ورتالىق كوممۋنيكاتسيالار قىزمەتى الاڭىندا وتكەن ءباسپاسوز ءماسليحاتىندا ۆەدومستۆونىڭ قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى ازىمبەك نالىباەۆ, قالا قۇرىلىسى جانە تۇرعىن ءۇي كوممۋنالدىق ساياسات دەپارتامەنتىنىڭ ديرەكتورى رۋسلان لەپەسوۆ, «وتباسى بانك» اق باسقارما ءتورايىمى ءلاززات يبراگيموۆا مەن ورتالىق فيليالىنىڭ ديرەكتورى جانسۇلتان ماتاي حالىقتىڭ بەلگىلى ءبىر الەۋمەتتىك وسال توپتارىن قولداۋ ءۇشىن مەملەكەت باسشىسىنىڭ تاپسىرماسى بويىنشا ازىرلەنگەن باعدارلامانىڭ ارالىق ناتيجەلەرىمەن ءبولىستى.
ەستەرىڭىزگە سالا كەتەيىك, «وتباسى بانكى» جالعا بەرۋ تولەمدەرىن سۋبسيديالاۋعا وتىنىمدەر قابىلداۋدى 18 ساۋىردە باستاعان بولاتىن. وسىلايشا, بۇگىنگى تاڭدا قازاقستاندىقتار 12 634 ءوتىنىم بەرگەن (5 903 بىرەگەي ءوتىنىش). ولاردىڭ 2 741-ءى ماقۇلدانىپ, 690-ى بويىنشا سۋبسيديا الۋشى نەمەسە ونىڭ وتباسى مۇشەلەرى تۋرالى مالىمەتتەر تەكسەرىلۋدە. بۇدان باسقا, 51 ءوتىنىم بويىنشا قازىر باستاپقى دەرەكتەر عانا ەنگىزىلگەن, 1 076-سىن ءوتىنىم بەرۋشىلەردىڭ وزدەرى قايتارىپ العان. سونىمەن قاتار 6 860 ءوتىنىم ماقۇلدانباي, كەرى قايتارىلعان. ماقۇلدانباي قالعان وتىنىمدەردىڭ باسىم بولىگى تىركەۋ كەزىندە سمس-حابارلاما ارقىلى جىبەرىلگەن قۇپيا ءسوزدى ەنگىزبەگەن ءوتىنىش بەرۋشىلەر تاراپىنان كەلىپ تۇسكەن.
«قازاقستاندىقتار ءوز وتىنىمدەرىن جىلدام ءارى كەزەك كۇتپەي بەرۋلەرى ءۇشىن بىزدە بارلىق پروتسەسس ونلاين رەجىمدە ۇيىمداستىرىلعان. وتىنىمدەر ەلەكتروندى تسيفرلى قولتاڭبا ارقىلى otbasybank.kz پورتالىندا «جالداۋ اقىسىن سۋبسيديالاۋ» بولىمىندە بەرىلەدى. وتىنىمدەر قابىلداناتىن جانە وڭدەلەتىن تسيفرلى پلاتفورما بىرەگەي بولىپ سانالادى. العاشقى وتىنىمدەردى بەرۋ بارىسىندا پلاتفورمادا قاتەلەر تۋىنداۋى مۇمكىن دەپ بولجاپ, ءبىرىنشى كەزەڭدە وتىنىمدەر بانكتىڭ كليەنتتەرى سانالاتىن ۇمىتكەرلەردەن قابىلدانا باستادى», دەدى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى توراعاسىنىڭ ورىنباسارى ءا.نالىباەۆ.
ايتا كەتەرلىگى, جالداۋ شارتتارى بويىنشا تولەمدەردى رەسپۋبليكالىق جانە وڭىرلىك بيۋدجەتتەردەن قاراجات تۇسكەننەن كەيىن ماۋسىم ايىنان باستاپ تولەۋ جوسپارلانىپ وتىر. سپيكەرلەر تاراپىنان سونداي-اق كوممەرتسيالىق نارىقتا تۇرعىن ءۇيدى جالعا بەرۋدى سۋبسيديالاۋ قاعيدالارى تۋرالى اقپارات بەرىلدى.
«اتاۋلى كومەك قاعيداتى ازاماتتاردىڭ ورتاق جاۋاپكەرشىلىگىنە نەگىزدەلگەن. اتاپ ايتقاندا, 50 پايىزى مەملەكەتتىك سۋبسيديالار ەسەبىنەن جابىلسا, قالعان 50 پايىزىن پاتەر جالداپ تۇراتىن ازامات ءوزى تولەيدى. مەملەكەتتىك قولداۋعا ءتورت سانات بويىنشا كەزەكتە تۇرعان ۇمىتكەرلەر يە بولا الادى. ولاردىڭ قاتارىندا ءى جانە ءىى توپتاعى مۇگەدەكتەر, مۇمكىندىگى شەكتەۋلى بالالاردى تاربيەلەپ وتىرعان وتباسىلار, جەتىم بالالار جانە كوپبالالى وتباسىلار بار. بۇل رەتتە سوڭعى 6 ايداعى ورتاشا ايلىق جيىنتىق تابىستىڭ مولشەرى وتباسىنىڭ ءاربىر مۇشەسى ءۇشىن ءبىر ەڭ تومەنگى كۇنكورىس دەڭگەيىنەن اسپاۋعا ءتيىس», دەپ مالىمدەدى دەپارتامەنت ديرەكتورى رۋسلان لەپەسوۆ.
قويىلاتىن تاعى ءبىر تالاپ – ۇمىتكەرلەر «وتباسى بانكىنىڭ» كليەنتتەرى بولىپ, دەپوزيتى مەن مەكەمەنىڭ ينتەرنەت بانكينگىندە تىركەلگەن بولۋعا ءتيىس. جيناق شوتى جوق ادامدار شوتتى بەينەبانكينگ نەمەسە Otbasybank ءموبيلدى قوسىمشاسى ارقىلى اشا الادى. «دەپوزيت تۇرعىن ۇيگە اقشا جيناۋ ءۇشىن قاجەت. قازىر كەزەكتە تۇرعاندار ءوز مۇمكىندىكتەرىنە قاراي اقشا جيناي الادى. دەگەنمەن مەرزىمى بويىنشا ەرتەرەك اشىلعان دەپوزيت كەلەسى ساتىعا وتكەندە ارتىقشىلىقتارعا يە بولادى», دەدى بانك باسقارماسىنىڭ ءتورايىمى ل.يبراگيموۆا.
دەپوزيتتى اشىپ, otbasybank.kz پورتالىندا تىركەلگەن ۇمىتكەرلەر ءوتىنىمدى جەكە كابينەتتەرىندە راسىمدەي الادى. ءوتىنىمدى راسىمدەۋ ءۇشىن جەكە كابينەتتە تولەمدەردى الۋعا ارنالعان ءوتىنىش پەن دەربەس دەرەكتەردى جيناۋعا جانە وڭدەۋگە ارنالعان كەلىسىمگە قول قويۋ قاجەت. قۇجاتتارعا قول قويىلعاننان كەيىن جۇيە ەنگىزىلگەن دەرەكتەردى وڭدەپ, وتباسى قۇرامىن دەربەس انىقتايدى. وسىدان كەيىن وتباسىنىڭ كامەلەت جاسقا تولعان ءاربىر مۇشەسى «قوناق» مارتەبەسىندە otbasybank.kz سايتىنا كىرىپ, دەربەس دەرەكتەردى جيناۋعا جانە وڭدەۋگە كەلىسىمگە ەتسق كومەگىمەن قول قويۋعا ءتيىس. جۇيە دەرەكتەردى قايتا تەكسەرىپ, ۇمىتكەردىڭ سۋبسيديا الۋعا بەرگەن ءوتىنىمى ماقۇلدانادى.
