ماڭعىستاۋ اۋدانى اكىمدىگىنىڭ ءباسپاسوز قىزمەتى حابارلاعانداي, ماعاۋيا نۇرعازيەۆ بەس جىلدان بەرى جەكە تۇرعىن ءۇيىنىڭ 200 شارشى مەتر اۋماعىنا جەمىس اعاشى مەن كوكونىس وسىرگەن. بيىلدان باستاپ قۇس شارۋاشىلىعى كاسىبىن قولعا الدى. بۇگىندە ول 100-گە جۋىق بالاپان باعىپ وتىر. 10 شاقتى كۇركەتاۋىقتان كۇنىنە 10-15 جۇمىرتقا الادى. سونىمەن قاتار «تسەزاركا», «ادلەر», «كۇركەتاۋىق» جۇمىرتقالارىن ينكۋباتوردا كوبەيتۋدە.
– قۇس ءوسىرۋدىڭ وزىندىك ءادىس-ءتاسىلى بار. جۇمىرتقا الدىمەن ارنايى ينكۋباتورعا سالىنادى. ونىڭ ىلعالدىلىعى مەن جىلۋىن قاداعالاپ وتىرۋ قاجەت. ءار كۇن سايىن جىلۋ كورسەتكىشىن كوبەيتىپ, ىلعالدىلىعىن ساقتاپ وتىرامىن. بەلگىلى ءبىر كۇننەن كەيىن ينكۋباتوردى جەلدەتىپ, سول ارالىقتا جۇمىرتقانىڭ بالاپانعا اينالۋىن تەكسەرەمىن. ەگەر تامىرلانباسا, وندا ونى ءارى قاراي ينكۋباتوردا ساقتاۋدىڭ قاجەتتىلىگى جوق. ينكۋباتوردان شىققان سوڭ ارنايى ورىنعا بالاپانداردى ورنالاستىرامىن. ول جەرگە جارىعى, جىلۋى, سۋى مەن جەمى ۋاقىتپەن جانە ولشەممەن بەرىلەدى. كۇركەتاۋىقتىڭ ءشوبى مەن جەمى بولەك بولادى. قاراپايىم تاۋىقتار سەكىلدى كەز كەلگەن جەمدى جەمەيدى. سوندىقتان ءار تاۋىقتىڭ بابى ءار بولەك, – دەيدى ماعاۋيا نۇرعازيەۆ.
تاۋىقتى قولدان ءوسىرىپ, ونى كوبەيتىپ, ەتى مەن جۇمىرتقاسىن ساتۋدى كوزدەگەن ماعاۋيا الداعى ۋاقىتتا «پاۆلين» قۇسىن دا ءوسىرىپ, قۇس ەتى مەن جۇمىرتقاسىن اۋدان كولەمىندە دامىتقىسى كەلەدى.
ماڭعىستاۋ وبلىسى
