ءمينيستردىڭ ايتۋىنشا, بۇگىندە «Astana Hub حالىقارالىق IT-ستارتاپتار تەحنوپاركى» كورپوراتيۆتىك قورى بازاسىندا IT-مەكتەپتەرگە ۆاۋچەرلەر (گرانتتار) ءبولۋ تەتىگى ازىرلەنگەن 2021 جىلى Astana Hub ءوز قاراجاتى ەسەبىنەن 13 IT-باعدارلامالاۋ مەكتەبىنىڭ 100 ستۋدەنتىن قارجىلاندىرعان. باعدارلامانى كەڭەيتۋ اياسىندا بيىل تاعى 3 مىڭ گرانت ءبولۋ جوسپارلاندى.
ۆەدومستۆو حابارلاعانداي, IT-كادرلاردى وقىتۋ 20 مىڭنان استام جاڭا جۇمىس ورنىن قۇرۋعا جانە اقپاراتتىق كوممۋنيكاتسيالىق تەحنولوگيالار قىزمەتتەرىنىڭ ەكسپورتىن 2025 جىلعا قاراي 500 ملن دوللارعا دەيىن ۇلعايتۋعا سەپتىگىن تيگىزەدى. الايدا بۇل ءۇشىن IT-مامانداردىڭ ءبىلىم ساپاسىن ارتتىرۋ قاجەت. بۇگىندە رەسپۋبليكا بويىنشا 77 جوعارى وقۋ ورنى IT-مامانداردى دايىنداسا, جىل سايىن 10 مىڭنان استام IT-مامان ەڭبەك نارىعىنا جىبەرىلەدى. بىراق كادرلار كوپ جاعدايدا زاماناۋي تالاپتارعا سايكەس كەلە بەرمەيدى ەكەن. سوندىقتان وسى سالاعا ساپالى ماماندار دايارلاۋ دا كۇن تارتىبىندە تۇر.
سالانى نەعۇرلىم تسيفرلاندىرۋ ماقساتىندا قۇجاتتاردى ەلەكتروندى قابىلداۋعا دا ءمان بەرىلۋدە. وسىعان بايلانىستى اقپاراتتىق جۇيەلەردىڭ دايىندىعىن دا مينيسترلىك ەرەكشە اتاپ ءوتتى. مينيستر ب.ءمۋسيننىڭ حابارلاۋىنشا, 2022 جىلى 160 مىڭ تۇلەك كوللەدجدەردە جانە 140 مىڭ تۇلەك جوعارى وقۋ ورىندارىندا ءبىلىم الادى دەگەن بولجام بار.
«قۇجاتتاردى قابىلداۋ جانە ءبىلىم بەرۋ گرانتتارىن ءبولۋ كەزەڭىندە ەلەكتروندى جۇيەلەردىڭ ۇزدىكسىز جۇمىس ىستەۋىن قامتاماسىز ەتۋ كەرەك. ءبىز نەگىزگى پروبلەمالاردى انىقتادىق. بارلىق تسيفرلى شەشىمدى تەكسەرىپ, قولبايلاۋ بولىپ وتىرعان ماسەلەلەردى رەتكە كەلتىرۋىمىز قاجەت. بۇل شەكتى بالداردى ەسەپكە الۋ, وتىنىشتەردى قابىلداۋ پروتسەسى جانە ءبىر تالاپكەردىڭ ءوتىنىشتى قايتالاپ جىبەرۋىن بولدىرماۋ جانە باسقا دا ماسەلەلەر. بارلىق تۇلەككە بارىنشا قولايلى جاعداي جاساۋ ءۇشىن بىرلەسىپ جۇمىس ىستەۋىمىز كەرەك. بۇل ءار ادام تۇرعىلىقتى جەرىنە قاراماستان ەلەكتروندى قىزمەتتەردى كەدەرگىسىز پايدالانۋ مۇمكىندىگىنە يە بولۋ ءۇشىن ماڭىزدى», دەيدى مينيستر.
ب.مۋسين «اتامەكەن» ۇكپ بازاسىندا IT-فاكۋلتەتتەردىڭ رەيتينگىن ەنگىزۋدى ۇسىندى. ۆەدومستۆو اقپاراتتىق-كوممۋنيكاتسيالىق تەحنولوگيالار سالاسىنداعى ساراپشىلارمەن بىرگە رەيتينگ تۇجىرىمداماسىنىڭ جوباسىن دايىنداعان.
جالپى, تسيفرلاندىرۋ ءبىلىم بەرۋ سالاسىنا, بەلسەندى تۇردە ەنگىزىلىپ جاتىر. بۇگىندە مينيسترلىك «ۆيرتۋالدى مۇعالىم» زاماناۋي IT-پلاتفورمالارىن ەنگىزۋ بويىنشا جۇمىس جۇرگىزۋدە. اتالعان جۇيەگە قازىرگى كەزدە قازاقستان بويىنشا 150-دەن استام جالپى ءبىلىم بەرەتىن مەكتەپ قوسىلعان. دەگەنمەن ينفورماتيكا مۇعالىمدەرىنىڭ بىلىكتىلىگىنە قاتىستى پروبلەمالار كەزدەسەدى. وسىعان بايلانىستى بىلىكتىلىكتى ارتتىرۋعا باعىتتالعان باعدارلامانى نەمەسە كۋرستاردى ازىرلەۋ بويىنشا ۇسىنىس ايتىلدى.
سونداي-اق جاقىندا مينيسترلىكتە وتكەن جيىندا قازاقستاندىق جوعارى وقۋ ورىندارىنىڭ جانىنان تەحنوپاركتەر قۇرۋ ماسەلەسى دە تالقىلانعان ەدى. ال ونىڭ الدىندا مەملەكەت باسشىسى ۇكىمەت پەن جاۋاپتى مينيسترلىكتەرگە عىلىمي زەرتحانالار مەن تاجىريبەلىك-سىناق ينفراقۇرىلىمىن دامىتۋعا ماقساتتى گرانتتار بولە وتىرىپ, جوو جانىنداعى عىلىمي-تەحنولوگيالىق پاركتەردى قولداۋ باعدارلاماسىن ىسكە قوسۋدى تاپسىرعان بولاتىن.
تسيفرلىق دامۋ مينيسترلىگى 2022 جىلى وڭىرلىك IT-تەحنوپاركتەرگە قولداۋ كورسەتۋ جونىندەگى باعدارلامانى ىسكە قوسۋدى جوسپارلاپ وتىر, ول وڭىرلەردە جاستاردى No Code School, Startup School جانە ت.ب. سياقتى Astana Hub باعدارلامالارى, جەرگىلىكتى تاقىرىپتىق ءىس-شارالاردى وتكىزۋ, ادىسنامالىق قولداۋ, سونداي-اق Techpreneurs, preScalerator, Scalerator, ينكۋباتسيالىق جانە اكسەلەراتسيالىق باعدارلامالارى ارقىلى IT-كاسىپكەرلىكتە وزەكتى جانە سۇرانىسقا يە ماماندىقتارعا وقىتۋ دا كۇن تارتىبىنەن تۇسپەيتىن ماسەلەگە اينالماق.
