وتاندىق اقپارات كەڭىستىگىندە تەلەراديوارنالار جانىنان قۇرىلعان تۇڭعىش رەسپۋبليكالىق مەديامەكتەپ 2021 جىلعى قاراشا ايىندا جۇمىسىن باستادى. جەتى اي مەرزىم ارالىعىندا مەديامەكتەپتە قازاقستاندىق جوعارى وقۋ ورىندارىنىڭ جۋرناليستيكا, كينو جانە تەلەۆيزيا, رەجيسسۋرا فاكۋلتەتىنىڭ 30 ستۋدەنتى اقىسىز نەگىزدە پراكتيكالىق كۋرستاردان ءوتتى.
ءىس-شارادا «قازاقستان» رەسپۋبليكالىق تەلەراديوكورپوراتسياسى» اق-نىڭ قۇرىلىمدارىنا قىزمەتكە جانە كادرلىق رەزەرۆىنە قابىلدانعان مەديامەكتەپ تۇلەكتەرىنىڭ ەسىمدەرى اتالادى. مەديا مەكتەپتىڭ 7 ۇزدىك تۇلەگى ەڭبەك جولىن كورپوراتسياعا قاراستى Qazaqstan ۇلتتىق تەلەارناسى جانە Abai TV تەلەارناسىنان باستايدى.
«وتاندىق باسقا دا مەملەكەتتىك بۇقارالىق اقپارات قۇرالدارى سالاعا قوسىلاتىن جاس مامانداردى پراكتيكالىق تۇرعىدان شىڭداپ, تاجىريبەدەن وتكىزۋ جانە كادرلىق رەزەرۆكە ەنگىزۋ تاجىريبەسىن قولعا الا باستاۋعا ءتيىس. بۇل – كۇندە وزگەرىسكە ۇشىراپ جاتقان مەديا سالاسى ءۇشىن ماڭىزدى. وسى رەتتە «قازاقستان» تەلەراديوكورپوراتسياسىنىڭ تاعى ءبىر جوباسى – Balapan ارناسىنىڭ جانىنان قۇرىلعان ەرەكشە بالالارعا ارنالعان انيماتسيا مەكتەبى دە ۇزدىك مىسال», دەدى مينيستر ا.وماروۆ.
ل.ن.گۋميلەۆ اتىنداعى ەۇۋ ستۋدەنتتەرى گۇلزادا ابىلقايىروۆا, ساندۋعاش مارالباي, ءاليا تۇگەلباي, مادينا قامزينا, اجار ءالىمحان, اينا الپىسباي, ە.بوكەتوۆ اتىنداعى قاراعاندى مەملەكەتتىك ۋنيۆەرسيتەتىنىڭ ستۋدەنتى ايبوتا ەربولات جۇمىسقا قابىلدانسا, ل.ن.گۋميلەۆ اتىنداعى ەۇۋ ستۋدەنتتەرى ايمەرەكە ايتباي مەن اڭساعان ەرمەك, قازاق ۇلتتىق ونەر ۋنيۆەرسيتەتىنىڭ ستۋدەنتى قۋانىش ومىربەك, استانا IT ۋنيۆەرسيتەتىنىڭ ستۋدەنتى بەكزات بەردىبەك كادرلىق رەزەرۆكە ەنگىزىلدى.
«ماقساتىمىز – تاجىريبەمەن, بىلىممەن ءبولىسۋ, قارا شاڭىراقتاعى كادرلار ساباقتاستىعىن جالعاستىرۋ. وسى رەتتە «قازاقستان» تەلەراديوكورپوراتسياسىنىڭ تەلەۆيزيا ماماندارىنا ارنالعان مەديامەكتەبىنىڭ جۇمىسى تۇراقتى تۇردە جالعاساتىنىن حابارلايمىز. ءىرى مەدياقۇرىلىم رەتىندە ەڭبەككە ەندى ارالاساتىن جاس ماماندارعا قولداۋ كورسەتۋگە دايىنبىز», دەدى باسقارما توراعاسى ل.تانىسباي.
