جاستار جۇمىسسىزدىعىنىڭ سەبەبى نەدە؟

اتىراۋدا پرەزيدەنت جانىنداعى جاستار ساياساتى جونىندەگى كەڭەستىڭ حVII كوشپەلى وتىرىسى ءوتتى. وعان ەلىمىزدەگى بارلىق وبلىستاردىڭ جاستار ساياساتى ماسەلەلەرى جونىندەگى باسقارما باسشىلارى, سونىمەن بىرگە, اتىراۋ, اقتوبە, باتىس قازاقستان جانە ماڭعىستاۋ وبلىستارىنىڭ جاستار رەسۋرستارى مەن جاستار ۇيىمدارىنىڭ وكىلدەرى قاتىستى. كوشپەلى وتىرىستا جاستار اراسىنداعى جۇمىسسىزدىق ماسەلەسى كەڭىنەن تالقىعا سالىندى. قازىر ستاتيستيكالىق مالىمەتكە سۇيەنسەك, ەلىمىزدە 14 پەن 29 جاس ارالىعىندا 4376148 جاس بار دەپ ەسەپتەلەدى. ولاردىڭ 116,1 مىڭى جۇمىسسىزدار ساناتىن قۇرايدى. وتكەن جىلى جاس­تار اراسىنداعى جۇمىسسىزدىق دەڭگەيى 5,5 پايىزدى قۇراپ وتىر. جاستاردىڭ جۇمىسسىزدىعى جونىندەگى ەڭ جوعارى كورسەتكىش سولتۇستىك قازاقستان (7,6 پايىز), جامبىل (7,4 پايىز), قىزىلوردا (6,7 پايىز) وبلىستارىندا تىركەلگەن. باتىس ايماقتاعى جۇمىسسىز جاستاردىڭ شوعىرى ماڭعىستاۋ وبلىسىنا (7,5 پايىز) ءتان ەكەنى جاسىرىن ەمەس. (اتىراۋ وبلىسىندا 3,5%, باتىس قازاقستان وبلىسىندا 4,8%, اقتوبە وبلىسىندا 3,2%). تالداۋ كورسەتكەندەي, جاستار جۇمىسسىزدىعىنا ءبىرىنشى كەزەكتە ەڭبەك نارىعىنداعى سۇرانىس جونىندەگى اقپاراتتىڭ ازدىعى, سونىمەن قاتار, وقۋ ورىندارى مەن ءوندىرىستىڭ اراسىنداعى بايلانىستىڭ جوقتىعى سەبەپ بولىپ وتىر. بۇعان قوسا جاستاردىڭ كاسىبي ءبىلىمىنىڭ جەتىمسىزدىگى, ەڭبەك تاجىريبەسى مەن بىلىكتىلىگى جوقتىعى دا اسەر ەتەدى. مۇنى وتكەن جىلى جۇمىسسىزداردى تىركەۋ ورىندارىنا 150 مىڭ جاس حابارلاسقان. ولاردىڭ 68 مىڭى اۋىلدىق جەرلەردە تۇراتىنىن كورسەتكەن. بىلتىر جۇمىسسىز جاستاردىڭ 56 پايىزى (84,7 مىڭ ادام) جۇمىسقا ورنالاستىرىلدى. سول جاستاردىڭ 46 پايىزى (39 مىڭ ادام) اۋىلدىق جەرلەردە تۇرادى. سوڭعى بەس جىلدان بەرى جاستاردىڭ ەڭبەك تاجىريبەسىن قالىپتاستىرۋ ءۇشىن «جاستار تاجىريبەسى» جوباسى ىسكە اسىرىلىپ, وعان وقۋ ورىندارىنىڭ 176 673 تۇلەگى قاتىستى. ەندى وسى جوباعا قاتىساتىن جاستارعا 33 336 تەڭگە كولەمىندە جالاقى تولەۋ كوزدەلىپ وتىر. جولداسبەك شوپەعۇل, «ەگەمەن قازاقستان». اتىراۋ وبلىسى.