جاقسىلىق ءامىرالى ۇلىنىڭ ءجۇرىپ وتكەن جولى بۇگىنگى جاستار مەن كەيىنگى ۇرپاققا ۇلگى. ابزال ازامات سوڭعى دەمى تاۋسىلعانشا ەلى مەن حالقىنا قالتىقسىز قىزمەت ەتتى. ونىڭ سپورتتىق جولى دا اۋىر بولدى. وداقتا سان مارتە تەڭدەسسىز دەپ تانىلىپ, حالىقارالىق دودالاردا دارالانعانىمەن, ماسكەۋلىك ماماندار تاراپىنان كوپ تەپەرىش كوردى. سونىڭ سالدارىنان بايراقتى باسەكەلەردىڭ ءبىرازىنان شەت قالدى. دەسەك تە ءوزىنىڭ تاباندىلىعى مەن وجەتتىگى جانە قاجىرلى ەڭبەگىنىڭ ارقاسىندا كوزدەگەن ماقساتىنا قول جەتكىزدى. ۇشكەمپىروۆ 29 جاستان اسقان شاعىندا عانا وليمپيا ويىندارىندا باق سىناۋ قۇرمەتىنە بولەندى. سول مۇمكىندىكتى ۇتىمدى پايدالانعان ول ءتورت جىلدىقتىڭ باستى دوداسىندا باس جۇلدەنى ولجالادى. ال 30 جاسىندا الەم چەمپيونى اتاندى.
داڭقتى بالۋان بوز كىلەممەن قوشتاسقاننان كەيىن ءتۇرلى قىزمەتتەر اتقاردى. كەيىننەن مال كاسىبىمەن اينالىسىپ, «جاقسىلىق» دەپ اتالاتىن شارۋا قوجالىعىن قۇردى. باستاعان ءىسىن دوڭگەلەتىپ اكەتكەن سوڭ قايىرىمدىلىقپەن اينالىستى. اتاپ ايتساق, ءوزى تۇرىپ جاتقان الماتى قالاسىنىڭ ىرگەسىندەگى مىڭباەۆ اۋىلىنا گاز تارتتى. بالالارعا ارناپ سپورت كەشەنى مەن بالاباقشا, قولجەتىمدى باعامەن 50 وتباسىنا پاتەر سالدى. باسقا دا يگى ءىس-شارالاردىڭ باسى-قاسىندا ءجۇردى. وسىلاي تىزبەكتەي بەرسەك, وليمپيادا چەمپيونىنىڭ ەل-جۇرتىنا سىڭىرگەن ەڭبەگى وتە زور.
الاشتىڭ ماقتان تۇتار ازاماتىن ەسكە الۋعا ارنالعان سەمەيدەگى تۋرنيرگە كوپتەگەن ەلەۋلى تۇلعا مەن سپورت ساڭلاقتارى كەلدى. سولاردىڭ اراسىنان يۋري مەلنيچەنكو, باقتيار بايسەيىتوۆ, اسەت يمانباەۆ, ەربول قوڭىراتوۆ جانە تاعى باسقا ايگىلى بالۋانداردى كوزىمىز شالدى.
ءۇش كۇنگە سوزىلعان باسەكەلەردىڭ قورىتىندىسى بويىنشا مىنا جاس جەتكىنشەكتەر جەڭىس تۇعىرىنىڭ ەڭ بيىك ساتىسىنا كوتەرىلدى: 38 كيلو – دامير ءابىلدا, 44 كيلو – ەرنازار ەرداۋلەت, 52 كيلو – ارنات جارىلقاسىن, 68 كيلو – باقداۋلەت قامزا, 91 كيلو – ەلدوس تۇرسىن (بارلىعى دا الماتى وبلىسىنان), 41 كيلو – ەربولات قانات ۇلى («لەپسى» سپورت مەكتەبى, الماتى وبلىسى), 48 كيلو – الپامىس بولات ۇلى (قىزىلوردا), 57 كيلو – مارلەن مەيىربەك ۇلى (تاراز), 62 كيلو – يسلام گاسىموۆ (اقمولا وبلىسى), 75 كيلو – تەمىرلان ەرمەك ۇلى (شىعىس قازاقستان وبلىسى, ءۇرجار اۋدانى), 85 كيلو – نۇربولات ءجۇمادىل (سەمەي قالاسىنداعى جاقسىلىق ۇشكەمپىروۆ اتىنداعى سپورت مەكتەبى) جانە 110 كيلو – ەرسۇلتان لەسباي (تۇركىستان).
سونىمەن قاتار سەمەيدەگى جاقسىلىق ۇشكەمپىروۆ اتىنداعى سپورت مەكتەبىنىڭ تۇلەگى نۇرداۋلەت قۇمار ۇلى («جەڭىسكە دەگەن جىگەرى ءۇشىن»), وسكەمەننىڭ ورەنى ماديار توقتاۋحان («ەڭ ۇزدىك ءتاسىل») جانە اقمولا وبلىسىنىڭ وكىلى يسلام گاسىموۆ («ەڭ ۇزدىك بالۋان») ءتۇرلى اتالىم بويىنشا ۇزدىك دەپ تانىلىپ, ارنايى سىيلىقتارعا يە بولدى.
