سپورت • 09 ماۋسىم، 2022

قازاقستاندىق ۆەلوشاباندوز يتاليادان جۇلدەلى ورالدى

38 رەت كورسەتىلدى

ۆاديم پرونسكي ەكى جىل قاتارىنان يتالياندىق «ادرياتيكا-يونيكا» اتتى كوپكۇندىك جارىسىندا جەڭىسكە جەتتى، دەپ حابارلايدى Egemen.kz.

قازاقستاندىق ۆەلوشاباندوز العاشىندا مونتە-گراپپا شىڭىندا مارەگە جەتىپ، ەكىنشى ورىن يەلەنگەن. ال كورولدىك تاۋ كەزەڭىندە ءۇشىنشى ورىنعا يە بولدى. ناتيجەسىندە جالپى ەسەپتە ءۇشىنشى ورىنعا تابان تىرەپ، ەلىمىزگە جۇلدەلى ورالدى. ءسۇيىنشى جاڭالىقتى Astana Qazaqstan Team ۆەلوسپورت كومانداسىنىڭ ءباسپاسوز قىزمەتى جەتكىزدى.

جارىستا سوڭعى ءۇش كەزەڭدە پرونسكي جىلدامدىقتى ارتتىرىپ، كلاسسيفيكاتسياداعى جاعدايدى وزگەرتۋگە تىرىستى. قارسىلاستارىن شاڭ قاپتىرۋعا بارىن سالدى. جارىستىڭ جەڭىمپازى يتاليالىق ۆەلوشاباندوز فيليپپو زانا اتانسا، ەكىنشى ورىندى تانىمال سپورتشى ناتناەل تەسفاتسيون يەلەندى. 

«شىنى كەرەك، «ادرياتيكا-يونيكادا» ونەر كورسەتكەنىمە ريزامىن. مەن دجيرودان كەيىن كىشكەنە السىرەپ قالدىم، بىراق كۇننەن-كۇنگە جاقسارىپ، كورولدىك ەتاپتا ءۇشىنشى ورىنعا يە بولدىم. ەرەكشە قيىن بولعانى -  ءۇشىنشى كەزەڭ. جىلدام، ءارى بيىكتىككە تىك كوتەرىلۋگە تۋرا كەلدى. تاۋدان ءتۇسۋ بارىسىندا تەحنيكالىق تابىسقا جەتۋگە بارىمدى سالدىم. الايدا، مارە سىزىعىنا نەبارى 100 مەتر قالعاندا قارسىلاستارىم قۋىپ جەتتى. مەن ءۇشىن ۇلكەن جۇمىس ىستەگەن كومانداعا العىسىمدى بىلدىرگىم كەلەدى»، دەدى ۆاديم پرونسكي.

Astana Qazaqstan Team كومانداسى جارىستىڭ سوڭعى ەكى كەزەڭىندە وزدەرىن بەلسەندى كورسەتىپ، جەڭىس ءۇشىن كۇرەسۋگە تىرىستى. 7 ماۋسىمدا انتونيو نيبالي مارەگە التىنشى بولىپ كەلدى. ال 8 ماۋسىمدا مانۋەلە بوارو ءتورتىنشى بولىپ مارەگە جەتكەن ەدى.

                                                                              اسەماي ەرلانقىزى 

سوڭعى جاڭالىقتار

ۇقساس جاڭالىقتار