– اندرەي, ەلگە قوش كەلدىڭ! 2022 جىلدىڭ العاشقى التى ايىندا ءوزىڭ قاتىسقان كۇمداۋىت كورتتاعى ونەرىڭە كوڭىلىڭ تولا ما؟
– كوڭىلىم تولادى دەپ ايتا المايمىن. سەبەبى ءوزىم جوسپارلاعان ءبىراز جارىستا ءتاۋىر ونەر كورسەتە المادىم. «رولان گارروسقا» دەيىنگى باسەكەلەردە دە, فرانتسيا اشىق چەمپيوناتىندا دا جانكۇيەرلەرىمدى قۋانتۋدى كوزدەگەن ەدىم. بىراق ول ويىمدى جۇزەگە اسىرا المادىم. ايتپەسە, باستى ماقساتىم – ءىرى جەڭىستەرگە, تيتۋلدارعا قول جەتكىزۋ ەدى. دەگەنمەن ازىرگە تەك ريمدەگى «ماستەرس» ءتۋرنيرىنىڭ جارتىلاي فينالىنا دەيىن جەتكەنىم كوڭىلگە مەدەۋ بولىپ تۇر.
– ءبىراز ۋاقىت بويى فرانتسيالىق فابريس مارتەنمەن جۇپتاسىپ, ءتۇرلى سايىستارعا قاتىسىپ ءجۇرسىڭ. تەننيسشىلەر سەرىگىن اۋىستىرۋ, وزگەرتۋ كەرەك ەكەنىن قاي ۋاقىتتا تۇسىنەدى؟
– بۇل جەردە ەكى تەننيسشىنىڭ دە بىرگە جەتكەن ناتيجەسىنە بايلانىستى عوي. ەگەر ءبىر-بىرىڭمەن ءتىل تابىسىپ, ءىرى جەتىستىكتەرگە جەتىپ جاتساڭ, ايىرىلماۋعا تىرىساسىڭ. ال كەرىسىنشە, ەش ناتيجە شىعارا الماي جاتساڭ, باسقا تەننيسشىمەن بىرگە باق سىناپ كورۋگە ۇمتىلاسىڭ. سونداي-اق كەيدە ءبىراز ۋاقىت بىرگە ويناعان سەرىگىڭنىڭ ويىن كەستەسى سول تۋرنيرگە سايكەس كەلمەي قالسا, تاعى دا جۇبىڭدى اۋىستىرۋعا ءماجبۇر بولاسىڭ. مىسالى, بىرەۋى باسقا تۋرنيردە ويناعىسى كەلسە, ەكىنشىسى ول جارىسقا قاتىسقىسى كەلمەيدى دەگەندەي. جۇپتىق تەننيستە مۇنداي ساتتەر ءجيى كەزدەسەدى.
– جۇپتىق سىندا بىرنەشە سەرىكتەسىڭ بولدى. ءبىر-بىرىڭە ساي كەلەتىندەرىڭدى قالاي بىلەسىڭدەر؟
– قاي تەننيسشىنىڭ ويىن ءستيلى وزىڭە جاقىن ەكەنىن ءتۇرلى جارىستاردا قاراپ, باقىلاپ جۇرەمىز. كەيىن كورتتا بىرگە ويناپ كورەمىز. ويىنىمىز ۇيلەسىپ جاتسا, ءارى قاراي دا بىرگە ويناي بەرەمىز. ەگەر ءستيلىمىز سايكەس كەلمەسە, كەلەسىدە باسقا سەرىكتەس ىزدەپ كورەمىز.
– ال جەكەلەي سىندا ءوزىڭنىڭ ەڭ ەرەكشە ەسىڭدە قالعان ماتچتارىڭ بار ما؟
– ارينە, بار. اتاپ ايتار بولسام, قازاقستان قۇراماسى ساپىندا دەۆيس كۋبوگىندا شۆەيتساريادا ستانيسلاس ۆاۆرينكامەن, چەحيادا توماش بەردىحپەن, قازاقستاندا بەلگيالىق داۆيد گوففەنمەن بەسىنشى سەتتە 12-10 ەسەبىمەن جەڭگەنىمدى قالاي ۇمىتايىن؟! جەكەلەي جارىستاردا دا مۇنداي ويىندار كوپ بولدى. مىسالى, گامبۋرگتەگى دودانىڭ فينالى, اۋستراليادا رەسەيلىك ميحايل يۋجنىيمەن بەس سەتكە سوزىلعان ماتچ, سودەرلينگپەن بولعان ويىن ءالى كۇنگە دەيىن ەسىمدە.
– ەكى اپتا بۇرىن جۇپتىق رەيتينگتە جەكە رەكوردىڭدى جاڭارتتىڭ. ريمدەگى «ماستەرس» ءتۋرنيرىنىڭ جارتىلاي فينالىنا دەيىن جەتىپ, ناتيجەسىندە رەيتينگتە 21-ورىنعا كوتەرىلدىڭ. قازىر 22-ساتىداسىڭ. ماۋسىم سوڭىنا دەيىن توپ-10 تەننيسشىنىڭ قاتارىنا قوسىلۋعا مۇمكىندىك بار ما؟
– جۇپتىق سىندا بۇل ناتيجەگە قول جەتكىزۋگە ابدەن بولادى. جىل سوڭىنا دەيىن الدىما وندىقتىڭ قاتارىنا ەنۋدى ماقسات ەتىپ قويدىم. ول ءۇشىن ءار جارىستا تابىستى ونەر كورسەتۋىم كەرەك.
– قازاقستان قۇراماسى ساپىندا دەۆيس كۋبوگىندا 14 جىل بويى ويناپ كەلەسىڭ. ەل نامىسى سىنعا تۇسكەن ءار ويىندا ەرەكشە سەزىمگە بولەنەسىڭ بە, الدە وندايعا ۇيرەنىپ كەتتىڭ بە؟
– ۇلتتىق قۇراما ءۇشىن ءبىرىنشى رەت, الدە بەسىنشى, ءتىپتى جيىرماسىنشى رەت ويناپ جاتسام دا, جاۋاپكەرشىلىك جۇگى ەشقاشان جەڭىلدەگەن ەمەس. تەك دەۆيس كۋبوگىنىڭ جاڭا فورماتىنا قاتىستى ايتارىم بار. بەيتاراپ ايماقتا ءۇش كومانداعا قارسى ويناۋ وڭاي ەمەس. دەگەنمەن قارسىلاسىمىز ۇلىبريتانيا, نورۆەگيا نەمەسە يسپانيا بولسىن, ءبىز قازاقستاندىق جانكۇيەرلەردىڭ قولداۋىن ءار كەز سەزىنەمىز.
– بيىل قازاقستان تەننيسى ءۇشىن ەرەكشە جىل بولماق. ويتكەنى ەرلەر قۇراماسى دەۆيس كۋبوگىنىڭ, ايەلدەر قۇراماسى بيللي دجين كينگ كۋبوگىنىڭ جانە 14 جاسقا دەيىنگى جاسوسپىرىمدەر قۇراماسى الەم چەمپيوناتىنىڭ فينالىندا ونەر كورسەتەدى. بيىلعى دەۆيس كۋبوگىندا قازاقستان ۇلىبريتانيا, اقش, نيدەرلاند سەكىلدى مىقتى قۇرامالارعا تاپ بولدى. وسى ايتۋلى جارىستان نە كۇتەسىڭ؟
– ارينە, كەز كەلگەن جارىستىڭ فينالدىق كەزەڭىندە وڭاي قارسىلاستار تۇسپەيتىنى انىق. العاشقى ەكى قۇرامانى ايتپاعاننىڭ وزىندە, نيدەرلاند تەننيسشىلەرىمەن بۇدان بىرنەشە جىل بۇرىن كەزدەسكەنبىز. بىراق قازىر ولاردىڭ دەڭگەيى ءوستى, بۇرىنعىداي ەمەس. جەكەلەي سىندا توپ-60-قا كىرەتىن ەكى ويىنشىسى بار. جۇپتىق سىندا دا وسال ەمەس.
– الداعى «ۋيمبلدون» دوداسىنا دەيىن قانداي جارىستارعا قاتىسۋدى جوسپارلاپ وتىرسىڭ؟
– ازىرگە «ۋيمبلدونعا» قاتىسۋ-قاتىسپاۋىم بەلگىسىز بولىپ تۇر. ويتكەنى كاسىپقوي تەننيسشىلەر قاۋىمداستىعى (اتر) «ۋيمبلدوندا» جەڭىس ءۇشىن بەرىلەتىن ۇپايلاردى الىپ تاستادى. سوندىقتان بۇل دوداعا قاتىسپاۋىم عاجاپ ەمەس. بالكىم, بۇل ارالىقتاعى ۋاقىتتى قالپىما كەلۋ ءۇشىن جۇمسايتىن شىعارمىن. ودان كەيىنگى دودالارعا قاتىسۋ ءۇشىن دە كۇش كەرەك قوي. دەگەنمەن كوگالداعى توسەنىش ماۋسىمىندا گەرمانياداعى گاللە اتر 500 جانە يسپانياداعى مالوركا اتر 250 تۋرنيرلەرىندە باق سىنايتىنىم انىق. قالعانىن ۋاقىت كورسەتەدى.
– اڭگىمەڭە راحمەت.
اڭگىمەلەسكەن
ءالي بيتورە,
«Egemen Qazaqstan»
