«جاسىل ەل» جاستار ەڭبەك جاساقتارى – ەكولوگيالىق جوبالار مەن مەملەكەتتىك باعدارلامالاردى جۇزەگە اسىرۋ ارقىلى جاستاردى ماۋسىمدىق جۇمىسقا ورنالاستىرۋ, قالالار مەن ەلدى مەكەندەردى اباتتاندىرۋ, جاستاردى پاتريوتتىققا تاربيەلەۋمەن اينالىساتىن قوزعالىس.
ءىس-شارا اياسىندا ءۇش كۇن بويى ەكولوگيا جانە الەۋمەتتىك جوبالاۋ سالاسىنداعى جەتەكشى ساراپشىلاردان نەتۋوركينگ, ترەنينگتەر جانە شەبەرلىك ساعاتتار, تاقىرىپتىق الاڭدار ۇيىمداستىرىلدى. اتاپ ايتساق, ەكولوگيالىق جوبالاردى بيزنەسكە اينالدىرۋ تۋرالى «تۇراقتى بيزنەس ستراتەگياسى» اتتى شەبەرلىك ساباق; ءارتۇرلى سۇرانىستار بويىنشا جوبانى قالاي دۇرىس جازۋ كەرەك, الەۋمەتتىك جوبانى قۇرۋ بويىنشا قادامدىق نۇسقاۋلار, گرانتتىق كونكۋرستارعا وتىنىمدەردى دايىنداۋ كەزىندەگى تيپتىك قاتەلەر تالقىلانعان «الەۋمەتتىك جوبالاۋ» اتتى ترەنينگى ءوتتى. سونىمەن قاتار قازىرگى جاستار اراسىندا ترەند بولىپ جاتقان موبيلوگرافيا كۋرسى بويىنشا «موبيلوگرافيا نەگىزدەرى» ترەنينگىندە قاتىسۋشىلار تەلەفون كامەراسى ارقىلى سۋرەتكە, ۆيدەوعا ءتۇسىرۋ شەبەرلىگىن ۇيرەندى.
«جاسىل ەل» جاستار ەڭبەك جاساقتارى رەسپۋبليكالىق شتابى جەتەكشىسىنىڭ ورىنباسارى الىشەر قارداشوۆ 2021 جىلدان باستاپ ەل بويىنشا 30 مىڭ جاس ماۋسىمدىق-ەكولوگيالىق جۇمىستارعا تارتىلعانىن ايتتى. وسى جىلى دا 30 مىڭ جاسقا جۇمىس بەرۋ جوسپارلانىپ وتىر.
– بۇگىنگى ءىس-شارانىڭ نەگىزگى ماقساتى رەتىندە جاستاردىڭ ەكولوگيالىق ساۋاتىن ارتتىرۋ كوزدەلىپ وتىر. ءار وبلىستىڭ وزىندىك ەرەكشەلىكتەرى بار. مىسالى, ءبىر ءوڭىر ەكولوگيالىق اكتسيالار جاساسا, باسقا ءبىر وبلىس كوبىرەك تال ەگەدى جانە ونىڭ ءتيىمدى جاقتارىن بىلەدى. ەلىمىزدىڭ بارلىق وبلىسى اراسىندا ەكولوگيالىق تاجىريبە الماسۋ ءۇشىن وسى ءىس-شارانى ۇيىمداستىردىق. جاستاردى جاڭا جۇمىس ماۋسىمىنا دايىنداپ, ەرەكشەلىكتەردى ايتۋ, قابىلدانىپ جاتقان جاڭا جوبالار تۋرالى اقپارات بەرۋ وتە ماڭىزدى, – دەپ ءتۇسىندىردى الىشەر قارداشوۆ.
اتىراۋ وبلىسىنداعى «جاسىل ەل» جاستار ەڭبەك جاساقتارى شتابىنىڭ مەنەدجەرى بەكارىس زاكاريا ءار وڭىردەن كەلگەن مەنەدجەرلەردىڭ تاجىريبەلەرىمەن جاڭا جوبالاردى ىسكە اسىرىپ جاتقانىن ايتتى.
– بۇل ءىس-شارانىڭ جاستارعا بەرەتىن مۇمكىندىگى وتە كوپ. سەبەبى وزگە وڭىردە شەشىلمەگەن ماسەلەلەردىڭ شەشىمى باسقا ءبىر ايماقتاردان تابىلىپ جاتتى. مىسالى, اقتوبەنىڭ تاجىريبەسىنە سۇيەنىپ قازىرگى تاڭدا پاۆلودارداعى ەكولوگيالىق ماسەلەلەردىڭ شەشۋ جولىن جۇزەگە اسىرىپ جاتىرمىز. ەندى, ءوزىمىزدىڭ وڭىردەگى تابيعات ماسەلەلەرىن رەتتەپ, جاڭا جوبالاردى قولعا الۋدى ويلاستىرىپ وتىرمىز, – دەدى بەكارىس زاكاريا.
«جاسىل ەل» جوباسى بويىنشا جاستار تەك جازعى كانيكۋلدا عانا ەمەس, ساباق ۋاقىتىندا دا جۇمىس ىستەي الادى. مۇنى پاۆلودار وبلىستىق شتابىنىڭ مەنەدجەرى ايبەك عازيزدىڭ تاجىريبەسىنەن ايقىن كورۋگە بولادى. ءبىر جىل بۇرىن سارباز بولىپ جۇمىسقا تۇرعان ول قازىر وبلىستىق شتاب مەنەدجەرى رەتىندە ەڭبەك ەتەدى.
– الدىمەن باسقالار سياقتى, ياعني ءبىر اي ەڭبەك ەتىپ, اقشامدى الىپ كەتەمىن, دەپ ويلادىم. بىراق جۇمىس بارىسىندا وسى ىسكە دەگەن قىزىعۋشىلىعىم ويانىپ, جۇمىسىمدى ءارى قاراي جالعاستىردىم. وسى جىلدىڭ جاڭا ەڭبەك ماۋسىمىندا وبلىس شتابىنىڭ مەنەدجەرى بولدىم. تاۋلىگىنە 8 ساعات قىزمەت ەتەمىن. بيىل 11-سىنىپتى ءبىتىردىم. تەك كانيكۋل كەزىندە عانا ەمەس, ساباق ۋاقىتىندا دا ەڭبەكتەنىپ, ساباعىم مەن جۇمىستى بىرگە الىپ ءجۇردىم. تاڭەرتەڭ ساباققا بارىپ, تۇستەن كەيىن جۇمىسقا ۇلگەرەتىنمىن. كەيدە, ونلاين قۇجاتتارمەن ارىپتەستەرىمە كومەك بەرەمىن. بولاشاقتا جۋرناليست بولۋدى ارماندايمىن, – دەيدى ايبەك عازيز.
ارۋجان ناعاشباي,
ل.ن.گۋميلەۆ اتىنداعى ەۇۋ ستۋدەنتى
