ەكىنشى دۇنيەجۇزىلىك سوعىس اياقتالىپ, بۇكىل ەلدە حالىق شارۋاشىلىعىن قالپىنا كەلتىرۋ ءىسى ءجۇرىپ جاتقان شاقتا ابدىعاپپار قاريانىڭ ۇيىندە قۋانىش وتى لاپ ەتتى. دۇنيەگە ۇل كەلىپ, ەلگە سىيلى اقساقالدى اۋىل بولىپ قۇتتىقتاپ جاتتى. بالاعا قاريانىڭ كوڭىلىندە كوپتەن جۇرگەن نىسپى – ساتىبالدى ەسىمى بەرىلەدى. ول ۋاقىت ءارى تارتساڭ بەرى, بەرى تارتساڭ ءارى جەتپەيتىن قيىن كەزەڭ بولاتىن. سوندا دا ابدىعاپپار قاريا بالا-شاعاسىن تارىقتىرماۋعا تىرىستى. ساپالى ءبىلىم بەردى. اتاقتى ويشىل ءابۋ ناسىر ءال-فارابي: «ادامعا ەڭ ءبىرىنشى ءبىلىم ەمەس, تاربيە كەرەك. تاربيەسىز بەرىلگەن ءبىلىم – ادامزاتتىڭ قاس جاۋى, ول كەلەشەكتە ونىڭ ومىرىنە قاۋىپ اكەلەدى», دەگەن ەكەن. اكە تاربيەسىن مىقتاپ سىڭىرگەن ساتىبالدى قۇرىلىسشىلاردى دايارلايتىن وقۋ ورنىنا تۇسەدى. «ينجەنەر-قۇرىلىسشى, جولدار مەن كوپىرلەردى سالۋ جانە پايدالانۋعا بەرۋ جونىندەگى ينجەنەر» ماماندىعىن الىپ شىققان جاس مامان كوپ ويلانباستان ەڭبەك مايدانىنا سۇڭگىپ كەتەدى. بىرنەشە جول قۇرىلىسىنىڭ باسى-قاسىنان تابىلادى. ءدىن جولىمەن قاراساڭىز دا جول جوندەگەن جانعا تيەر ساۋاپ مول ەمەس پە؟ قيقى-جيقى جولدان مەزى بولعان ەل داڭعىراعان تاس جولعا تۇسكەندە ساتىبالدىعا رازى بولىپ, «جولىڭ بولعىر!» دەپ تالاي ايتتى. ەل تىلەگى جەردە قالمادى. كەيىننەن ەنەرگەتيكا سالاسىنا قاراي ويىسادى. بۇعان دەيىن «جولىڭ بولسىن!» دەگەن العىسقا بولەنگەن اتپال ازامات ەندى ەل-جۇرتتىڭ «كوزىڭ اشىلعىر!» دەگەن اقجارما تىلەگىن الدى.
بىلىكتىنى قاي زاماندا دا قادىرلەگەن. ماماندىعىنا ادال اردا ازاماتتىڭ ومىراۋىنا «قۇرمەت» وردەنى تاعىلدى. بۇعان قوسا ونىڭ «قۇرمەتتى ەنەرگەتيك» اتاعىن يەمدەنگەنى, ومىراۋىندا جارقىراعان «ەڭبەك ارداگەرى» مەدالى ەسەلى ەڭبەگىنىڭ جەمىسى ەمەس پە؟! ەنەرگەتيكا سالاسىن دامىتۋعا وراسان زور ۇلەس قوسقانى ءۇشىن قازاقستان ەلەكترەنەرگەتيكا قاۋىمداستىعىنىڭ «ەڭبەك سىڭىرگەن ەنەرگەتيك» قۇرمەتتى اتاعىمەن, قازاقستان ەنەرگەتيكا مينيسترلىگىنىڭ «ەلەكتر ەنەرگەتيكاسى سالاسىنا قوسقان ۇلەسى ءۇشىن» مەدالىمەن, «قۇرمەتتى ەنەرگەتيك» توسبەلگىسىمەن, ەنەرگەتيكا مينيسترلىگىنىڭ ارنايى مەدالىمەن ماراپاتتالدى. ەنەرگەتيكا مينيسترلىگىنىڭ, قازاقستان ەلەكترەنەرگەتيكا قاۋىمداستىعىنىڭ جانە «سامۇرىق-ەنەرگو» اق «قۇرمەت» گراموتالارىمەن ماراپاتتالدى. ال «قۇرمەتتى قۇرىلىسشى» توسبەلگىسىنىڭ ساتىبالدى ابدىعاپپار ۇلى ءۇشىن ورنى بولەك. ماراپاتتارى تۋرالى ءسوز قوزعاعاندا «سامۇرىق-ەنەرگو» اق-نىڭ 10 جىلدىعىنا ارنالعان مەرەكەلىك مەدالىن دە ايتپاي كەتۋگە بولماس. كوپكە كومەگىن ايامايتىن جاناشىر ازاماتقا «جامبىل وبلىسى تالاس اۋدانىنىڭ قۇرمەتتى ازاماتى» اتاعى دا بەرىلدى. مۇنىڭ ءبارى – ونىڭ ەڭبەگىنىڭ ءادىل باعاسى.
ساتىبالدى ابدىعاپپار ۇلى مويناق گەس-ءى, شاردارا گەس-ءى, بالقاش گەس-ءى, «ەرمەنساي» قس, «الاتاۋ» قس, «بەساعاش» قس, «التاي» قس, «جاس قانات» قس جانە باسقا دا بىرقاتار ەنەرگەتيكالىق سەكتور وبەكتىلەرىنىڭ قۇرىلىسىن باسقاردى. ال ەكىباستۇز گرەس-2 كومىر بەرۋ كونۆەيەرلىك جەلىسىنىڭ قۇلاۋ سەبەپتەرىن انىقتاۋعا جانە ونى قىسقا مەرزىمدە قالپىنا كەلتىرۋگە سىڭىرگەن ەڭبەگى – ءوز الدىنا ءبىر توبە.
ساتىبالدى ابدىعاپپار ۇلىنىڭ نەگىزگى ماماندىعى – ينجەنەر-قۇرىلىسشى. سونىمەن بىرگە زاڭگەر, ەكونوميست. ول ءبىر ەمەس, بىرنەشە ماماندىقتى قاتار مەڭگەرگەن سەگىز قىرلى, ءبىر سىرلى ازامات دەسەك, ارتىق ايتقاندىق ەمەس. «جىگىتكە جەتى ونەر دە از» دەگەن ناقىلدى ءبىزدىڭ ساكەڭ دالەلدەي تۇسكەندەي.
حالقىمىزدىڭ باتىر ۇلى باۋىرجان مومىش ۇلى ادام قارتايعاندا ءۇش ءتۇرلى بولادى دەگەن ەكەن. سونىڭ ىشىندە ءبىزدىڭ ساكەڭە اۋزىندا دۋاسى بار, ەلىنە ماۋەلى, سىيلى قاريا اتانۋ باقىتى بۇيىردى. ومىرلىك سەرىگى ەكەۋى وسىرگەن ونەگەلى ۇرپاقتارى بۇگىندە ەلىمىزدىڭ دامۋى جولىندا ءار سالادا جەمىستى ەڭبەك ەتىپ ءجۇر. ساتىبالدى ابدىعاپپار ۇلى سول ۇل-قىزدارىنان تاراعان نەمەرە-شوبەرەلەرىنە ءوزىنىڭ ونەگەلى ومىرىنەن ساليقالى سىر شەرتىپ, جاقسى تاربيە بەرىپ وتىرعان اسقار تاۋ اتا اتاندى. ماۋەلى بايتەرەك سەكىلدى جايقالىپ ءوسىپ-ونگەن ۇلكەن اۋلەتكە اينالدى.
«الاتاۋ جارىق» كومپانياسىنىڭ ۇجىمى
