وقيعاعا توقتالساق, شىمكەنتتىك تۇرعىن ساياباقتا سەرۋەندەپ ءجۇرىپ, پوليەتيلەن پاكەتىنە ورالعان وزىنە ءتان حوش ءيىسى بار, دارىگە ۇقساس زات تاۋىپ الادى. الايدا, ونى ءتيىستى مەكەمەگە حابارلاماي, الداعى ۋاقىتتا تۇتىنۋ نەمەسە ساتۋ ماقساتىندا وزىنە قالدىرعان.
«ارادا ۋاقىت وتە جولدا بەلگىسىز ازاماتتارمەن جانجالداسۋ بارىسىندا ءال-فارابي اۋدانى پوليتسيا باسقارماسىنىڭ ۋچاسكەلىك ينسپەكتورى اجىراتىپ, ەرەگىسكەن ازاماتتاردى پوليتسيا باسقارماسىنا جەتكىزەدى.
ەر ادامداردىڭ جەكە باسىن انىقتاۋ بارىسىندا بىرىنەن 32 دانا پوليەتيلەن پاكەتىنە ورالعان وزىنە ءتان حوش ءيىسى بار پسيحوتروپقا ۇقسايتىن زات انىقتالىپ, تاركىلەنەدى. ءتيىستى ساراپتاما قورىتىندىسىمەن قالتاشالارداعى زاتتىڭ سالماعى 16 گراممعا جۋىق بولاتىن پسيحوتروپتى زات پيرروليدينوۆالەروفەنون ەكەنى دالەلدەندى», دەلىنگەن كەلتىرگەن مالىمەتتە.
اتالعان دەرەك بويىنشا ەر ادام قر قىلمىستىق كودەكسىنىڭ 296-بابى 4-بولىگىمەن (ەسىرتكى زاتتارىن اسا ءىرى مولشەردە زاڭسىز ساقتاۋ) 4 جىلعا باس بوستاندىعىنان ايىرىلدى.
سالتانات كەنجەباي
