ايماقتار • 26 مامىر، 2022

شايىر «يلەگەن» شەبەر

اتىراۋلىق يلونا كيم ەكى ماماندىقتى مەڭگەرگەن. ءبىرى – اعىلشىن ءتىلى ءپانىنىڭ مۇعالىمى، ەكىنشىسى – تۋريزم مەنەدجەرى. شەتەلدىك كومپانيادا 12 جىلدىق ەڭبەك ءوتىلى بار. الايدا اڭسارى قولونەرگە اۋعان شەبەر شايىردان ءتۇرلى بۇيىم جاساپ ءجۇر.

جولداسبەك كوشەرباي ۇلى

– وسى وڭىردە دۇنيەگە كەلىپ، وسىندا ەڭبەك جولىمدى باستادىم. بالا كەزىمنەن قولونەر بۇيىمدارىنا قىزىعاتىن ەدىم. سول قىزىعۋشىلىق اقىرى شەتەلدىك كومپانياداعى ءتاۋىر جۇمىسىمدى تاستاۋعا ءماجبۇر ەتتى. باستاپقىدا سۋرەت سالىپ ءجۇردىم. كەيىن شايىردى «يلەپ»، ءتۇرلى بۇيىم مەن ويىنشىقتار جاساۋعا كوشتىم. ويتكەنى وزگەنىڭ جاساعان نارسەسىن قايتالاعىم كەلمەيدى. شيكىزات رەتىندە رەسەيدە شىعارىلعان سۇيىق ەپوكسيدتى شايىردى پايدالانامىن. ونىڭ 1 ءليترى 14 مىڭ تەڭگە تۇرادى، – دەيدى يلونا كيم.

ونىڭ شەبەر قولىنان ۇيدە پايدالاناتىن سəندىك بۇيىمدار، سۋۆەنيرلەر، ساعات پەن كارتينالار تۋىندادى. ءدامى ءتىل ۇيىرەتىن ءتاتتى كونفەتتەر سالۋعا ارنالعان ىدىستى دا جاسادى. ال جاڭا جىل قارساڭىندا شىرشاعا ىلەتىن ءتۇرلى ويىنشىقتى دايىندادى. ءبارى – شايىردان جاسالعان ءونىم.

– الدىمەن شايىردى 10 مينۋتتاي ارالاستىرىپ، بىلايشا ايتقاندا، ءيىن قاندىرا «يلەيمىن». سۇيىق شايىر 20-30 مينۋتتا قاتىپ قالادى. سول سەبەپتەن، ويعا العان بۇيىمدى تەز جاساۋ كەرەك. قاتقان شايىردى قايتا بالقىتا المايسىڭ. پىشىنگە كەلتىرۋ، كەپتىرۋ، بوياۋ سەكىلدى جۇمىستارىن قوسقاندا، ءبىر بۇيىمدى ءۇش كۇندە دايىنداپ ءجۇرمىن، – دەيدى شايىر «يلەيتىن» شەبەر.

وعان ەلىمىزدىڭ نۇر-سۇلتان مەن الماتى قالالارىننان، كوكشەتاۋ مەن قوستاناي وڭىرلەرىنەن تاپسىرىستار ءتۇسىپ تۇرادى. ماسەلەن، كوكشەتاۋ قالاسىنان ءۇش اپتادا 70 ويىنشىقتى جاساۋعا تاپسىرىس تۇسكەن. بۇل ويىنشىقتار كەلىسىلگەن مەرزىمدە دايىندالىپ، تاپسىرىس بەرۋشىگە جىبەرىلگەن.

اتىراۋ وبلىسى

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز