ورتالىق ديرەكتورى ەلميرا مىرزا-عاليدىڭ ايتۋىنشا, بايقاۋدىڭ نەگىزگى ماقساتى – جاستاردىڭ شىعارماشىلىق قابىلەتىن شىڭداپ, انا مەن بالانىڭ اراسىنداعى قارىم-قاتىناستىڭ نىعايۋىنا ۇلەس قوسۋ ارقىلى قازاق ادەبيەتىندەگى شىعارمالاردى ناسيحاتتاۋ بولىپ وتىر. بايقاۋدىڭ شارتى بويىنشا تاراز قالاسىندا تۇراتىن 12 جاستان 16 جاسقا دەيىنگى جاسوسپىرىمدەر اناسىمەن بىرگە قازىلار القاسى بەكىتكەن 9 ادەبي كىتاپتى وقىپ, ءوز ويلارىن بەينەجازباعا ءتۇسىرىپ, الەۋمەتتىك جەلىگە جاريالاۋعا ءتيىس. ال ەكىنشى كەزەڭگە وتكەن قاتىسۋشىلار ءۇش اي بويى وقىعان ادەبي شىعارمالارىن قورىتىپ, انا مەن بالا بۇل كىتاپتاردان العان اسەرىن قاعاز بەتىنە ءتۇسىرىپ, ءبىر-بىرىنە سىرلاسۋ حاتىن جازۋى كەرەك. بايقاۋعا قاتىسۋشىلار حات جازۋ ارقىلى وزدەرى وقىعان ادەبي شىعارمالاردى تالداپ, وقىرمان نازارىنا ۇسىندى.
كەزدەسۋدە حالىقارالىق «الاش» ادەبي سىيلىعىنىڭ لاۋرەاتى, جازۋشى-دراماتۋرگ ەلەن ءالىمجان انا مەن بالا, جالپى بولاشاق ۇرپاق ءۇشىن بۇل بايقاۋدىڭ ماڭىزدىلىعىن اتاپ ءوتىپ, بالالارعا ءوزىنىڭ «اناجار» كىتابىن سىيعا تارتتى. ال قازىلار القاسىنىڭ مۇشەسى, فيلولوگيا عىلىمدارىنىڭ كانديداتى سەيسەكۇل يسماتوۆا ءاربىر بەينەجازبا مەن حاتتاردان وزگەشە اسەر العانىن, قازاق ادەبيەتىن, قازاقتىڭ ءسوز ونەرىن قۇرمەتتەيتىن بۋىننىڭ ءوسىپ كەلە جاتقانىن جەتكىزدى. بايقاۋ قورىتىندىسى بويىنشا ءبىرىنشى ورىندى وقۋشى بەكاسىل ەسىركەپ پەن اناسى ەلميرا ەسىركەپوۆا جەڭىپ الدى. سونداي-اق ەكىنشى ورىندى ارۋجان بايراقى مەن اناسى ساۋلە مۇحامەدراحىمقىزى جانە كاۋسار قايىر مەن اناسى گۇلميرا احماعانبەتوۆا يەلەندى. جۇلدەلى ءۇشىنشى ورىن مەرەي تۇرسىنبەك پەن اناسى ايزات كوشكىنباەۆا جانە دينا ماەربەك پەن اناسى جانار تۇمەنوۆاعا بۇيىردى. سونىمەن قاتار 5 وقۋشى «زەردەلى» نوميناتسياسىمەن ماراپاتتالسا, قازىلار القاسىنىڭ شەشىمىنە سايكەس ايحانىم قايرات پەن اناسى ءۇمىت انارباەۆاعا دا ارنايى جۇلدە تاپسىرىلدى. بايقاۋ جەڭىمپازدارى مەن جۇلدەگەرلەرىنە قارجىلاي سىيلىق بەرىلدى.
جيىن سوڭىندا كەلۋشىلەر «اناعا تاعزىم» ورتالىعىنىڭ فويەسىندە ورنالاسقان تاراز قالالىق ورتالىقتاندىرىلعان كىتاپحانالار جۇيەسىنىڭ «كىتاپتار قالاشىعىنا ساياحات» كورمە-ينستاللياتسياسىن ارالاپ كوردى. سونىمەن قاتار كوپشىلىك «ميراس» اتا ءداستۇر زالىندا ۇلتتىق كيىم ۇلگىلەرىن ناسيحاتتاۋ ماقساتىندا ۇيىمداستىرىلعان «كيەلى كيمەشەك» كورمەسىن دە تاماشالادى.
جامبىل وبلىسى
