بۇقپا تاۋىنىڭ باۋرايى تۇكتى كىلەمدەي قۇلپىرادى. مەيرامعا جينالعان حالىقتىڭ كوڭىلى دە تابيعاتتىڭ وسى ءبىر تاماشا شاعى ءتارىزدى بۇرلەنىپ, القىزىل گۇلمەن كومكەرگەندەي. ەل كوڭىلى كوتەرىڭكى. ءبىر-بىرىنە توي قۇتتى بولسىن ايتىسىپ, ىزگى تىلەكتەرىن بىلدىرۋدە. كوكشەتاۋ قالاسىنىڭ قۇرمەتتى ازاماتى, ەڭبەك ارداگەرى, ەل اعاسى راشيد گاينۋللين اقساقالدىڭ ايتۋىنا قاراعاندا, سابانتوي سان عاسىردان بەرى جالعاسىپ كەلە جاتقان ۇلتتىڭ ۇلاعاتتى مەيرامى. نەگىزگى ءمانى كوكتەمگى ەگىستى تىڭعىلىقتى اياقتاعان سوڭ, ارقالارىنان اۋىر جۇك تۇسكەندەي, جاۋاپتى ماۋسىمدى ەڭسەرگەن ەل ءبىر جادىراپ قالماق. قاھارلى قىستان امان وتكەن, ەل ىرىزدىعىنىڭ نەگىزى قالانعان, جادىراعان جازبەن قاۋىشقان شاقتا بارشا جۇرتتىڭ باسى قوسىلىپ, ارقا-جارقا بولىپ توي تويلاماق. جاي عانا توي ەمەس, بەيبىتشىلىك سۇيگىش ادامزات بالاسىنىڭ ەڭبەك مەرەكەسى ىسپەتتى. ەرتەرەكتە الدىنان جۇمىس ۇركىپ وتىراتىن ەڭبەك وزاتتارىن قۇرمەتتەپ, كەيىنگى ۇرپاققا ۇلگى رەتىندە كورسەتكەن. دوستىقتىڭ التىن ارقاۋىن بەكىتكەن. قوڭسى قونعان كورشىلەس اعايىنمەن تاتۋ-ءتاتتى تىرلىكتىڭ بەدەرى بەينەلى بەرەكەلى شاعىن باياندى ەتۋدىڭ بارىسى قاراستىرىلعان. البەتتە, ۇلتتىق ونەردىڭ ءورىسى, جان جادىراتار جىلى شۋاعى ۇمىت قالمايدى. سونداي-اق ەر جىگىتتىڭ ەرلىگى سىنعا تۇسەر سپورتتىق ويىندار دا ۇيىمداستىرىلماق.
الدىمەن وبلىس اكىمىنىڭ ورىنباسارى ەلدوس رامازانوۆ وڭىردە ءبىر جاعادان باس, ءبىر جەڭنەن قول شىعارىپ, ىنتىماقپەن كۇن كەشىپ جاتقان جۇزدەگەن ۇلت وكىلدەرىنىڭ ىشىندە وزگە جۇرت ءتارىزدى تاتار مەن باشقۇرت حالىقتارىنىڭ دا ۇلتتىق بولمىسى ساقتالۋىنا قامقورلىق جاساپ جاتقاندىعىن, ەشتەڭەدەن كەندە ەمەستىگىن ايتىپ ءوتتى.
– تاتار-باشقۇرت حالىقتارى تاعدىرلاس, ۇلتتىق سالت-ءداستۇرى وتە ۇقساس ەل, – دەدى وبلىستىق تاتار-باشقۇرت قوعامدىق بىرلەستىگىنىڭ باسشىسى رافايل سۋلكارناەۆ. – بۇگىنگى كوكشەنىڭ باۋرايىنداعى سابانتويعا سوناۋ قازاننان تاتارستاننىڭ ەڭبەك سىڭىرگەن ءارتىسى ەلميرا احماتوۆا مەن تاتارستاننىڭ رەسپۋبليكالىق جانە حالىقارالىق بايقاۋلارىنىڭ جەڭىمپازى, بەلگىلى ءانشى يلناز گاراەۆ كەلىپ كوپشىلىك كوڭىلىن كوتەرۋدە. جەرگىلىكتى «عاليابانۋ» ءانسامبلى دە ءوز ونەرلەرىمەن توي شىرايىن كەلتىرۋدە. ءبىز قاي جەردە جۇرسەك تە, قاي ەلدى مەكەن ەتسەك تە ۇلتىمىزدىڭ ۇلىق قاسيەتىن ساقتاۋعا ۇمتىلامىز. سوعان مۇمكىندىك تۋعىزىپ, قامقورلىق جاساپ وتىرعان قازاق ەلىنە مىڭ العىس. ءبىز بۇگىندە ءبىر اتانىڭ بالاسى ءتارىزدى ءبىر-بىرىمىزگە باۋىر باسىپ, بىتە قايناسىپ كەتتىك.
مەيرام بارىسىندا مەيماندارعا تاتار-باشقۇرت حالقىنىڭ ءدامى ءتىل ۇيىرەتىن ۇلتتىق اسى ۇسىنىلىپ, بالۋاندار بەلدەسىپ, ەپتىلەر باعانا باسىنا شىعىپ, نەشە ءتۇرلى ويىن-ساۋىق وتكىزدى.
– كورشىمىز تاتار وتباسى بولعان سوڭ ءبىز دە مەيرامدارىن كورىپ, تاماشالاۋعا كەلدىك, – دەيدى كوكشەتاۋ قالاسىنىڭ تۇرعىنى نۇرلان الپىسباەۆ. – جالعىز مەرەكە كۇندەرى عانا ەمەس, ءومىردىڭ بارلىق ساتىندە دە بىرگەمىز عوي. ءتىلى دە تۇسىنىكتى, تىلەگى دە بەلگىلى. ءسىز, ءبىز دەپ سىيلاسىپ كۇن كەشىپ كەلە جاتىرمىز. ۇلتتىق مەرەكەلەرىنىڭ مانىنە قاراسام, ەلگە ىرىزدىق تىلەگەن, جاس ۇرپاققا ءتالىم-تاربيە بەرەتىن تۇسى مول ەكەن. دەمەك سابانتوي قوسىلا سوققان ءار جۇرەكتەن ورىلەتىن ىزگى تىلەك پەن اق نيەتتىڭ قۇنداعى ىسپەتتى ءىس-شارا ەكەن عوي.
بۇقپا باۋرايى مەرەكەلىك كوڭىل كۇيمەن الاۋلاپ تۇردى. تاعىلىمى مول توي ۇستىندە جاراسقان بىرلىكتىڭ, جاراسىمدى تىرلىكتىڭ تىنىسى اتوي سالعانداي. جۇزدەرىنە كۇلكى ۇيىرىلگەن اعايىننىڭ اق تىلەگى ۋىزداي ۋىلجىپ, جان جادىراتادى.
كوكشەتاۋ
