بۇدان كەيىن شۋ تەمىر جول بولىمشەسىندە پويىز ديسپەتچەرى, شۋ ستانساسى باستىعىنىڭ ءبىرىنشى ورىنباسارى, سارىشاعان ستانساسىنىڭ باستىعى بولىپ جەمىستى ەڭبەك ەتتى. ودان ءارى قىزمەتىن تسەليننىي تەمىر جول باسقارماسىندا جالعاستىردى. سوزىنە بەرىك, ىسىنە ادال ازامات قوزعالىس قىزمەتىن جەدەل باسقارۋ ءبولىمىنىڭ اعا كەزەكشىسى, جۇك جانە كوممەرتسيالىق قىزمەتتىڭ جۇك جانە كوممەرتسيالىق تاسىمالداۋ شارتتارىن ۇيىمداستىرۋ ءبولىمىنىڭ باستىعى بولدى.
ەكى بىردەي ديپلومى بولا تۇرا, بەكتاس احمەتوۆ ماسكەۋ مەملەكەتتىك ۋنيۆەرسيتەتىنىڭ زاڭ فاكۋلتەتىندە «ازاماتتىق قۇقىق» ماماندىعى بويىنشا دا ءبىلىم الدى. وسىدان سوڭ ونىڭ مەملەكەتتىك قىزمەت سالاسىنداعى ەڭبەك جولى باستالدى. 1994 جىلى كولىك جانە كوممۋنيكاتسيا مينيسترلىگىنە قىزمەتكە قابىلدانىپ, ەلىمىزدىڭ كولىك ينفراقۇرىلىمىن دامىتۋعا ولشەۋسىز ۇلەس قوستى. كەيىن سولتۇستىك ايماقتار بويىنشا گەودەزيا جانە كارتوگرافيا كوميتەتىنىڭ وكىلى رەتىندە قىزمەتىن جالعاستىردى. ۇكىمەت جانىنداعى جەر رەسۋرستارىن باسقارۋ اگەنتتىگى گەودەزيا جانە كارتوگرافيا كوميتەتىنىڭ «اقمولاتوپوگەودەزيا» مەملەكەتتىك كاسىپورنىن, ودان كەيىن «استاناتوپوگرافيا» مەملەكەتتىك كاسىپورنىن باس ديرەكتور لاۋازىمىندا باسقاردى.
توعىزىنشى تەرريتورياعا يەلىك ەتىپ وتىرعان قازاق ەلىنىڭ ۇلان-بايتاق جەرىنىڭ ءار سۇيەمىن بۇگىندە الەم مويىندايدى. بۇل اسا ماڭىزدى ىسكە بەكتاس احمەتوۆتىڭ دە قوسقان ۇلەسى بار. ول مەملەكەتتىك شەكارانى دەليميتاتسيالاۋ جانە دەماركاتسيالاۋ, جەرگىلىكتى جەرلەردە شەكارانى بەلگىلەۋ جۇمىستارىن ۇيىمداستىرۋعا تىكەلەي اتسالىستى. قازاقستانداعى كارتوگرافيالىق-گەودەزيالىق سالانىڭ دامۋىنا باعا جەتپەس ۇلەس قوستى.
كەيىن قازاقستان پرەزيدەنتىنىڭ ءىس باسقارماسىندا قىزمەتىن جالعاستىرىپ, مەملەكەت باسشىسىنىڭ, سونداي-اق وزگە دە جوعارى لاۋازىمدى تۇلعالاردىڭ قاتىسۋىمەن وتەتىن ءىس-شارالاردى ۇيىمداستىرۋعا تىكەلەي قاتىستى. پرەزيدەنت ءىس باسقارماسىنىڭ ۆەدومستۆولىق باعىنىستى ۇيىمدارىن كادرلارمەن قامتاماسىز ەتۋ جاۋاپكەرشىلىگىن ارقالادى. 2010 جىلى «قازاقستان تەمىر جولى» كومپانياسىنا اۋىسىپ, سول جەردەن قۇرمەتتى دەمالىسقا شىقتى. زەينەت دەمالىسىنا شىقسا دا, قوعامدىق ومىردەن قول ۇزگەن جوق. ءىزىن باسقان, ءىسىن جالعاستىرعان كوپ شاكىرت دايارلادى. ەڭبەك سىڭىرگەن زەينەتكەر, «قۇرمەتتى تەمىرجولشى» اتاندى. «ەرەن ەڭبەگى ءۇشىن» مەدالىمەن, اتا زاڭنىڭ 10 جىلدىعىنا, تاۋەلسىزدىكتىڭ 20 جىلدىعىنا جانە استانانىڭ 20 جىلدىعىنا ارنالعان مەرەيتويلىق مەدالدارمەن, اتا زاڭنىڭ 20 جىلدىعىنا ارنالعان توسبەلگىمەن ماراپاتتالدى.
وتباسى قۇرۋ – ەر ازاماتتىڭ اسىل پارىزى. اكەمىز بۇل بورىشىن دا بۇلجىتپاي ورىندادى. اياۋلى انامىز ايتكۇل رۇستەمبەكوۆامەن كوڭىل جاراستىرىپ, شاڭىراق كوتەردى. 43 جىل تاتۋ-ءتاتتى عۇمىر كەشكەن ەرلى-زايىپتىلار گۇلناز, اينۇر ەسىمدى قىزدارىن تاربيەلەپ, ولاردان تاراعان توميريس, ءامينا, ءال-مانسۇر ەسىمدى نەمەرەلەرىنىڭ قىزىعىنا بولەندى. ۇنەمى ومىرلىك تاجىريبەسىنە سۇيەنىپ, اقىل-كەڭەسىن ايتىپ, ءبىز ءۇشىن شىنايى سۇيىنەتىن دە سۇيسىنەتىن جەر بەتىندەگى ەڭ جاقسى جار جانە اكە بولدى. جانىڭىز ءجانناتتا بولسىن, جارقىن ادام!
اياۋلى جارى, بالالارى, نەمەرەلەرى
