فەستيۆالدە ءارتۇرلى مۋزىكالىق باعىتتار: حيپ-حوپ, پوپ جانە يندي شىرقالادى. مۇنداي ستيلدەگى مۋزىكانى سۇيەتىن جاستار كۋميرىن سىرتتان ىزدەمەيدى. ولاردىڭ تاڭداۋى – قازاقستاندىق تالانتتار, وتاندىق مۋزىكانتتار. سەبەبى بۇگىنگى جاس انشىلەر تۋرالى قوعامدا قايشىلىقتى كوزقاراس بولعانىمەن, جاڭا تولقىننىڭ ءان ماتىنىندە تازالىق, ادىلدىك, ادالدىق بار. ولار اشىق. شىعارماشىلىعى شىندىققا تۇنىپ تۇر. قوعامنىڭ كەمشىلىگىن, كەلەڭسىزدىكتى, ۇنامسىز قىرىن اشىق ماتىنمەن ايتا الادى. جانى جالعاندىققا بىلعانا قويماعان جاستاردىڭ ولاردىڭ اندەرىنە ەلىتىپ, ەسسىز تابىناتىن سەبەبى دە سول. ال جاستاردىڭ جۇرەگىن بۇگىندە كىمدەر باۋراپ الىپ وتىر؟
((beu fest)) الاڭى قازىرگى زاماننىڭ ەڭ ۇزدىك جانە ەرەكشە ارتىستەرىن جينادى: Ninety One, The Limba, Yenlik, Moldanazar, 104, Ulukmanapo, Raim, Darkhan Juzz, Taspay, jeltoksan, Hey Monro, Kalifarniya, Alpha, Marhaba Sabi, ARO, abdr., JETI, Qonyratbay Fam, dudeontheguitar, Ato Woody, Rauana.
راس, بۇل ورىنداۋشىلار مەن شىعارماشىلىق توپتاردىڭ اندەرىن جاستار قابىلداعانىمەن, قوعام تاراپىنان, ءجيى سىنعا ۇشىرايدى. كوركەمدىك ساپاسى وتكەن ۋاقىتتىڭ بيىك دەڭگەيىمەن ۇيلەسىم تابا الماسا دا, باستىسى, بۇل ورىنداۋشىلار وتاندى ءسۇيۋدى دارىپتەيدى. فەستيۆال قارساڭىندا وتكەن ءباسپاسوز ءماسليحاتىندا: «((ۆeu fest)) الماتىدا وتكىزۋدىڭ وزىندىك ءمانى بار. فەستيۆالدە ونەر كورسەتەتىن مۋزىكانتتار وسىندا, وتانىندا تانىمال بولدى. ءبىزدىڭ تالانتتاردى سىرتتاعى جەتىستىكتەردەن كەيىن ەمەس, ەلدە تانۋ ماڭىزدى. سونىمەن قاتار الماتى – تالعام مەن ترەند قالىپتاساتىن مەگاپوليس. ونەردىڭ بارلىق تۇرىندەگى جاڭا باعىتتى, اسىرەسە جاستار مۋزىكاسىنداعى سوڭعى ءساندى ءستيلدى قاشاننان الماتى بەلگىلەيدى. ارتىستەرىمىزدىڭ شىعارماشىلىعىن ءسۇيۋ جانە قۇرمەتتەۋ – كەرەمەت! وسى ورايدا فەستيۆالدىڭ مۋزىكالىق سەرىكتەستىگى تۋرالى ايتا كەتكىم كەلەدى. ول اitu مۋزىكا جاڭا ستريمينگتىك قىزمەتى بار اitu سۋپەرقوسىمشاسى», دەيدى باس پروديۋسەر جاننۇر ايداربەكوۆا.
بۇگىنگى جاستار ءسۇيىپ تىڭدايتىن ۇزدىك اندەردى تاراتىپ وتىرعان شىعارماشىلىق توپتار مەن جەكەلەگەن انشىلەر باعىتىنىڭ بولەك بولعانىنا قاراماستان ءبىر الاڭدا كەزدەسۋگە بىردەن كەلىسىم بەرگەن. بۇل الاڭدا ءوز تىڭداۋشىلارىن قالىپتاستىرعان تانىمال توپتار دا, ونلاين الاڭدا 3-4 ملن قارالىم جينايتىن ەسىمى ەندى تانىلعان جاس انشىلەر دە بار. سونداي-اق ەڭ تانىمال 22 ونەرلى توپ قاتىساتىن فەستيۆالدە قازاقستاندىقتارعا ەسىمى جاقسى تانىس قىرعىزستان مەن وزبەكستان ورىنداۋشىلارى دا ونەر كورسەتەدى.
2015 جىلدان بەرى قازاق تىلىندەگى مۋزىكانى دامىتۋ يدەياسىن العا تارتىپ كەلە جاتقان Zaq ەسىمىمەن تانىمال Ninety One توبىنىڭ مۇشەسى دۋلات مۇحامەتقاليەۆ فەستيۆالدىڭ اشىلۋىن اسىعا كۇتەدى. «يدەيا بىزگە بىردەن ۇنادى. ءبىز جەرگىلىكتى Made in KZ مۋزىكاسىن قولداۋ باستالاتىن ۋاقىتتى كوپتەن كۇتتىك. قازاقستاندىق مۋزىكا يندۋسترياسى قارقىندى دامىپ كەلەدى. ءبىز وسىنداي ايتۋلى وقيعانىڭ ءبىر بولىگى بولۋعا قۋانىشتىمىز», دەيدى Zaq.
ءاربىر ءارتىستىڭ ءستيلى مەن حيتتەرى بەلگىلى, ولار ءاربىر ەكىنشى قازاقستاندىققا, سونداي-اق تمد-دان تىس جەرگە دە تانىمال. فەستيۆالدىڭ كرەاتيۆتى پروديۋسەرى جانە õzen مۋزىكالىق لەيبلىنىڭ نەگىزىن قالاۋشى ايزات قۇسايىنوۆ. «((beu fest)) وتاندىق مۋزىكا ساحناسىنىڭ بۇگىنگى احۋالىن كورسەتۋگە ارنالعان. كىشكەنتاي كلۋبتار مەن تار شەڭبەردەگى تانىمالدىلىقتان باستاپ ستاديونداردا ونەر كورسەتۋگە جانە الەمدىك حيتتەرگە دەيىن ءبىزدىڭ ارتىستەرىمىزدىڭ ءجۇرىپ وتكەن ۇلكەن جولىن كورسەتەدى. سونداي-اق فەستيۆال بىرنەشە جانرلار مەن ەلدەردىڭ وكىلدەرىن بىرىكتىرە وتىرىپ, قازاق مادەنيەتىنىڭ كوپقىرلىلىعى مەن ىزگى نيەتىن كورسەتەدى», دەيدى ايزات قۇسايىنوۆ.
ساپالى دىبىس, جوعارى تەحنيكالىق درايۆ, كاسىبي قويىلعان جارىقپەن وتەتىن مۋزىكالىق شوۋ جاپپاي ءان ايتۋعا شاقىراتىن اۋقىمدى كاراوكەگە دە ۇلاسپاق. فەستيۆالدە دىبىسقا, مۋزىكاعا كوبىرەك ءمان بەرىلىپ وتىرعاندىقتان, ۇيىمداستىرۋشىلار باسقالارعا ۇلگى ەتۋ ماقساتىمەن ونەر كورسەتەتىن جاستاردى جاندى داۋىستا ءان ايتۋعا شاقىرىپ وتىر.
ءۇش جىلعا جۋىق كۇردەلى كەزەڭدى باستان وتكەرگەن الماتى حالقىنا كوڭىلدى دەمالىس ۇيىمداستىرىپ, ونىڭ احۋالىن جاڭا مۋزىكا لەبىمەن جاقسارتا ءتۇسۋدى مۇرات تۇتقان فەستيۆال وسى ۋاقىت ارالىعىندا مۋزىكا الەمىندە پايدا بولعان بارلىق جاڭالىقتى: جارقىراعان جاڭا ەسىمدەر, جازىلعان جاڭا اندەر, جاڭا باعىتتى كوپشىلىككە ءبىر مەزگىلدە تانىستىرۋدى كوزدەيدى. وسى ەرەكشەلىگىن باسا ايتقان فەستيۆالدىڭ رەجيسسەرى ايگۇل اقسامبيەۆا جاڭا جوبا بولعاندىقتان اۋقىمدى شاراعا بۇرىنعى فەستيۆالدەردىڭ ەسكى تالابىمەن قاراي المايتىندارىن ايتتى. باستىسى, ءارتىس پەن ونىڭ كورەرمەنى اراسىندا ەشقانداي كەدەرگىنىڭ بولماۋى كوزدەلىپ وتىر. سەبەبى ورىندالاتىن ءار ءاننىڭ ءوز فيلوسوفياسى, ارقالايتىن جۇگى بار. سوندىقتان باعدارلاما بۇرىننان تانىس ستاندارتتان اۋىتقيدى. تەك مۋزىكا مەن ساپالى دىبىس – زاماناۋي ارتىستەر جاقسى كورەتىن شىعارماشىلىق مينيماليزگە باعىندىرىلماق. ساپالى اكۋستيكاسىمەن بەلگىلى, 7000 كورەرمەندى قامتيتىن «سۇڭقار» شاڭعى ترامپليندەرى كەشەنىندە وتەتىن فەستيۆالدىڭ بيلەت قۇنى – 7000-10000 تەڭگە ارالىعىندا.
قازاقستاننىڭ مۋزىكا الەمىندە جاڭا, جاس, ەركىن باعىتتىڭ ەكپىن الىپ, قانات جايۋىنا قولداۋ بىلدىرگەن ۇيىمداستىرۋشىلار سونى پىشىندەگى فەستيۆالدى جىل سايىن وتكىزۋدى جوسپارلاپ وتىر.
الماتى
