عالىمداردىڭ پىكىرىنشە, بۇل ميوكارد ينفاركتىنەن, ينسۋلتتان, تروفيكالىق جارالاردان, اياق گانگرەناسىنان, سونداي-اق باسقا دا مۇشەلەردىڭ مۇگەدەكتىگى مەن ءولىمدى ازايتادى.
ءال-فارابي اتىنداعى قازاق ۇلتتىق ۋنيۆەرسيتەتىنىڭ قان تامىرلارى پاتولوگياسى ورتالىعى ماماندارى ارتەريالىق تامىرلاردىڭ وتكىزگىشتىگىن قالپىنا كەلتىرۋگە ارنالعان قۇرىلعىلار مەن ادىستەرگە قازاقستاننىڭ ەكى پاتەنتىن جانە ەۋرازيالىق پاتەنتتىك ۆەدومستۆونىڭ ەكى پاتەنتىن الدى.
ء«بىزدىڭ ونەرتابىستارىمىز «ارتەريالىق تامىرلاردىڭ وتكىزگىشتىگىن قالپىنا كەلتىرۋگە ارنالعان قۇرىلعى جانە ءادىس» جانە «اتەروسكلەروتيكالىق بلياشكالاردى سەلەكتيۆتى ۋلترادىبىستىق ديسسەكتسياعا ارنالعان قۇرىلعى جانە ارتەريالىق تامىرلاردىڭ وتكىزگىشتىگىن قالپىنا كەلتىرۋ ءادىسى» دەپ اتالادى. ەمدەۋ ءادىسى مىناداي: ءبىز ارتەريالاردا جابىق قۋىس جاساپ, ارتەريا ارقىلى قان ءوتىپ جاتقان كەزدە اتەروسكلەروتيكالىق بلياشكالاردى پرەپاراتپەن ەرىتەمىز. بۇل ونەرتابىستار اتەروسكلەروتيكالىق بلياشكالاردى تۇبەگەيلى جويۋعا جانە بىردەن بىرنەشە ارتەريانى تازالاۋعا مۇمكىندىك بەرەدى», دەپ ءتۇسىندىردى ۋنيۆەرسيتەتتىڭ قان تامىرلارى پاتولوگياسى ورتالىعىنىڭ ديرەكتورى ورالباي دارمەنوۆ.
بۇل قۇرىلعىلاردى قولدانۋ قان تامىرلارىن ستەنتتەۋ, سونداي-اق ومىرلىك ماڭىزدى مۇشەلەر – جۇرەك, مي, اياق ارتەريالارىنىڭ تامىرلارىنا اشىق شۋنتتاۋشى وپەراتسيالار سياقتى بەلگىلى جانە كۇردەلى ادىستەرمەن سالىستىرعاندا, ەمدەۋدىڭ سالىستىرمالى تۇردە ءتيىمدى بولجامدارى مەن ساپاسىن بەرەدى.
«جىل سايىن الەمدە ستەنتتەر 60 ملرد دوللارعا ساتىلادى, ءبىز ۇسىناتىن ەمدەۋ ءادىسى الدەقايدا ارزانىراق بولادى. ءبىزدىڭ ءونىم تەحنيكالىق تا, قۇنى جاعىنان دا جاقىن انالوگتاردان بىرنەشە ەسە اسىپ تۇسەدى», دەدى پروفەسسور ورالباي دارمەنوۆ.
قازىر عالىمدار كلينيكالىق سىناقتار مەن كوممەرتسيالىق وندىرىسكە ارنالعان قۇرىلعىلاردىڭ زەرتحانالىق جانە وندىرىستىك ۇلگىلەرىن جاساۋمەن اينالىسىپ جاتىر.
