«ۇلكەن دۋلىعا» ساناتىنا جاتاتىن بۇل ءتۋرنيردىڭ 145 جىلدىق تاريحى بار. ونىڭ تۇساۋى سوناۋ 1877 جىلى كەسىلدى. سول كەزدەن بەرى «ۋيمبلدوننىڭ»» فورماتى سان مارتە وزگەردى. قازىرگى كەزدە ول كوك مايسا ءشوپتىڭ ۇستىندە وتەتىن جالعىز جارىس. وسى دودانىڭ ەرلەر سايىسىندا ەڭ زور تابىسقا جەتكەن ۇلىبريتانيانىڭ وكىلدەرى. كورت قوجايىندارى 37 رەت جەڭىس تويىن تويلادى. اقش تەننيسشىلەرى 33 مارتە توپ جارسا, اۋستراليانىڭ 21 ورەنى تەڭدەسسىز دەپ تانىلدى. ايەلدەر اراسىندا امەريكالىقتار الدىنا جان سالار ەمەس. ولار 57 رەت دارا شىقتى. جەرگىلىكتى ويىنشىلاردىڭ 36 مارتە مەرەيى ۇستەم بولدى.
جەكەلەگەن سايىستاردا ولجالاعان باس جۇلدەلەردىڭ سانى بويىنشا رودجەر فەدەرەرگە تەڭ كەلەر ەشكىم جوق. شۆەيتساريانىڭ ماقتانىشى سەگىز جارىستىڭ جەڭىمپاز اتاندى. وتكەن عاسىردىڭ سوڭىندا اتوي سالعان امەريكالىق پيت سامپراس جەتى تۋرنيردە توپ جاردى. بۇگىنگى تاڭداعى تەڭدەسسىز تەننيسشىلەردىڭ ءبىرى سەربيالىق نوۆاك دجوكوۆيچ التى رەت دارا شىقتى. ءدال سونداي كورسەتكىش ءحىح عاسىردا ونەر كورسەتكەن ۇلىبريتانيالىق ۋيليام رەنشوۋعا تيەسىلى.
ايەلدەر اراسىندا مارتينا ناۆراتيلوۆانىڭ شوقتىعى بيىك. كەزىندە چەحوسلوۆاكيادان اقش-قا قونىس اۋدارعان داڭقتى تەننيسشىسى 1978-1979, 1982-1987, 1990 جىلداردا وتكەن جارىستاردا باس جۇلدەنى ولجالادى. بارلىعى – 9 جەڭىس! وتكەن عاسىردىڭ العاشقى جارتىسىندا ءدۇيىم جۇرتتى اسقان شەبەرلىگىمەن ءتانتى ەتكەن حەلەن ۋيللس-ءمۋديدىڭ (اقش) جەتى جانە دوروتەيا لامبەرت-چامبەرستىڭ ( ۇلىبريتانيا) سەگىز تۋرنيردە باق جۇلدىزدارى جاندى. ءدال سونداي كورسەتكىشكە شتەففي گراف (گەرمانيا) پەن سەرەنا ۋيليامس تە (اقش) قول جەتكىزدى. جالپى ءۋيليامستىڭ ناۆراتيلوۆادان اسىپ تۇسۋگە تاماشا مۇمكىندىگى بولعان ەدى. ويتكەنى ول فينالعا 11 رەت شىقتى. جەتەۋىندە جەڭىسكە جەتسە, تورتەۋىندە جەڭىلىس تاپتى. ال جەكەلەگەن, جۇپتىق جانە ارالاس جۇپتار اراسىنداعى باسەكەلەردى قوسا العاندا ەڭ زور تابىسقا قول جەتكىزگەن بيللي دجين كينگ پەن مارتينا ناۆراتيلوۆا. اقش-تىڭ قوس مىقتىسى كۋبوكتى توبەلەرىنە 20 رەتتەن كوتەردى.
«ۋيمبلدوندا» كوپتەگەن رەكوردتىق كورسەتكىش تىركەلدى. ماسەلەن, 2010 جىلعى جارىستىڭ العاشقى اينالىمىندا امەريكالىق دجون يزنەر مەن فرانتسيالىق نيكوليا مايۋ اراسىنداعى وتكەن كەزدەسۋ 11 ساعات 05 مينۋتقا سوزىلدى. قوس ساڭلاق ءۇش كۇن بويى سايىسقا ءتۇستى. ناتيجەسىندە, 6:4, 3:6, 6:7, 7:6, 7:6 ەسەبىمەن يزنەر جەڭىسكە جەتتى. بۇل – تەننيس تاريحىنداعى ەڭ ۇزاققا سوزىلعان ماتچ. ءدال سول جىلى اقش ويىنشىسى تەيلور دەنتتىڭ سوققىسىنان كەيىن دوپ ساعاتىنا 238 شاقىرىمدىق جىلدامدىقپەن زىمىرادى. ايەلدەر اراسىندا ەڭ قۋاتتى سوققى سەرەنا ۋيليامسكە تيەسىلى. ايگىلى امەريكالىق ويىنشىنىڭ كورسەتكىشى – 208 شاقىرىم. گەرمانيالىق بوريس بەككەر مەن اقش-تىڭ وكىلى دەنيس رالستون «ۋيمبلدوندى» 17 جاستان اسقان شاعىندا ۇتسا, شۆەيتساريالىق مارتينا حينگيس پەن اۋستراليالىق لوتتي دودقا بۇل بەلەس 15 جاسىندا باعىندى. ال «ۋيمبلدوندا» دارالانعان «ەڭ قارت» ويىنشىلار ءتىزىمىن مارتينا ناۆراتيلوۆا باستاپ تۇر. 2003 جىلى ارالاس جۇپتار سايىسىندا توپ جارعاندا ول 46 جاستا ەدى...
قازاقستاننىڭ تەننيسشىلەرى اراسىندا لوندونداعى تۋرنيردە ەڭ جاقسى ناتيجە كورسەتكەن ياروسلاۆا شۆەدوۆا ەكەنى بارشاعا ءمالىم. بىلتىر عانا سپورتتىق جولىن اياقتاعان جەرلەسىمىز 2016 جىلى جەكەلەگەن سايىستا شيرەك فينالعا دەيىن جەتتى. يۋليا گەرگەس, ەلينا سۆيتولينا, سابينا ليسيتسكي جانە ليۋسي شافارجوۆا سىندى مىقتىلاردى ۇتقان ول ۆينۋس ۋيليامسكە ەسە جىبەردى. ەسەسىنە جۇپتىق باسەكەدە ماجارستاندىق تيميا بابوشپەن بىرگە وتانداسىمىز فينالعا دەيىن جەتتى. ال 2010 جىلى ءدال وسى «ۋيمبلدوندا» ۆانيا كينگ پەن ياروسلاۆا شۆەدوۆا جۇبى باس جۇلدەنى ولجالاعان ەدى. وكىنىشكە قاراي, وزگە تەننيسشىلەرىمىزدىڭ ەشقايسىسى شۆەدوۆانىڭ كورسەتكىشىن قايتالاي العان جوق. وسى ورايدا 2014 جانە 2015 جىلدارى زارينا دياستىڭ, 2019 جىلى ميحايل كۋكۋشكيننىڭ جانە 2021 جىلى ەلەنا رىباكينا مەن الەكساندر بۋبليكتىڭ ءتورتىنشى كەزەڭدە ونەر كورسەتكەنىن ايتا كەتكەن ابزال.
بىلتىر ۇلىبريتانيانىڭ استاناسىندا بەس تەننيسشىمىز كۇش سىناستى. رىباكينا مەن بۋبليكتىڭ شيرەك فينالعا دەيىن جەتكەنىن جوعارىدا ايتتىق. بۇل مەجەدە ەلەنا بەلارۋستىك ارينا سوبولەنكودان, الەكساندر پولشالىق حۋبەرت حۋركاچتان جەڭىلدى. يۋليا پۋتينتسەۆا ەكىنشى اينالىمدا يسپانيالىق پاۋلا بادوساعا جول بەرسە, زارينا دياس پەن ميحايل كۋكۋشكين تۇساۋكەسەر كەزدەسۋلەرىندە ءسۇرىندى. «ۋيمبلدون-2021» تۋرنيرىندە ەرلەر اراسىندا نوۆاك دجوكوۆيچ دارا شىقتى. سەربيانىڭ ساڭلاعى اقتىق ايقاستا 6:7, 6:4, 6:4, 6:3 ەسەبىمەن يتاليالىق ماتتەو بەررەتتينيدەن باسىم ءتۇستى. ايەلدەر سايىسىندا ەشلي ءبارتيدىڭ باعى جاندى. اۋستراليالىق ارۋ چەحيالىق كارولينا پليشكوۆادان باسىم ءتۇستى – 6:3, 6:7, 6:3.
