وسىنداي مەملەكەتتىك دەڭگەيدەگى اسا ماڭىزدى ساياسي ءىس-شارانىڭ سارىارقانىڭ تورىندە – قازاقتىڭ حان-سۇلتاندارىنىڭ ءىزى قالعان سايىن دالانىڭ توسىندە وتكىزىلۋىنىڭ ءمانى تەرەڭدە جاتىر.
ەرتە زاماننان قۇرىلتاي ەل تاعدىرى شەشىلەتىن اسا ماڭىزدى وقيعالار الدىندا شاقىرىلعان. ۇلتتىق قۇرىلتاي جاڭا قازاقستاندى قۇرۋعا تۇتاس ەلدى جۇمىلدىرۋ ءۇشىن قۇرىلدى.
بۇل قۇرىلتاي – ادىلەتتى قازاقستاندى قۇرۋعا قاجەتتى باتىل دا جاسامپاز يدەيالاردى ۇسىناتىن ورتا بولسا, ۇلىتاۋ – پرەزيدەنت ايتپاقشى, جاڭا قازاقستاندى قۇرۋ جولىنداعى بىرلىكتىڭ سيمۆولىنا اينالدى.
ۇلتتىق قۇرىلتايدىڭ ءوزى – قازاقستاندىق قوعامنىڭ دەموكراتيالىق قاعيدالارمەن ءومىر سۇرە باستاعانىن اڭعارتادى. پرەزيدەنت ونىڭ ەلەكتروندى نۇسقاسىن جاساۋدى تاپسىردى. ەندى Qurultay دەگەن ارنايى ءموبيلدى قوسىمشاسى ارقىلى كەز كەلگەن ادام ادىلەتتى قازاقستاندى قۇرۋ جولدارى تۋرالى ءوز ۇسىنىسىن جەتكىزە الادى. بۇل – جاڭا قازاقستاندا ءاربىر ازاماتتىڭ وي-پىكىرى ماڭىزدى دەگەن ءسوز.
وسى جولى پرەزيدەنت «حالىق ۇنىنە قۇلاق اساتىن مەملەكەتكە» اينالعانىمىزدى كورسەتتى. ونىڭ دالەلى – قاسىم-جومارت كەمەل ۇلى ءوز سوزىندە قازىرگى كەزدە قوعامدىق پىكىردى الاڭداتقان وتكىر ماسەلەلەردىڭ بارلىعىنا دەرلىك جاۋاپ بەردى.
اۋليەتاۋدىڭ ەتەگىندە مەملەكەتتىك رامىزدەر الاڭىن اشۋ تۋرالى ۇسىنىسى – كوك تۋىمىزدىڭ قادىرىن قاشىرعان وقيعا تۋرالى قوعامداعى سوڭعى تالقىلاۋلارعا جاۋاپ. ال 25 قازاندى رەسپۋبليكا كۇنىنە ۇلتتىق مەرەكە مارتەبەسىن قايتارىپ, ەگەمەندىك كۇنى دەپ بەلگىلەۋ تۋرالى شەشىم – كوزى قاراقتى ازاماتتار كوپتەن بەرى ايتىپ جۇرگەن ماسەلە.
بۇدان بولەك, ۇلتتىق تاريحتىڭ كوپتومدىعىن ازىرلەۋ, زياتكەرلىك قابىلەتى جوعارى, ويى ۇشقىر, ەڭبەكقور جاستار تاربيەسىن جولعا قويۋ, ءتىل ءبىلىمى ينستيتۋتىنا قازاق ءتىلىنىڭ جاڭا ورفوگرافياسى تۋرالى ارنايى ەڭبەك ازىرلەۋدى تاپسىرۋ – قوعامدىق سۇرانىستان تۋىنداعان شەشىمدەر.
ال «قازاق مەملەكەتى امان تۇرعاندا, قازاق ءتىلى جاساي بەرەدى. بۇعان ەشقانداي كۇمان بولماۋى كەرەك» دەگەن ءسوزى – قوعامداعى ەڭ ۇلكەن تۇيتكىلدەردىڭ بىرىنە تويتارىس بەرۋى.
شەتەلگە زاڭسىز شىعارىلعان قارجىنى ەلگە قايتارۋمەن اينالىساتىن ارناۋلى مەكەمەارالىق كوميسسيا قۇرۋ تۋرالى شەشىم – ءادىل قوعامداعى بارشاعا تەڭ قاراۋ قاعيداسىمەن ۇيلەسەدى. پرەزيدەنت «ەسكى قازاقستاننىڭ» كادرلارىن بىرتىندەپ اۋىستىرۋ تۋرالى دا استارلاپ ايتىپ ءوتتى.
يسلامبەك سالجانوۆ,
اltyn Kyran حالىقارالىق قايىرىمدىلىق قورىنىڭ پرەزيدەنتى
