارىن شىعارۋدى جوسپارلاي وتىرىپ, قازاقستاننىڭ قارجى نارىعىن دامىتۋعا دا بەلسەندى قاتىساتىنىن اتاپ ءوتتى. بۇل جوبالاردى ۇلتتىق ۆاليۋتا ارقىلى قارجىلاندىرۋدى ۇلعايتۋعا مۇمكىندىك بەرەدى. ----------------------------------------- سۋرەتتەردى تۇسىرگەندەر س.بوندارەنكو, ب.وتارباەۆ.