م.جۇماباەۆ اتىنداعى اۋداننىڭ پولۋدينسكوە اۋىلىنداعى تاۋارلى ءسۇت فەرماسىنىڭ الاڭىندا وبلىستاعى اۋىل شارۋاشىلىعى تاۋار وندىرۋشىلەرىمەن كەزدەسكەن ا.ورالوۆ جينالعان قاۋىممەن الداعى كونستيتۋتسيالىق رەفورمانىڭ ماڭىزىن تالقىلادى.
«اتا زاڭىمىزدا جەر حالىقتىڭ مەنشىگى دەپ كورسەتىلەدى. بۇل – وتە ماڭىزدى قادام. سولتۇستىك قازاقستان وبلىسىندا حالىقتىڭ باسىم بولىگى اۋىل شارۋاشىلىعىمەن اينالىسادى. سوندىقتان 5 ماۋسىم كۇنى وتەتىن رەفەرەندۋمعا وبلىس تۇرعىندارى بەلسەنە قاتىسادى دەگەن ويدامىز», دەدى پارتيانىڭ اتقارۋشى حاتشىسى.
جيىندا ءسوز العان جەرگىلىكتى شارۋا قوجالىقتارىنىڭ ءبىرىنىڭ باسشىسى ا.ساپاروۆ تۇرعىندار ەل دامۋىنداعى جاڭا كەزەڭدى رەفەرەندۋممەن بايلانىستىراتىنىن اتاپ ءوتتى. «حالىق بولىپ جاتقان وزگەرىستەردى كورىپ وتىر جانە ەلىمىزدى دامىتۋ ءۇشىن كونستيتۋتسياعا وزگەرىستەر ەنگىزۋدى قولداۋعا دايىن», دەدى شارۋا يەسى.
وڭىرگە جۇمىس ساپارى بارىسىندا اتقارۋشى حاتشى زيالى قاۋىم وكىلدەرىمەن جانە پارتيا ارداگەرلەرىمەن جۇزدەستى. كەزدەسۋگە قاتىسۋشىلار اتا زاڭعا تۇزەتۋلەر ەنگىزۋگە قاتىستى جالپىحالىقتىق داۋىس بەرۋ جاڭا قازاقستاندى قۇرۋدا نەگىزگى ءرول اتقاراتىنىن اتاپ ءوتتى.
سونىمەن قاتار, ا.ورالوۆ باستاۋىش پارتيا ۇيىمدارىنىڭ توراعالارىمەن دە كەزدەسىپ, جيىندا پارتيانىڭ قوزعاۋشى كۇشى رەفەرەندۋمنىڭ ءمانى تۋرالى ءتۇسىندىرۋ جۇمىستارى بەلسەندى جۇرگىزىلۋگە ءتيىس ەكەنىن اتاپ ءوتتى.
