جازعى مەكتەپتىڭ سالتاناتتى اشىلۋىندا پرەزيدەنت ءارحيۆىنىڭ ديرەكتورى ءاليا مۇستافينا, قازاقستان رەسپۋبليكاسى تۇڭعىش پرەزيدەنتى – ەلباسى كىتاپحاناسىنىڭ ديرەكتورى باقىتجان تەمىربولات, ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورى جانسەيىت تۇيمەباەۆ, رەسەي مەملەكەتتىك گۋمانيتارلىق ۋنيۆەرسيتەتىنىڭ پرەزيدەنتى ەفيم پيۆوۆار, بۇكىلرەسەيلىك ارحيۆ ءىسى جانە قۇجاتتانۋ عىلىمي-زەرتتەۋ ينستيتۋتىنىڭ ديرەكتورى پاۆەل كيۋنگ, وزبەكستان رەسپۋبليكاسى ء«وزارحيۆ» اگەنتتىگىنىڭ ديرەكتورى ۇلىقبەك يۋسۋپوۆ, بەلارۋس ارحيۆ ءىسى جانە قۇجاتتانۋ عىلىمي-زەرتتەۋ ينستيتۋتىنىڭ ديرەكتورى اندرەي رىباكوۆ قاتىسۋشىلاردى قۇتتىقتاپ ءسوز سويلەدى.
فورۋم قازاقستان پرەزيدەنت اكىمشىلىگى جالپى ءبولىمىنىڭ مەڭگەرۋشىسى نۇرداۋلەت تولەەۆتىڭ كىرىسپە سوزىنەن باستالدى. تىڭداۋشىلاردىڭ بىلىكتىلىگىن ارتتىرۋعا, ارحيۆ ىسىندە جاڭا يدەيالاردى جۇزەگە اسىرۋعا, IT-تەحنولوگيالاردى قولدانۋدى ىلگەرىلەتۋگە, قاتىسۋشى ەلدەردىڭ ارحيۆ قىزمەتتەرى اراسىنداعى ارىپتەستىك قاتىناستارىن نىعايتۋعا ىقپال ەتەتىن تانىمال ديالوگ جانە وزىق تاجىريبە الماسۋ الاڭىنا اينالعان جاس ارحيۆشىلەردىڭ جازعى مەكتەبىنىڭ جۇمىسىنا جاقسى ناتيجەلەر مەن ساتتىلىكتەر تىلەدى. «بۇگىندە بۇكىل الەم جىلدام دامۋ وزگەرىسى جاعدايىنداعى اۋمالى-توكپەلى زاماندا ءومىر سۇرۋدە. بىرىنشىدەن, بۇل ءبىزدىڭ جاڭا سىن-تەگەۋرىندەرگە توتەپ بەرۋگە زەرەكتىگىمىزدى تەكسەرسە, ەكىنشىدەن, جاڭا ءبىلىمدى يگەرۋ ارقىلى باسەكەگە قابىلەتتىلىگىمىزدى ارتتىرۋ ءۇشىن جاڭا مۇمكىندىكتەر اشادى. بۇل تەزيستەردىڭ ارحيۆ ىسىنە تولىقتاي قاتىسى بار», دەپ اتاپ ءوتتى نۇرداۋلەت تولە ۇلى.
قازاقستان رەسپۋبليكاسى پرەزيدەنتى ءارحيۆىنىڭ ديرەكتورى ءا.مۇستافينا ءوز سوزىندە قوعام ءومىرىنىڭ بارلىق سالاسىندا بولىپ جاتقان ىرگەلى وزگەرىستەر ءار ەلدىڭ ارحيۆتەرىنىڭ الدىنا جاڭا سىن-تەگەۋرىندەر قويىپ جاتقانىنا نازار اۋداردى. بۇگىندە قۇجاتتاردى ساقتاۋ ارحيۆ ءىسى شەڭبەرىنەن شىعىپ, ءاربىر مەملەكەتتىڭ ورنىقتى دامۋىنىڭ ستراتەگيالىق ماڭىزدى باعىتتارىنىڭ تىزبەگىنە يە بولدى. قازىرگى قوعامداعى اقپارات ءرولىنىڭ ارتۋى ارحيۆ قۇجاتتارىنىڭ تۇراقتى قۇندىلىعىن ارتتىردى. وسى جاڭاشىل باستامالاردى يگەرۋ ءۇشىن جىل سايىن تىلەك بىلدىرۋشىلەر سانى ارتىپ كەلەدى. ەگەر 2017 جىلى 49 ادام قاتىسسا, وتكەن جىلى – 276, بيىل 360 ءوتىنىش كەلىپ ءتۇستى. «بۇل جاس مامانداردىڭ كوپ بولىگى وزدەرىنىڭ كاسىبي بىلىكتىلىگىن ارتتىرۋعا مۇددەلى ەكەنىن بىلدىرەدى», دەپ اتاپ ءوتتى ءاليا قۇسايىنقىزى.
بۇگىندە بەدەلى ارتىپ, بىرنەشە ەلدىڭ بەلدى عالىمدارىنىڭ باسىن ءبىر ارناعا قوسقان جاستار فورۋمىندا جاڭا تەحنولوگيالار مەن ارحيۆ ءىسى سالاسىنداعى زاماناۋي ادىستەردى ۇيرەتۋ – باستى مىندەت. وسى ماقساتتا ءار ەلدىڭ ارحيۆتەرىنىڭ ۇزدىك ماماندارى – رەسەيلىك ميحايل لارين, پاۆەل كيۋنگ, فيليپپ تاراتوركين, لادا افاناسەۆا, نيكولاي تسىرەمپيلوۆ, بەلورۋسسيالىق اندرەي رىباكوۆ, وزبەكستاندىق انۆارجون اليەۆ, وڭتۇستىككورەيالىق مۋن حيون سۋك, قىتايلىق ليۋ يۋەنان مەن موڭعوليالىق بايانبيلەگ امارجاۆتان جانە قازاقستاندىق ءارحيۆشى عالىمدار ءاليا مۇستافينا, مارس گابباسوۆ جانە قايرات الىمعازينوۆ ءدارىس وقىدى.
بۇگىنگى تسيفرلىق فورماتقا كوشۋ ۇردىسىنە بايلانىستى الەمدەگى كەشەندى وزگەرىستەر كەزەڭىندە قۇندى اقپاراتتاردى ساقتاپ قالۋ بويىنشا ساقتىق قادامدارى جاسالۋى قاجەت. زامان تالابىنا ساي ارحيۆتىك قۇجاتتىڭ ەلەكتروندىق نۇسقاسىن پايدالانۋ وڭتايلى شەشىم بولعانىمەن, تسيفرلىق ترانسفورماتسيا تەحنولوگياسىن ەنگىزۋدە كيبەر شابۋىلداردىڭ قۇربانى بولۋى مۇمكىندىگىنىڭ جوعارى ەكەنىن ەستەن شىعارماعان ابزال. سوندىقتان ارحيۆتىك قۇجاتتاردىڭ تۇپدەرەكتەرىن ساقتاۋدىڭ ءجونى بولەك. بۇل جاۋاپتى جۇمىستاردى يگەرىپ جۇرگەن ارحيۆشىلەرگە دەگەن تالاپتار كۇن ساناپ ءوسىپ, زاماناۋي بىلىكتى ماماندار دايارلاۋ ءار مەملەكەتتىڭ باسىم باعىتتارىنا اينالىپ وتىر. وسى ماقساتتا ۇيىمداستىرىلعان جاس ارحيۆشىلەردىڭ تاجىريبە الماسۋعا ارنالعان ءداستۇرلى جازعى فورۋمىن ۋاقىت تالابىنا ساي كادر دايارلاۋدىڭ الاڭى دەپ بىلەمىز. تەحنولوگيانىڭ ءتىلى قارىشتاپ دامىپ جاتقان زاماندا ارحيۆتىك قۇجاتتاردىڭ تسيفرلىق فورماتىنىڭ دەرەك قورىن كاسىبي مەڭگەرگەن ءارحيۆشى ماماندار دايارلاۋ – بۇگىنگى باستى پارىز.
اتالعان شارا جاس ارحيۆشىلەردىڭ بىلىكتىلىگىن ارتتىرۋعا, جاڭا تەحنولوگيالار مەن ارحيۆ جۇمىسىنداعى زاماناۋي ادىستەرمەن تانىسۋعا, ارحيۆ سالاسىنداعى حالىقارالىق قاتىناستاردى دامىتۋعا باعىتتالعان. ءىس-شاراعا وتاندىق ارحيۆشىلەرمەن قاتار, ارمەنيا, ازەربايجان, بەلارۋس, قىرعىزستان, قىتاي, موڭعوليا, وزبەكستان, رەسەي فەدەراتسياسى, وڭتۇستىك كورەيا سەكىلدى شەت مەملەكەتتەردىڭ 350-دەن استام مامانى قاتىستى. بيىل وزبەكستاندىق, قىرعىزستاندىق ارحيۆشىلەر جيىننىڭ قادىرمەندى قوناعى بولدى. قازىرگى وقىتۋدىڭ ونلاين فورماتى گەوگرافيالىق شەڭبەردى كەڭەيتىپ, قاتىسۋشىلار قۇرامىن تۇرلەندىرە ءتۇستى. تۇڭعىش رەت تىڭداۋشىلار رەتىندە تمد ەلدەرىنەن تىس قىتاي جانە موڭعوليا ەلدەرىنىڭ ارحيۆ سالاسىنىڭ قىزمەتكەرلەرى قاتىستى.
ۇيىمداستىرۋشىلار ارحيۆ ءىسىن دامىتۋعا باعىتتالعان جازعى مەكتەپتىڭ جاس ارحيۆشىلەر ءۇشىن ماڭىزى زور. مادەنيەتى مەن وركەنيەتى توعىسقان ەلدەردەن كەلگەن فورۋمنىڭ قاتىسۋشىلارى كەلەسى جىلى الماتى قالاسىندا باس قوسىپ, الەمنىڭ جازبا تاريحىن ساقتاۋدا پارىقتى ويلارىمەن ءبولىسىپ, پاراساتتى جيىندى جالعاستىرامىز دەپ تارقاستى.
الماتى
