شقو توتەنشە جاعدايلار دەپارتامەنتى ءباسپاسوز قىزمەتىنىڭ مالىمەتىنە سۇيەنسەك, سەمەيدەگى دوستوەۆسكي كوشەسىندە ورنالاسقان ءدامحانانىڭ اس بولمەسىندە ءورت شىققان. قىزىل جالىن توبە جابىنىن, تەرەزە جانە ەسىك بلوكتارىن, تۇرمىستىق تەحنيكا مەن جەكە زاتتاردى شارپىدى.
ءورتتى ءبىرىنشى بولىپ جاقىن جەردە تۇراتىن داۋرەن جانباەۆ بايقاعان. بىردەن ءورت سوندىرۋشىلەرگە حابار بەرگەن ول سول جەرگە بارىپ, 1995 جانە 1985 جىلى تۋعان ءدامحانانىڭ ەكى قىزمەتكەرىن سىرتقا الىپ شىقتى.
«الدىن الا مالىمەت بويىنشا ءتىلسىز جاۋدىڭ شىعۋىنا – ەلەكتر جابدىقتارىن ورناتۋ جانە پايدالانۋ كەزىندە قاۋىپسىزدىك تالاپتارىن ساقتاماۋ سەبەپ بولۋى مۇمكىن. داۋرەننىڭ باتىل قيمىلىنىڭ ارقاسىندا ورتتەن ەشكىم زارداپ شەككەن جوق», دەلىنگەن اقپاراتتا.
بەيبىت كۇننىڭ باتىرى قالا مەكتەپتەرىنىڭ بىرىندە ديرەكتوردىڭ ورىنباسارى بولىپ جۇمىس ىستەيدى.
