الەمنىڭ التىنشى راكەتكاسى ونس جابەردىڭ وسى جارىستا «الىسقا شاباتىنىنا» كۇماندانعاندار كەمدە-كەم ەدى. ويتكەنى تۋنيستىك تەننيسشى گرۋنتتا وتە جاقسى وينايدى. سوڭعى ءبىر-ەكى اي ارالىعىندا ول مادريدتەگى WTA تۋرنيرىندە توپ جارىپ, ريمدەگى دودانىڭ فينالىندا ونەر كورسەتتى. «رولان گارروستىڭ» سوڭعى ەكەۋىندە ونس ءتورتىنشى كەزەڭگە دەيىن جەتىپ, بىلتىر ۋيمبلدوننىڭ شيرەك فينالىنا شىقتى. بىراق بۇل جولى جابەردىڭ جولى بولمادى. ول ويدا-جوقتا ۇزدىكتەر تىزىمىندە 56-ورىندا تۇرعان پولشالىق ماگدا لينەتتەن ۇتىلدى.
كەزىندە «رولان گارروستا» توپ جارىپ, قازىرگى كەزدە WTA رەيتينگىندە 10-ساتىعا جايعاسقان گاربينە مۋگۋرۋسا 37 جاستاعى ەستونيالىق تەننيسشى كايا كانەپيگە ەسە جىبەردى. وسىدان ەكى-ءۇش جىل بۇرىن عانا «ۇلكەن دۋلىعا» ساناتىنا ەنەتىن پاريج بەن مەلبۋرندەگى تۋرنيرلەردىڭ فينالىندا ويناپ, لوندوندا دارا شىققان دومينيك تيم اتر تىزىمىندە 89-ورىنعا تۇراقتاعان بوليۆيالىق ۋگو دەلەنگە جول بەردى. ايەلدەر اراسىنداعى ەڭ باي تەننيسشى, اقش پەن اۋستراليانىڭ اشىق بىرىنشىلىكتەرىن ەكى رەتتەن ۇتقان ناومي وساكا دا ەلىنە ەڭسەسى تۇسكەن كۇيدە ورالدى. جاپونيانىڭ جۇلدىزى اقش-تىڭ ارۋى اماندا انيسيموۆادان ايلاسىن اسىرا المادى. مىنە, اتالعان ءتۋرنيردىڭ العاشقى كەزەڭىندە وسىنداي توسىن ناتيجەلەر تىركەلدى.
قازاقستاندىق تەننيسشىلەر جايىندا ايتار بولساق, پاريجدە ءۇش ويىنشىمىز باق سىناۋدا. ەلەنا رىباكينا دۇنيەجۇزىلىك رەيتينگتە 78-ورىندا تۇرعان 31 جاستاعى نيدەرلاندتىق ارانچا رۋسپەن شەبەرلىك بايقاستى. الەكساندر بۋبليك اتر تىزىمىندە 65-ساتىعا جايعاسقان فرانتسيالىق ارتۋر ريندەركنەشپەن كۇش سىناستى. بۇل ويىندار دۇيسەنبىدە باستالعان ەدى. العاشقى سەتتەردە جەرلەستەرىمىز جەڭىپ جاتتى. بىراق لوندوندا تولاسسىز جاۋعان جاڭبىر جارىستىڭ بەرەكەسىن كەتىردى. سودان بارلىق كەزدەسۋلەردى كەيىنگە شەگەرۋگە تۋرا كەلدى. كەلەسى كۇنى تۋرنير قايتا جالعاستى. ءبىر قۋانىشتىسى, رىباكينا دا (6:1, 5:7, 6:2), بۋبليك تە (6:2, 6:4, 6:4) شابىسىنان جاڭىلماي, كەلەسى كەزەڭدە كۇش سىناسۋ مۇمكىندىگىنە يە بولدى. يۋليا پۋتينتسەۆانىڭ قارسىلاسى دا اناۋ ايتقانداي اسا مىقتى بولعان جوق. 27 جاستاعى رۋمىنيالىق يرينا بارا وسى كۇنگە دەيىن «توپ-100» ويىنشىنىڭ قاتارىنا قوسىلا الماي ءجۇر. يۋليا ونى وڭاي ەڭسەردى – 6:3, 6:1.
ەكىنشى كەزەڭدە يۋليا پۋتينتسەۆا يتاليالىق كاميلا دجوردجيمەن, ەلەنا رىباكينا امەريكالىق كەتي ۆولىنەتسپەن, ال الەكساندر بۋبليك سەربيالىق ميومير كەتسمانوۆيچپەن كۇش سىناسادى. بۇل ويىنداردىڭ بارلىعى دا بۇگىن وتەدى.
