قازىرگى ۋاقىتتا بايقاۋشىلار سانىن ايماقتار بويىنشا ناقتىلاۋ, ترەنينگتەر وتكىزۋ, ولارعا ماتەريالدار ازىرلەۋ جۇمىستارى جۇرگىزىلىپ جاتىر. پارتيالىق ەمەس بايقاۋ ورتالىعىنىڭ توراعاسى تولەگەن كۇنادىلوۆتىڭ ايتۋىنشا, وقۋ سەمينارىنا قاتىسقاندار 5 ماۋسىم كۇنى وتەتىن رەفەرەندۋمدى, ونىڭ ىشىندە سايلاۋ ۋچاسكەلەرىندە بايقاۋ مەن مونيتورينگ جۇرگىزۋگە اتسالىسادى. «رەفەرەندۋمنىڭ ايقىن, ءادىل ءوتۋىن قامتاماسىز ەتۋ ءۇشىن پارتيالىق ەمەس بايقاۋشىلار ۇلكەن ءرول اتقارادى. ول ءۇشىن بايقاۋشىلار وزدەرىنىڭ قۇقىقتارى مەن مىندەتتەرىن جانە زاڭنامانى ءبىلۋى ءتيىس. قازىر بايقاۋشىلار ارنايى وقىتۋدان ءوتىپ, ءبىلىمىن شىڭداۋدا», دەدى ورتالىق توراعاسى.
سەمينارعا قاتىسۋشىلار بايقاۋشىلاردىڭ فۋنكتسيالارى مەن مىندەتتەرىن, سونداي-اق «رەسپۋبليكالىق رەفەرەندۋم تۋرالى» جانە «قازاقستان رەسپۋبليكاسىنداعى سايلاۋ تۋرالى» زاڭدارىنىڭ نەگىزگى ەرەجەلەرىن تالقىلادى. ءىس-شارا بارىسىندا بايقاۋشىلار سايلاۋ ورگاندارىنىڭ قۇزىرەتى, داۋىس بەرۋ كۇنى سايلاۋ كوميسسياسىنىڭ قىزمەتىن ۇيىمداستىرۋ, قوعامدىق بايقاۋشىلاردىڭ قۇقىقتارى مەن مىندەتتەرى, سونداي-اق ولاردىڭ جۇمىس ىستەۋ قاعيداتتارى سىندى ماسەلەلەردى قارادى.
وسى باعىتتا قاتىسۋشىلارعا سايلاۋ بويىنشا تاجىريبەلى مامان, ورتالىق سايلاۋ كوميسسياسىنىڭ بۇرىنعى مۇشەسى سەرىك سىدىقوۆ «رەسپۋبليكالىق رەفەرەندۋمداعى بايقاۋشىلاردىڭ وكىلەتتىكتەرى, قۇقىقتارى مەن مىندەتتەرى» تاقىرىبىندا ءدارىس وقىدى. سپيكەر زاڭداردا بەلگىلەنگەن بايقاۋشىلاردىڭ قۇقىقتارى مەن مىندەتتەرىنىڭ نەگىزگى سيپاتتامالارى مەن ەرەكشەلىكتەرىن تولىعىراق باياندادى.
«رەفەرەندۋمدا بايقاۋشىلاردىڭ ءرولى وتە ماڭىزدى. ولاردىڭ باستى مىندەتى – پروتسەستى وبەكتيۆتى تۇردە قاداعالاپ, ءادىل جانە ادال وتكىزۋگە ىقپال ەتۋ. بايقاۋشىنىڭ نەگىزگى فۋنكتسياسىنا داۋىس بەرۋگە, سايلاۋ ۋچاسكەسىندە داۋىس بەرۋ قورىتىندىلارىن بەلگىلەۋگە قوعامدىق باقىلاۋدى قامتاماسىز ەتۋ جانە ازاماتتاردىڭ سايلاۋ قۇقىقتارىنىڭ ساقتالۋىن قاداعالاۋ جاتادى», دەدى سەرىك سىدىقوۆ.
سەمينار سوڭىندا رەفەرەندۋمعا دايىندىق بارىسى تالقىلانىپ, ساراپشىلار قاتىسۋشىلاردىڭ سۇراقتارىنا جاۋاپ بەردى.
