قر ءسىم, قازاقستان رەسپۋبليكاسىنىڭ يتاليا رەسپۋبليكاسىنداعى ەلشىلىگى جانە KAZAKH INVEST, سونداي-اق يتاليا ساۋدا اگەنتتىگىنىڭ قولداۋىمەن ۇيىمداستىرعان ءىس-شارا شەڭبەرىندە اگروونەركاسىپتىك كەشەن, ماشينا جاساۋ, مۇناي حيمياسى, جاڭارتىلاتىن ەنەرگەتيكا, جەڭىل ونەركاسىپ, كولىك, لوگيستيكا جانە باسقا دا سەكتورلارداعى ينۆەستيتسيالىق ىنتىماقتاستىقتى كەڭەيتۋ ماسەلەلەرى تالقىلاندى.
ءىس-شارانى اشقان يتاليا رەسپۋبليكاسىنىڭ سىرتقى ىستەر جانە حالىقارالىق ىنتىماقتاستىق ءمينيسترىنىڭ ورىنباسارى مانليو دي ستەفانو يتاليا مەن قازاقستاننىڭ ەكونوميكالىق ءوزارا ءىس-قيمىلىنىڭ ديناميكاسىن جوعارى باعالاپ, وڭدەۋ ونەركاسىبىندەگى ينۆەستيتسيالىق ارىپتەستىكتى كەڭەيتۋ ءۇشىن ايتارلىقتاي الەۋەتتىڭ بار ەكەنىن اتاپ ءوتتى.
ءوز كەزەگىندە مۇحتار تىلەۋبەردى ەلىمىزدىڭ ساۋدا ۇلەسىنە شاققاندا جالپى كولەمنىڭ 9% يتالياعا تيەسىلى ەكەنىن, جانە دە يتاليا قازاقستاننىڭ ءۇشىنشى ءىرى ساۋدا سەرىكتەستىگى ەكەنىن اتاپ ءوتتى. بۇگىندە قازاقستاننىڭ ەكونوميكاسىنا $9 ملرد-تان استام ينۆەستيتسيا سالعان يتاليالىق كاپيتالدىڭ قاتىسۋىمەن 280-نەن استام كاسىپورىن جۇمىس ىستەۋدە.
«قازاقستان اۋىل شارۋاشىلىعىن دامىتۋ الەۋەتى بار الەمنىڭ توپ-5 ەلىنىڭ قاتارىنا كىرەدى. وسىعان بايلانىستى ءبىزدىڭ ەلىمىز قاجەتتى رەسۋرستىق بازانى, وتكىزۋ نارىقتارىنا قولجەتىمدىلىكتى جانە اۋىل شارۋاشىلىعى ونىمدەرىن ءوندىرۋ سالاسىندا ءوزارا ءتيىمدى جوبالاردى قۇرۋ جانە ىسكە قوسۋ كەزىندە مەملەكەتتىك قولداۋدىڭ كەڭ شارالارىن ۇسىنا الادى», دەپ اتاپ ءوتتى مۇحتار تىلەۋبەردى.
بۇدان باسقا يتاليالىق ينۆەستيتسيالاردى تارتۋ ءۇشىن تاعى ءبىر پەرسپەكتيۆتى ورىن جاڭارتىلاتىن ەنەرگەتيكا سالاسى بولىپ تابىلادى. جەلدىڭ, كۇننىڭ ساپاسى جانە ەلىمىزدىڭ ۇلكەن اۋماقتارى قازاقستاندى وسى سەكتوردا كوشباسشى ەتە الادى. سونداي-اق قازاقستان «جاسىل» سۋتەگى وندىرىسىندە ماڭىزدى ءرول اتقارا الادى.
دوڭگەلەك ۇستەل اياسىندا قر ءسىم ينۆەستيتسيالار جونىندەگى كوميتەت توراعاسىنىڭ ورىنباسارى ەرلان زەينەشەۆ قازاقستاننىڭ ينۆەستيتسيالىق مۇمكىندىكتەرى مەن ينۆەستورلاردى مەملەكەتتىك قولداۋ شارالارىمەن تانىستىرىپ ءوتتى. ال «KAZAKH INVEST» ۇك» اق باسقارما توراعاسىنىڭ ورىنباسارى جاندوس تەمىرعالي ءوز سوزىندە قازىرگى ۋاقىتتا كوپتەگەن حالىقارالىق كومپانيالار قازاقستاندى وزدەرىنىڭ ونەركاسىپتىك كاسىپورىندارىن وقشاۋلاۋ ءۇشىن الاڭ رەتىندە تاڭداپ جاتقانىن العا تارتتى.
يتاليا تاراپىنان دوڭگەلەك ۇستەل جۇمىسىنا «Confindustria» حالىقارالىق بايلانىستار جونىندەگى ديرەكتورى رافاەل لانگەللا, «SACE» قوعاممەن بايلانىس جونىندەگى ديرەكتورى كريستيانا پورتالە جانە يتاليا-قازاقستان ساۋدا پالاتاسىنىڭ پرەزيدەنتى پاولو گيرەللي قاتىستى.
بۇدان باسقا ءىس-شارا بارىسىندا «Bonatti» (مۇناي-گاز سالاسى), «Cimolai» (مەتالل كونسترۋكتسيالارى), «Eni» (مۇناي-گاز سالاسى جانە جەك), «Neos» (اۆياتاسىمالدار), «Petrol Valves Group» (كلاپان ءوندىرىسى), «Renco» (قۇرىلىس) سونداي-اق «Savi Italo» مەن «Tre-Bio» (اوك) سياقتى يتاليالىق كومپانيالاردىڭ باسشىلارى ءسوز سويلەدى.
دوڭگەلەك ۇستەل جۇمىسى ەكىجاقتى كەزدەسۋلەرمەن اياقتالدى. مۇحتار تىلەۋبەردى جاڭا جوبالاردى ىسكە اسىرۋ ماسەلەلەرى بويىنشا «Same Deutz-Fahr» (اۋىل شارۋاشىلىعى تەحنيكاسىن ءوندىرۋ) كومپانياسىنىڭ باسشىسى الدو كاروتستسا, «Ansaldo Energie S.p.ا» (ەنەرگەتيكا) جەتەكشىسى ستەفانو سانتينەللي, «Coldiretti» (اگرووندىرۋشىلەر كونفەدەراتسياسى) باسشىسى لۋيدجي پيو سكورداماليا جانە «Maire Tecnimont» (مۇناي حيمياسى, اگروحيميا) جەتەكشىسى الەسساندرو بەرنينيمەن كەزدەسۋلەر وتكىزىلدى.
يتاليا قازاقستان ەكونوميكاسىنىڭ ءىرى ينۆەستورلارىنىڭ ءبىرى. قر ۇلتتىق بانكىنىڭ دەرەكتەرى بويىنشا 2021 جىلى يتاليادان تىكەلەي شەتەلدىك ينۆەستيتسيالار كولەمى $122,8 ملن قۇرادى, ءبىزدىڭ ەلدەرىمىز اراسىنداعى ءوزارا تاۋار اينالىمىنىڭ كولەمى 2021 جىلى $9,6 ملرد (ەكسپورت – $8,8 ملرد, يمپورت – $0,8 ملرد) قۇرادى.
ايتا كەتسەك, 2022 جىلعى ماۋسىمنان باستاپ اشىلاتىن الماتى - ميلان باعىتى بويىنشا اپتاسىنا 2 رەت قاتىنايتىن تىكەلەي رەيستەر ەكى ەلدىڭ ساۋدا-ەكونوميكالىق بايلانىستارىن ودان ءارى دامىتۋىنا ىقپال ەتپەك.
