ل. ن. گۋميلەۆ اتىنداعى ەۇۋ QS جوعارى وقۋ ورىندارىنىڭ الەمدىك رەيتينگىسىندە كەزەكتى رەت قارقىندى ىلگەرىلەۋدى كورسەتتى. ۋنيۆەرسيتەت ءبىر جىلدا 328-ءشى ورىننان 277-ءشى ورىنعا كوتەرىلىپ, العاش رەت الەمنىڭ ۇزدىك 300 جوعارى وقۋ ورىندارىنىڭ قاتارىنا ەندى.
سوڭعى 4 جىلدا ەۇۋ حالىقارالىق رەيتينگتە 141 ساتىعا كوتەرىلىپ, سەنىمدى ءوسۋدى كورسەتتى. ۇلتتىق ۋنيۆەرسيتەت 2025 جىلعا قاراي دامۋ ستراتەگياسىنا سايكەس QS رەيتينگىنىڭ توپ-200 قاتارىنا كىرۋگە نيەتتى.
ۋنيۆەرسيتەت «شەتەلدىك پروفەسسورلىق-وقىتۋشىلىق قۇرام», «جۇمىس بەرۋشىلەر اراسىنداعى بەدەل» جانە «اكادەميالىق ساراپشىلار اراسىنداعى بەدەل» كريتەريلەرى بويىنشا ءوزىنىڭ پوزيتسياسىن ەلەۋلى نىعايتتى. بۇل رەتتە ۋنيۆەرسيتەتتىڭ ء«بىلىم الۋشىلار مەن پروفەسسورلىق-وقىتۋشىلىق قۇرامنىڭ اراقاتىناسى» جانە «شەتەلدىك پروفەسسورلىق-وقىتۋشىلىق قۇرام» ينديكاتورلارى بويىنشا كورسەتكىشتەرى الەم بويىنشا جوعارى وقۋ ورىندارىنىڭ ورتاشا ناتيجەسىنەن ايتارلىقتاي اسىپ ءتۇستى.
بيىل حالىقارالىق رەيتينگكە قاتىسقان جوعارى وقۋ ورىندارىنىڭ قاتارى 47%-عا ارتتى. الەمنىڭ 100 مەملەكەتىنەن 2 462 ۋنيۆەرسيتەت قاراستىرىلىپ, ونىڭ 1422 قورىتىندى رەيتينگكە كىردى. الەمنىڭ ۇزدىك جوو اراسىندا قازاقستاننىڭ 16 ۋنيۆەرسيتەتى بار, ولاردىڭ ەكەۋى تىزىمگە العاش رەت ەندى.
QS رەيتينگىنىڭ كوشباسشىلارىنىڭ وندىعىنا ماسساچۋسەتس تەحنولوگيالىق ينستيتۋتى, كەمبريدج ۋنيۆەرسيتەتى, ستەنفورد ۋنيۆەرسيتەتى, وكسفورد ۋنيۆەرسيتەتى, گارۆارد ۋنيۆەرسيتەتى جانە ت.ب. سياقتى الەمدىك ۋنيۆەرسيتەتتەر كىردى.
ۋنيۆەرسيتەتتەردى حالىقارالىق دەڭگەيدە باعالاۋ ادىستەمەسى مىناداي ينديكاتورلار بويىنشا جۇزەگە اسىرىلادى: اكادەميالىق ساراپشىلار اراسىنداعى بەدەل, جۇمىس بەرۋشىلەر اراسىنداعى بەدەل, ءبىلىم الۋشىلاردىڭ پروفەسسورلىق-وقىتۋشىلىق قۇرامعا اراقاتىناسى, دايەكسوز كەلتىرۋ, شەتەلدىك ءبىلىم الۋشىلار, جۇمىسقا ورنالاسۋ ناتيجەلەرى. سونداي-اق بيىل «جۇمىسپەن قامتۋ ناتيجەلەرى» جانە «حالىقارالىق زەرتتەۋ ىنتىماقتاستىعى» اتتى ەكى جاڭا ينديكاتور قوسىلدى.
اتاپ وتكەن ءجون, بيىل ەۋرازيا ۇلتتىق ۋنيۆەرسيتەتى QS World University Rankings by Subject 2022 پاندىك رەيتينگىسىندەگى دە ءوز پوزيتسياسىن جاقسارتتى. ەۇۋ الەمدىك تىزىمدەگى وكىلدىگىن 4-تەن 11-گە دەيىن كەڭەيتتى جانە قازاقستاندىق جوو اراسىندا 3 ءپان بويىنشا كوش باستاپ كەلەدى. بۇل رەتتە «قوناق ءۇي بيزنەسى جانە بوس ۋاقىتتى باسقارۋ» ءپانى الەمدىك رەيتينگتىڭ العاشقى جۇزدىگىنە كىردى, «لينگۆيستيكا» 251-300 توبىنان 101-150-گە تىزىمىنە اۋىستى.
